E sui a le faiga ae tumau faavae, pei o upu o toeaiina e pei lava o le tausaga fou, e oo mai le isi tausaga fou ua tiga foi finagalo ma fofoga i vaai i le tausaga tuai ia.

Ia ae o le a le mea e ta'u mai o le tausaga tuai ?, o le tausaga ua leva, ua uma le sefulu lua masina, ona toe amata foi ona tau mai ia Ianuari e oo ia Tesema, ona fai foi lea o le isi Ianuari e oo foi i le isi Tesema, e oo mai lava le maliu ia i tatou o fai pea lava le suiga o tausaga.

E pei ona fai mai ai (Filipi 3:12-13) "E le peiseai ua maua nei, po ua ou atoatoa ona lelei nei, a ou te tausisi atu pea pe mafai ona ou maua o le mea na maua a'u e Keriso Iesu. Le au uso e, ou te le manatu ua ou maua, a o le mea e tasi ou te faia, ou te faalagolago i mea ua tuana'i, ou te momo'e punou a'i foi i mea o le lumana'i, ou te tausisi atu i le faailloga, ia maua ai le taui na valauliaina ai a'u mai luga e le Atua ia Keriso Iesu."

O le a lava lau mea e fai e tumau pea uiga leaga sa faia, e sa'o ai le alagaupu faa-samoa, 'E sao ae le a'o.' e ui lava ina tatou ui i le ala sa'o ae tumau pea lava e tatou sese na fai i aso la ua te'a ua tuana'i, le mea lena e aoga le tuana'i e faasaosao ai le lumana'i, ae le galo i isi tagata.

(2) E le tatau ia tatou ona faa-pologa o tatou olaga mai aso ua te'a. E moni ma faamaoni lea pei ona fai mai ai Paulo, "Vaai, na tuu i latou i le falepuipui na ou auai i le tagata valeina o tagata kerisiano na saisai atu. Ae sa leai sou faamoemoe ia te a'u, e faaaogaina a'u e le Iesu."

Le tagata ua faatoa maua lea o le mea sa'o e galuea ai, e pei lava o le 'toy' a tamaiti foi lea e faataavili ona tuu lea i lalo ma alu loa lea, pei a Paulo, le sese o le mea na galue muamua ai, ia aua o ia o se tama faapitoa lava a le 'au Farasaio, e le gata i le atamai i tulafono toe atamai i aoaoga faa-farasaio e sili lava ia i ana tupulaga.

Lea ua sa'o le mea e faaaoga ai lona malosi ma le fefe i ta'uta'u atu le suafa o le Iesu Keriso

(3) Ua le iloa poo le a mea e i'u i ai, ao o le tagata ua ola i se olaga lelei. E le taimi na matua ai Paulo ma na falepuipui i Roma, e lei fefe pe popole i se faasalaga e 'au mai te ia i le Malo o Roma, ua ritaea ma ua faamalolo mai i lona talaiga o le Suafa o Iesu le Mesia.

E sefulu manu tupu tausaga o talai pea le Suafa o Iesu, ae la e naunau lava i talaiga ma lona fia silafia o mea tau Iesu, le tagata ua na'o lona Alii Faaola lona olaga fou lea ua i ai.

(4) E alu pea ma le talitonu i lana mea lea fai, e leai ma se solomuli mai ai. Ua talitonu Paulo i lona Faaola, ua leai se isi mea i le mafaufau o Paulo, ua na o le lona Alii e alu punoua'i ma le olioli, e le toe vaai i ona leaga ae ua vaai i le ala Moni ma ala sa'o.

E le o lava na galuega a le Alii, e manoa Paulo ia sili atu ona aumai nisi feau a le Alii e mate faia mo lana Alii.

(5) E taunuu i le mea e lelei. E lei faataga fai le galuega a le Alii e Paulo, na fai ona ua ia iloaina e taunuu i le mea e silisili ona lelei, o le Ola lea e Faavavau. O tagata o le lalolagi lenei, e manatu lava i le galue, galue ma le galue e oo lava i sina mea laitiiti e taumafai lava e fai ina ia maea ma lelei, ona e maua le taui.

O le tele o i tatou o manao e le taui pei o le tupe, mea a'i ma isi mea e maua mai i lou galuega lea na faia ma le isi, a'e le manoa a le tagata Kerisiano lea ua uma ona faataatia mai e Paulo le Ola e le Faatuatua o i le Lagi lona totogi, o le Ola e Faavavau.

E le galue le Kerisiano ma le totogi o ana galuega i le totogi o lenei lalolagi, e le galue le tagata Kerisiano ma le tausaga fou, e le galue le tagata Kerisiano ma Ia lava, e tausaga fou tausaga uma i le tagata Kerisiano e oo i le faavavau.

E le faatalitali le tagata Kerisiano seia sui mai le tausaga fou, o le tausaga fou ia, ua na o ni fuainumera e iloa ai ua sui le tausaga, e faamaumauga a le lalolagi e tala faasolopito e iloa ai lea tausaga ma le tausaga.

"O le tagata fou a'u ina ua iloa le mea e tatau ona faia i lou olaga tuai na ou i ai."

O le tagata Kerisiano e tutusa uma aso, masina ma le tausaga ia te ia, pei ona fai mai Paulo, "Oute savali punoi ai e fai le feau a lou Alii o Iesu Keriso ma lou loto atoatoa."

Ia manuia le tausaga fou, ma ia maua e Tutuila ma Manu'a ni Aso Fiafia ma le Manuia. Amene.