Ads by Google Ads by Google

FAGOGO: POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea ua amata ai ona avea Lisati ma lima taumatau a lona aiga i soo se vaega o le atina’e, ua fai fo’i o ia ma fa’ata’ita’iga lelei mo le to’atele o lana tupulaga i totonu o le nuu o Amouta.]

 

O le lua vaiaso talu ona mautu fuafuaga a Lisati ma lana uo o Sita i totonu o Amouta, na toe fo’i ai loa le tamaita’i i Niu Sila ma le faamoemoe o le a tapena mai ma lona aiga mo le la aso fiafia lea o le a faia i totonu o Amouta, o le ulua’i faaipoipoga fo’i lea ua faia i totonu o le nuu. Na avea le faatupu vevesi o Lasela ma le uso Tomboy a lona tina i totonu o le nuu, aemaise ai ua faalua ona la fasia le tina o Lisati, o le to’alua o se tasi o matai tulafale i totonu o le nuu ma itu na talo ai loa le fono tele a le nuu e talanoaina ai faafitauli o lo o aliali mai i totonu o le nuu, ma tu tootoo ai loa le nuu, ia ta le 4:00 i le afiafi o le aso Toona’i lea na fono ai le nuu ua tula’i ese le aiga o Lasela ma totonu o le nuu,

 

E lele Lisa i Niu Sila e le i maua se faaiuga i le fono a le nuu sa fai, ae na te’i ina ua taunuu ae vili atu Lisati, ua faatonu e le nuu le aiga o Lasela e o ese uma ma le nuu, afai e leai lona uiga o le a mu le foaga. “O le a lena mea o le foaga,?” o le fesili fiamalamalama lea a Lisa i le faamatalaga a Lisati lea ua fai atu, ae na ata le tama ma toe tali atu i ai, “o le foaga o le nofoa lea e nofo ai le tagata.” O le itula e 11:00 i le taeao ina ua maea le fono a le nuu sa fai, na aga’i atu ai loa tulafale e momoli le faaiuga i le aiga o Lasela.

 

Na faateia le aiga o Lasela a’o pisi i feau masani o le aso ae vaaia loa matai o le nuu ua savavali atu ma laulaututu atu i luma o le latou fale talimalo. “Papa, vaai fo’i i makai o le guu ga le ua o mai, pei lava e i ai se mea ua kupu,” o le valaau ane lea a Lasela i lona tama, le tamaloa ma’i o Sami lea o lo o taoto i lona moega e le mafai ona savali i ona vae, ae o lana fanau o lo o pisi solo i fafo i le latou galuega o le fale o lo o faia. O le tamaloa o Sami, o le isi lea tamalii o le nuu, ae talu lava ona ma’i e le i toe oo atu lava i ni fono a le nuu, sei vagana ai mea mataga o lo o faia e lana fanau ma lona aiga i totonu o le nuu, e aofia ai la ma le fasiga o le tina o Lisati, o le to’alua lea o le isi matai tulafale faiupu o le nuu. E faasa i tulafono a le nuu ona fasi e se taulealea se matai, e o o foi i taitoalua o matai o le nuu, e faasa ona fasi e fafine e le ni matai a latou taitoalua.

 

“O le aso lea ua kasi ai le faafikiga o aleaga i le paia o le kakou guu, lau afioga Sami, ua kasi le kofa i le mamalu o le guu, o le a faakula’i ese lo oukou aiga akoa mai kokogu o le guu, oga ua kele mea makaga ua faia e lau fagau, ua le kasi ae ua aku lasi, ma ua faia ai le faaiuga, ia ka age le ikula e 4:00 i le afiafi gei ua oukou kula’i ese ma le guu, afai e leai, o le a mu le foaga.”