TETEE BRIAN LIMA I ONA MOLIAGA

O lo o teena e Muliagatele Brian Lima ia moliaga e fitu faasaga ia te ia, e pei ona molia ai o ia e leoleo. O nei moliaga e aofia ai moliaga e lua o le faaoomanu’a, lua moliaga o le faaoomanua matuia, tasi le moliaga o le umia o se auupega matautia, tasi le moliaga o le lafo o ni upu taufaamata’u, ma le moliaga e tasi o lona faaaogaina o se mea faitino e togi ai le o lo o tagi, le tamaitai sa avea muamua ma ona toalua faaipoipo, o Lemalu Sina Retzlaff.

Ua toe tolopo lenei mataupu i le aso 21 o Aperila e iloilo ai mau i luma o le Faamasinoga Maualuga. E ogaoga manu’a na afaina ai foliga o lea tamaitai i lea feeseeseaiga ma sa tapu’e ona ata ma faasalalauina i luga o nusipepa ma upega tafailagi. I faatalanoaga ma le au tusitala, sa faailoa ai e Lemalu le faafitauli sa feagai ma ia i le la mafutaga ma Muliagatele ao faatasia i laua, ma sa tele ina sauaina ai o ia. Na faaalia e Lemalu ua ia faailoaina ia faafitauli ina ia lagolago ai taumafaiga e tetee atu i sauaga faapea i totonu o aiga, ona e toatele i si tina o lo o sauaina pea e o latou taitoalua i totonu o aiga.

KOMISI MO LE GAGANA SAMOA

O se tasi o tulafono na pasia i le tauaofiaga muamua a le Palemene mo lenei tausaga i le vaiaso na te’a nei ua faasilasila aloaia mai ai le avea o le gagana Samoa ma gagana aloaia o le Malo Tutoatasi o Samoa.

Ua faatonuina ai foi i lea tulafono le faavaeina o se Komisi mo le Gagana Samoa e puipuia ma faasaoina le gagana Samoa i lenei vaitaimi o le tele o suiga ua moomia ai se pulega autu e faatonutonuina le faaaogaina sa’o o le gagana. Mo se faataitaiga, na faaalia e le alii palemia, le susuga Tuilaepa Lupesoliai Sailele Malielegaoi, le upu “gafa” lea ua faaleo ma tusia e nisi tagata o le “nafa.” Na saunoa le minisita o Aoga, le afioga Magele Mauiiliu Magele, o lea tulafono e avea ai le gagana Samoa ma gagana aloaia a le malo ma e leai se isi e mafai ona toe suia lea tulaga.

Na faaalia e le alii palemia, ona o le toatele o tagata Samoa ua aumau nei i Niu Sila, Ausetalia, ma Amerika, e moomia e i latou o lo o aoaoina le gagana Samoa i ia atunuu ni ta’iala i le faaaogaina sa’o o le gagana. Peitai na ia faaalia, e mau eseese tagata i nisi o vaega o le gagana, ae o le faaaogaina o le gagana i le atunuu e mafua atu ai, e tatau ona faaaogaina e ona tagata o lo o aumau i fafo.

FESILIGIA GAIOIGA VAETAMA A LE TOOMAGA

Ua fesiligia e se fomai Ausetalia ua ofo e galue i Samoa (volunteer) ia le aafia o le Toomaga mo e Puapuagatia i le vaetamaina i lalo o le tulafono (adoptions) o pepe i ulugalii mai atunuu i fafo o lo o fia maua ni a latou fanau fai. Fai mai a ia, o lo o fai faalilolilo ia gaioiga ma e tatau ona resitala i lalo o le tulafono so o se faalapotopotoga e aafia i ia ituaiga mataupu. Na tuuaia foi e letamaitai o Dr. Micaela Elphick le tulaga faaletonu o lo o i ai le vaaia ma le tausia o pepe o lo o i lalo o le vaavaaiga a le Toomaga.

