Ads by Google Ads by Google

Fagogo: O le Sone Vevela

Vaega: 85

 

“Le Tama e, fa’afetai tele i Lou alofa ma Lau tausiga e le mavae mo o matou tagata, o lea ua alafa’i mai ai i le manuia si o matou atunu’u i lenei taeao fou, ia vi’ia lava Oe Tama e fa’avavau, Amene.” Ia manuia le alo faiva o le atunu’u i feau ma galuega o le a feagai ai i lenei aso.

 

O lo’o faia pea fetufa’iga a ta’ita’i o le nofoaga a le Ami, ma sa toe manatu ifo, o le taimi muamua lenei ua alia’e ai lenei fa’ama’i e latalata i Uosinitone, ma e le i va’aia lava lenei ituaiga virusi i totonu o Amerika. Na toe fa’apea ane Commander Russell, “O le a la le mea o le a fai.” Na ia toe fa’apea ane, pe i ai ni fa’amaumauga ma ni su’esu’ega fa’amaonia e mafai ona sosolo le virusi i le ea ma manava ai tagata. O se fesili faigata lea, aua ua i ai fa’amaumauga, e mata’utia, ae e le i ma’ea lelei, atonu e mafai e le virusi o le Ebola, ona sosolo ma a’afia ai tagata e ala i le ea o lo’o manavaina.

 

Ua o’o nei le fa’asologa o le fonotaga ia Nancy Jaxx, ma na toe fa’amalamalama ai e Jaxx ia manuki e lua na mamate, ma e i ai le manatu ua mafua, ona o le ea  na a’afia i le virusi o le Ebola, i le tausaga 1983. O le isi mea na tula’i mai i le tausaga 1986, lea sa faia ai su’esu’ega a le ali’i foma’i o Eugene Johnson. Sa ia fa’aaoga ai le virusi o le Ebola ma le virusi o le Malburg na tui i totonu o ma ma o manuki latou te manavaina. O manuki uma nei na mamate, ae se i vagana ai le manuki e tasi na sao mai le virusi o le Malburg.

 

A’o fa’alogologo pea i le fa’amatalaga a Nancy Jaxx, na toe fesili ai Commander Russell ia Nancy, pe na fai ni fa’amaumauga ma fa’asalalauga e tusa ai ma lea su’esu’ega, ae na tali Nancy, “E leai.”

 

O lo’o fa’aauau pea le fonotaga a ta’ita’i o le nofoaga lenei a le Ami a le Malo Tele, ona o se mataupu ogaoga lea ua talanoaina i lea taimi. Na i ai fa’alogona na o’o ia Nancy, ona ua ia tali “leai” i le fesili na fesiligia ai o ia e Commander Russell, o ia o lo’o pulea atoa le nofoaga lenei a le Ami a le Malo Tele.

 

Ae i le taimi lea, ua le iloga le vaega o le lalolagi ua o’o i ai mafaufauga o le ali’i foma’i o Peter Jahrling, ua tau mafaufau nei pe na sogisogi i manuki nei, pe na i ai lava se mea sa ia faia, ona o lea ua talanoa ane Nancy, atonu e sosolo le virusi e fa’aaoga ai le ea o lo’o manavaina.

 

Na toe manatu le ali’i foma’i, afai na te fa’ailoa, o lona uiga o le a fetaui ma le otegia, ae sili ai, o le ave lea o ia e tu’u i le Slammer. O le isi fa’alogona popole ua i ai nei, ona o le virusi lenei ua latalata tele i Uosinitone, ae e le iloa po’o le a lenei virusi, e le o le Ebola Zaire, ae o se virusi fou.

 

Fai mai le fa’amatalaga a le tusi tala o Richard Preston i lana tusi, o le taimi na tau fa’ato’ato’a ai le fonotaga lea, ua fa’asolosolo lava mafaufauga o le tagata latou, pe o le a le mea o le fai, ae o a fo’i a’afiaga o le tagata soifua i le virusi lenei, ae pe fa’apefea fo’i ona togafitia tagata e a’afia i le virusi lea.

 

Fai mai na toe fesili lava le ali’i pule o Commander Russell i le ali’i foma’i o C.J. Peters e fa’apea, “O a la ni fuafuaga e tatau ona fai.” Ae e le i faia le fesili lea a Commander Russell, ua leva ona tau le mafaufau o le ali’i foma’i o C.J. Peters i manatu e tolu e tatau ona fai pe a a’afia se tasi i se virusi, muamua, o le faia o tui fa’agata, lua, o le fa’aaoga lea o fuala’au fa’asaina, tolu, o le ta pe uma lea o manuki, pe tapunia fo’i le kamupani a le Hazelton Washington o lo’o i Reston.

 

E faia pea…

 

Fa’aliliu: Akenese Ilalio Zec