E ui i le tele o fautuaga ma talosaga na folasia e afioga i faipule aga’i i le Fa’atonusili o le Matagaluega o Aoga a le malo, i se iloiloga sa faia ananafi e fesiligia ai le tele o mataupu o lo o fia malamalama ai le atunuu fa’asaga i fa’aiuga a le Ofisa o Aoga, peita’i na saunoa le afioga i le ali’i Faipule ia Vaetasi Tuumolimoli Saena Moliga, e le faia e le Fono faaiuga mo le Ofisa o Aoga.

O le iloiloga i le va o le Komiti o Aoga a le maota o sui ananafi ma le Faatonusili o Aoga ia Vaitinasa Dr. Salu Hunkin-Finau, na valaau ina ua fia malamalama ni isi o faipule i se fuafuaga lea ua faataoto e le Fa’atonusili o Aoga, ina ia tasi le aso mo fa’auuga a fanau aoga i lenei tausaga i Tutuila, faapea ai ma le tuuina atu o le vaega e faaleleia faleaoga (Maintenance Division) a le Ofisa o Aoga i lalo o le vaavaaiga a le Ofisa o Galuega Lautele a le malo.

E tele ni faasea mai itumalo eseese na faaleo e ni isi o faipule i luma o le iloiloga, faasaga i le fautuaga e tuu faatasi le sauniga mo faauuga a fanau aoga i Tutuila.

Na taua le afioga i le alii faipule ia Atualevao Gafatasi Afalava ma le afioga i le tamaitai faipule ia Vui Florence Vaili Saulo e faapea, o se tasi o faafitauli e ono tula’i mai i le aso lea pe afai ae tuu faatasi faauuga mo fanau aoga, e le gata e poloka faasoloatoa ai le auala, ae o le a feoma’i fo’i tagata i totonu o le malae.

“Ae faafefea pe a timu lea aso, o fea o le a sulu i ai matua ma fanau fa’au’u,?” o le fesili lea a le tamaitai faipule ia Vui.

Ae na saunoa le alii faipule ia Fatulegae’e Palepoi Mauga e faapea, o se tasi o popolega faasaga i le suiga lea, e ono tula’i mai ai se vevesi i le va o tamaitai aoga, aua e oo mai lava i le taimi nei o lo o fa’aauau pea ona va ni isi o fanau aoga ona o ta’aloga.

“O le isi faasea mai lo’u itumalo, e leai lava se fanau aoga e fia savali i se isi nofoaga ese i le taimi e fa’au’u ai, e fia savali lava le tama ma le teine aoga i le aoga na fa’au’u atu ai,” o le saunoaga lea a Fatulegae’e.

Na tutu faatasi faipule mai le itumalo o Tualauta ia Vui ma Larry Sanitoa le lagolago le mataupu lenei, o le aso mo le faauuina o fanau, o se aso faapitoa lea mo i latou, o se aso fo’i e tatau fo’i i le malo, ofisa o aoga ma matua ona ave ai la latou faamuamua i fanau aoga.

“E taua tele le fuafuaga ua faataoto e le Ofisa o Aoga ina ia tasi le aso mo le faauuga a le fanau, ae i lo’u talitonuga, e foliga mai ua tatou le amanaia le aso faapitoa mo nai fanau, i le mae’a ai o tausaga e fa o le olaga a’oa’oina i le aoga maualuga, o le aso faapitoa lea e faamanatu ai e matua ma fanau le taunuuga ua ausia e nai fanau,” o le saunoaga lea a Sanitoa ia Vaitinasa.

Na faaiu le tele o finagalo mai afioga i faipule i lo latou fautuaina lea o Vaitinasa, ina ia toe silasila toto’a i le faaiuga ua faataoto, e ui o se fuafuaga lelei, ae taua lava le tofu o le aoga ma le faauuga e pei ona sau ai i le tele o tausaga ua mavae.

Ae na taua e Vaetasi e faapea, e le faia e le Fono faaiuga mo le matagaluega o aoga a le malo, ua na o ni lagona lava ma fautuaga, ae taoto atu pea i le matagaluega latou te feutana’i i auala e manuia ma lelei ai le faamoemoe o alo ma fanau a le atunuu.

“Aua le fefefe e fai suiga fou mo le manuia o fanau o le atunuu, tatou te le iloa le lelei o ni suiga fou pe afai tatou te le faia,” o le saunoaga lea a Vaetasi.

Na taua e Vaitinasa i luma o le komiti e faapea, o le fautuaga e pei ona fesiligia i le tasi o le aso mo le faauuga a fanau aoga, o se fautuaga sa tuuina mai i le alii kovana, ona o le manatu e faasao le taimi.

“Ua tele ina mae’a fonotaga a le matagaluega ma puleaoga uma e faatatau i le mataupu lenei, o le aso a taeao (taeao nei) lea ua faamoemoe matou te fono ai ma vaega o PTA a aoga maualuluga taitasi i le atunuu, mo le soalaupuleina lava o lenei mataupu, o lo o i ai fo’i le faamoemoe e faia se fonotaga ma matua faapea ai fanau aoga,” o le saunoaga lea a Vaitinasa.

Na faamanino fo’i e le tamaitai faatonusili o aoga e faapea, tusa lava pe tasi le aso ua faataoto mo lea faamoemoe, e le avea lea ma itu e le aloaia ai le aso faapitoa mo fanau fa’au’u, e ave lava le fa’aaloalo ma le faamuamua i fanau fa’au’u mo le latou aso faapitoa.

O le aso aso Tofi, 13 Fepuari  lea ua faatulaga e toe faia ai le isi iloiloga a le komiti mo lenei mataupu, lea o le a fesiligia ai loa se tulaga e faatatau i finagalo o matua ma fanau e faatatau i le fuafuaga ina ia tasi le aso o le faauuga.