Na ia faaalia, o nisi o ia pepe e le suia napekini mo le lua i le tolu aso ma o nisi ua maua i faamai eseese ae le o auina atu i le falemai. Na saunoa Dr. Elphick,o ia tulaga faaletonu ua le tusa ai ma le tele o lipoti i galuega lelei a le Toomaga o lo o faia mo alo ma fanau o le atunuu ua sauaina i o latou aiga ma ua i lalo nei o le latou vaavaaiga.

Na tali le peresetene o le Toomaga, le susuga Lina Chang ma sa ia faamalamalama e faapea, nao le pau le aafiaga o le Toomaga i vaegatama mo ulugalii o lo o fia maua ni a latou fanau fai, o le logo lea o aiga o lo o i ai fanau e fananau mai ona o soligatulafono e pei o le mataifale po o le faiaiga faamalosi, ma logo i ai lea tulaga ina ia maua ai se olaga lelei o ia pepe. Na saunoa Chang, o le Toomaga e le mautu ni ana tupe ma o le tele o taimi e sioti ai sapalai o mea e moomia i le tausiga o le fanau.

ASIASI MAI LE KOMITI A MALO AUFAATASI

O lo o asiasi mai i le atunuu le komiti faapitoa mai le ofisa tutotonu o le Faalapotopotoga o Malo Aufaatasi i Niu Ioka, e asia nofoaga eseese o le a faataunuuina ai le fonotaga faavaomalo a sui o atumotu laiti o le lalolagi lea o le a talimalo ai Samoa i le masina o Setema o le tausaga nei. E le gata i maota o le a faataunuuina ai le fonotaga, ae faapea foi nofoaga o le a faamautu ai sui auai e pe a ma le tolu afe o lea fonotaga faavaomalo.

O le asiasiga lona lua lenei a lea komiti faapitoa a Malo Aufaatasi aua lava le faamautinoa o talafeagai nofoaga o le a faia ai lea fonotaga. O le masina o Aperila o le tausaga na tea nei na malaga muamua mai ai lea komiti. O le aso Gafua na sei mavae atu nei na feiloai atu ai lea aumalaga i le alii palemia, le susuga Tuilaepa Lupesoliai Sailele Malielegaoi. Na saunoa le alii palemia ma ia faamamafa le taua o lenei fonotaga faavaomalo aua le faaleleia o le tamaoaiga o le atunuu, faapea foi le faailoa atu o Samoa ma ana tu faaaloalo ma le tausaafia i tagata o le a auai mai i lea fonotaga. O le aso Toonai nei o le a toe foi ai lea aumalaga.

TALIA PEA LE LIPOTI O LE MAFAUFAU

O lo o talia pea e le Matagaluega o Leoleo ma Falepuipui se lipoti mai le Matagaluega o le Soifua Maloloina e pei ona poloaia ai e le Faamasinoga le tuuina atu o se lipoti faapitoa mai le vaega o gasegase o le mafaufau, mo se alii e 23 tausaga le matua mai Puipaa lea na maliu ai lona tuafafine e valu tausaga le matua ina ua ia asuina i ai se tipoti vai vevela i le amataga o le masina nei. Na faaalia e le sui sooupu o leoleo, le susuga Fauono Talalelei Tapu, o lo o faaauau pea suesuega a leoleo i lenei faalavelave, ae le mafai ona molia se tasi seiloga lava e taunuu atu lea lipoti.

E pei ona lipotia muamua i a tatou tala, na mu se vaega o le tino o lea teineititi ina ua asu i ai e lona tuagane se tipoti vai vevela, ma e lei manuia togafitiga a fofo Samoa sa auina atu i ai o ia, o lea na maliu ai lava o ia mai ona manua. Na faaalia e le aiga o lea teineititi i leoleo e faapea, e le atoatoa le mafaufau o lea alii.

Lilomaiava Andrew Fa’asau, Naenae Productions