Ads by Google Ads by Google

Tala otooto mai le Fono Faitulafono

FAUTUA  LBJ FAAAUAU TAUTUA PRIMARY CARE CLINIC

 

Ua fautuaina e le afioga i le alii Senatoa ia Mauga Tasi Asuega le Komiti Faafoe a le falema’i o le LBJ faapea ai ma lana Pulega, ina ia faaauau pea le tautua a le vaega o le Primary Care Clinic, e aoga ma taua mo le tautuaina o le atunuu.

 

“O le fautuaga mo le komiti faafoe ma le pulega a le falema’i o le LBJ, e le tatau ona tapunia le tautua a le Primary Card Clinic, e tatau ona outou vaavaai i soifua o tagata o le atunuu, e le taua tele fo’i tupe ae o soifua o le atunuu e sili atu ona taua i lo’u manatu,” o le saunoaga lea a Mauga i le taimi o folafolaga a le Senate i le aso Faraile na te’a nei.

 

Na tula’i le afioga i le alii Senatoa ia Laolagi Fonoti Savali Vaeao ma ia lagolago le finagalo o Mauga e faatatau i le LBJ, ma ia taua ai e faapea, e manaia fo’i ae vaavaai i ai le komiti o le Falema’i/Soifua Malolooina a le maota i lenei mataupu, ona o se mataupu taua tele.

 

E ui o lea ua alo atu le Fono mo lana malologa e lua vaiaso, lea e amata i le aso Lua o le vaiaso nei, peitai na saunoa Laolagi, tusa lava pe malolo galuega a le Fono e le taofia ai komiti mai le faataunuuina o a latou iloiloga, i ni mataupu taua e aoga mo le atunuu.

 

O le mataupu e faatatau i le tapunia o le Primary Care Clinic na alia’e mai i le masina o Tesema o le tausaga na te’a nei, ina ua tusi le ali’i foma’i ia Dr. Iotamo Saleapaga i le Komiti Fa’afoe a le LBJ, ma faailoa i ai lana fautuaga i le tatau lea ona tapuni le Primary Care Clinic, ona o ni isi o mafuaaga e aofia ai tulaga tau tupe.

 

FA’ASEA FAIPULE AUNU’U I LE TAUTUA A LE MARINE PATROL

 

Na fa’aalia le fa’asea o le afioga i le ali’i faipule ia Talaimatai Elisara Su’a i luma o le maota o sui i le vaiaso na te’a nei, fa’asaga i le tautua a le vaega o le Marine Patrol a le Ofisa o Leoleo, ina ua faatautaia sa latou asiasiga masani i ogasami o le motu o Aunu’u i le taimi sese.

 

Saunoa Talaimatai e faapea, e lagolagoina tele e tagata uma o Aunuu le tautua faaauau a le vaega o le Marine Patrol, i le siakiina lea o le saogalemu o femalagaaiga i luga o va’a alia mo le motu o Aunu’u i aso uma, peita’i o le faafitauli na tula’i mai i le vaiaso na te’a nei, ua avea le sese o le taimi o le asiasiga ma itu na tuai ai le to’atele o tagata faigaluega i a latou galuega, e o o fo’i i fanau aoga sa latou misia le pasi aoga.

 

Na taua e le alii faipule le faateia o tagata Aunuu ina ua oso fa’afuase’i atu le asiasiga a le Marine Patrol pe tusa o le itula e 6:00 i le taeao o le aso Faraile na te’a nei.

 

“Pau le lagona faanoanoa o le sese o le taimi na fai ai le asiasiga a le Marine Patrol, e le gata na fai i le taimi o lo o pisi ai tagata e usu i galuega ma aoga, ae sa malu fo’i le tai e le i sou, o le taua o asiasiga nei e tatau ona fai i le taimi e sou ai le sami, ina ia mautinoa ai e leai se faalavelave e tula’i mai i va’a alia o lo o feagai ma le fela’uaina o tagata o le motu mai Aunuu i Auasi,” o le saunoaga a le alii faipule.

 

Na avea le asiasiga lea a le Marine Patrol ma itu na limiti ai le aofa’i o tagata e mafai ona la’u e va’a alia i lea aso, i le ta’ito’a 6 e pei ona faamaonia mai e le alii faipule, ae na taua e se tagatanuu o Aunuu e faapea, e i ai malaga e ova atu i le to’a 10 tagata e la’u e alia, aemaise lava i taimi e lagi lelei ai le tau ma malu le sami.

 

Na taua e le ali’i faipule e faapea, manaia tele le tautua a le Marine Patrol e pei ona i ai le latou asiasiga, a ia faaauau ai fo’i i aso e sou ai le tai ma leaga le tau, ae le o le oo loa i le taimi e mana’omia ai e tagata Aunuu se fesoasoani mo taimi e leaga ai le tau, ae ua fiu e vili le vaega a le Marine Patrol ae fai mai e le mafai ona alu atu se va’a i Aunuu ona o lo o leaga le tau.

 

E le i manuia taumafaiga a le Samoa News i le tau sailiina mai o se finagalo mai le ta’ita’i o le Marine Patrol ia Cpt. Tulele Laolagi e tusa ai o lenei mataupu.

 

PASIA SENATE LISI E LUA A LE ASPA

 

Na fulisia le Senate i le vaiaso na te’a nei e pasia lisi e lua mo le Pulega o le Eletise ma le Suavai (ASPA), e faatino ai ni isi o ana auaunaga ma galuega ua maea ona faataoto.

 

O le lisi e 8.89 eka le tele o lo o faamoemoe e 30 tausaga le umi e toe faaopoopo i ai, ma le lisi e 3.4 eka le tele e 50 tausaga o lo o faamoemoe e toe faaopoopo.

 

O le fanua e 3.4 eka le tele o lo o lisi e le ASPA o lo o fuafua e fausia ai la latou atina’e e taua o le ‘photovaltaic farm’, e pei ona faamaonia e le susuga a Reno Vivao i luma o le komiti a le ASPA/TEO a le Senate, ae o le lisi e 8.89 eka le tele, e le gata o le a fausia ai le nofoaga autu a le ASPA mo ana galuega (Operations Center), ae o le a avea ma nofoaga autu e fausia ai galuega a le ASPA o lo o faatupe mai e le feterale.