E le o toe umi se taimi ae taofia loa le toe tuuina atu o pepa taumafa (food voucher) mo tagata matutua uma i Amerika Samoa, ae o le a sui tulaga i le tuuina atu o taumafa vela (hot meals), e pei ona faamaonia mai e le Faatonusili o le TAOA i le Samoa News, le tofa Ale Tifimalae i le taeao ananafi.

“O lea fuafuaga ua faia ina ia usitaia ai fautuaga o lo o tuuina mai e le Ofisa a le malo tele o lo o auala mai ai le alagatupe o lo o faatupe ai polokalame mo tagata matutua i Amerika Samoa nei,” o se saunoaga lea a le alii faatonu.

E ui e le i amataina lea suiga ae na faamanino e le alii faatonusili e faapea, o se tasi o mafuaaga autu ua manatu ai e faatinoina lea tautua, ina ia mulimulita’i ai i ta’iala o lo o tuuina mai e le ofisa o le malo tele o lo o faatupeina le polokalame mo tagata matutua, e pei o le maua lea e tagata matutua o taumafa lelei ma le paleni mo lo latou soifua maloloina.

Na taua e Ale i le Samoa News e faapea, toe lava o Amerika Samoa le teritori o le Iunaite Setete o lo o faaauau pea ona latou tufaina atu pepa meaai i tagata matutua, ae o setete uma ma teritori a le malo tele, ua leva ona amata ai le polokalame o taumafa vela mo tagata matutua, i lalo lava o le polokalame o lo o faatupe mai e le malo tele.

“O le isi lea mafuaaga o le faamoemoe lenei, ona ua tauau ina tula’i mai ai ma tulaga faaletonu i alagatupe o lo o aumai e faatupe ai le polokalame a tagata matutua (high risk), ona e le o usitaia le fautuaga e tufatufaina atu taumafavela mo tagata matutua ae taofi le toe tuuina atu o pepa taumafa,” o le saunoaga lea a Ale.

O se taimi o le masina nei lea ua faamoemoe e faia ai fonotaga faalaua’itele a le Ofisa o le TAOA i vaega eseese o le atunuu, mo le faalauiloaina o lenei suiga i tagata matutua uma o le atunuu.

O le fuafuaga o lo o i ai, o le a talosagaina le Matagaluega o Aoga a le malo mo se avanoa e faaaoga ai fale taalo a aoga maualuluga e fai ma nofoaga autu o fonotaga nei, ina ia mafai ai ona faamanino i tagata matutua le suiga o le a faia, atoa ai ma le fia maua mai o so latou finagalo e tusa ai o lenei suiga.

Saunoa Ale e faapea, o lo o i ai le fuafuaga o se taimi i le masina o Aperila po o Me ua faamoemoe e amata ai loa le suiga lenei, i le taofia lea o le toe tufatufaina atu o pepa taumafa ae o le a tufatufaina atu taumafa vela mo tagata matutua.

O le a faapea foi ona talosagaina Ekalesia mo le latou fesoasoani, e ala i le faaaogaina o a latou Hall e fai ma nofoaga autu e tufatufa atu ai taumafa nei i tagata matutua i le itu i Sasa’e, Sisifo faapea ai ma le taulaga, ina ia faafaigofie ai ona maua e tagata matutua le avanoa e mafuta faatasi ai ma tausami a latou taumafataga.

E pei ona silafia, mai le tele o tausaga ua mavae, sa na o le ta’i $25 le maualuga o le pepa taumafa sa maua e tama ma tina matutua, e ui sa i ai ni nai suiga i ni isi o taimi, peitai o ia suiga e le i tumau, ae i le faaiuga o le tausaga na te’a nei, na suia ai loa le aofa’i o pepa taumafa mo tagata matutua mai le $25 i le $40 e pei ona i ai nei, ina ua maua mai se fesoasoani mai le afioga i le kovana sili ia Lolo Matalasi Moliga ma le faigamalo, e fesoasoani ai i le poloakalame a nai tagata matutua.

Na faamanino atili e Ale e faapea, o le agaga o suiga e pei ona fuafuaina, e le o se taumafaiga ina ia taofi le tuuina atu o pepa taumafa i tama ma tina, ae o ni isi nei o auala o lo o faagaioi ai le polokalame i fafo, lea fo’i ua fautuaina Amerika Samoa e tatau ona mulimulita’i i ai.

“Afai ae o o atu i le taimi e amata ai suiga i le polokalame e pei ona fuafuaina e le Ofisa, o le maua ai fo’i ma le avanoa i pisinisi tua e pei o fale’aiga i le atunuu, latou te kukaina ai taumafa ma tauaao atu i nofoaga o le a faamoemoe e tufatufaina ai mo tagata matutua, ina ia mafai ai fo’i ona maua e fale’aiga se vaega tupe mai le polokalame e fesoasoani ai i le atina’eina o le latou tautua i le atunuu,” o le saunoaga lea a Ale.

O le ‘menu’ lea ua faamoemoe e tufatufaina atu i tagata matutua, o le ituaiga ‘menu’ lea o lo o maua e tagata matutua o lo o alala i San Francisco, le nofoaga autu o le Ofisa o tagata matutua lea o lo o sapalai mai ai le vaega tupe e faatupe ai le polokalame.

Na taua e Tafia Taimalelagi o se sui sinia o le Ofisa o le TAOA i le Samoa News e faapea, o se tasi o itu lelei i le suiga lea ua fuafua e faia i le polokalame, o le a agavaa ai soo se tagata matua ua atoa le 60 tausaga, ae o le a le toe faapitoa mo na o i latou e agavaa i lalo o le poloakalame o food voucher.

“Mo se faataitaiga, afai loa ae amata le suiga fou lenei, soo se tagata matua lava e alala i Amerika Samoa ua atoa lona 60 tausaga, o le a agavaa lena tagata matua i lalo o le polokalame, e ala lea i le lesitala o lona suafa, ma afai o se tagata mai fafo, e tatau ona i ai sona I.D mai le Ofisa o Femalagaaiga ina ia faamaonia ai lona aumau ai i le teritori,” o se saunoaga lea a Taimalelagi.

I le polokalame o le food voucher o lo o faaauau pea i le taimi nei, e le o tagata uma mai fafo e agavaa i le polokalame lea, sei vagana ai i latou ua i ai piitaga i Amerika Samoa, e pei o le ‘one parent’, o le tagata ua faaipoipo atu i se tagatanuu o Amerika Samoa, faapea ai ma le tagata ua nofomau.

O le taimi nei, ua tusa ma le to’a 3,700 le aofa’i o tagata matutua o lo o lesitalaina i polokalame eseese a le ofisa o le TAOA, lea e aofia ai ma le polokalame o le food voucher, ae i ai le talitonuga afai ae amata aloaia le suiga fou e pei ona fuafuaina, o le a faaopoopo le aofa’i o tagata matutua e agavaa i le polokalame, ona o lea o le a tatala mo soo se tagata matua ua aloaia lona aumau i le teritori.