POPOLEGA I AGA’I FAIAOGA I AMERIKA SAMOA

O le asiasi mai o sui o le Matagaluega o Aoga a Amerika Samoa e tau sailia ni faiaoga e galulue i le Teritori ua faapopoleina ai le Matagaluega o Aoga, Taaloga ma Aganuu ona o le utiuti foi o faiaoga i Samoa nei aemaise lava faiaoga o mataupu faasaienisi.

“Ana faapea o lea e tele ni a tatou faiaoga, semanu o se tasi lea o avanoa e mafai ona filifili ai faiaoga e maua ai ni o latou manuia,” o le saunoaga lea a le minisita o Aoga, le afioga Magele Mauiiliu Magele i taualumaga a le Palemene i le vaiaso nei. “Ao le tulaga lea e i ai, ua utiuti foi a tatou faiaoga aemaise lava i mataupu faasaienisi.” Fai mai a ia, o lenei faafitauli o lo o maua i le lua vae tolu o atunuu o le lalolagi.

Na ia faaalia, o fuafuaga a le malo e tuutuu atu i tua Itula aoga mai le iva i le taeao i le 4 I le afiafi, o le a atili moomia ai ni faiaoga. O le vaiaso nei na asiasi mai ai le aumalaga mai Amerika Samoa na taitai mai e le Faatonusili o Aoga ma e pe a ma le to’a 30 faiaoga na auai atu i faatalatalanoaga sa faatautaia i le faletalimalo o le Insel Ferhman.

FAASA LE AU TUSITALA

Ua faasaina le au tusitala ma le au faasalalau mai le lipotiina o se faamasinoga i le Faamasinoga Maualuga. Na faalauiloa mai lea tulaga ina ua maea se feiloaiga i le va o le Faamasino ma loia o itu e lua i lenei mataupu. Na faaalia, sa tuuina atu se talosaga ina ia faasaina le au tusitala ma le au faasalalau e le loia a le itu tetee, le susuga Leitaua Daryl Clarke. Na faailoa mai i le au tusitala lea faaiuga a le Faamasinoga e le loia a le malo, le susuga Leone Su’a.

Na fesiligia Su’a pe aisea ua ese ai le faatautaia o lea faamasinoga ma na ia faaalia, o le a fesootai mai le Loia Sili e faamalamalama le mafuaaga ua faia ai lea faaiuga. O lea faamasinoga o le a tulai ai le tamaitai talavou o Leslie Kolhase e tali i le moliaga o le fasioti tagata pa’ivalea, ona o le faalavelave lea na maliliu ni alii talavou se toalua ina ua lavea le taavale sa ia uliina.

SAUNIA  FAIAOGA MO LE TOOMAGA

Ua tali atu le malo i talosaga a le Toomaga mo e Puapuagatia mo ni faiaoga e fesoasoani i le aoaoina o alo ma fanau o lo o i lalo o le vaavaaiga a le Toomaga. Na faafetaia e le peresetene o le Toomaga, le susuga Lina Chang, le malo i le talia o le latou talosaga aua le aotauina o alo ma fanau o lo o nonofo nei i le latou apitaga i Tuanaimato.

Fai mai a ia, o se tasi lenei tulaga sa taumafai i ai le Toomaga ina ia mafai ai ona maua e alo ma fanau o lo o i lalo o le latou vaavaaiga ia aoaoga e pei lava o isi alo ma fanau o lo o aotauina i aoga a le malo ma ekalesia. Na ia faamamafa, o nei fanau ua le fia o i aoga a le malo ma ekalesia ona o aafiaga sa latou aafia ai i o latou aiga, ma e faaeteete foi le Toomaga i le tuuina atu i tua o ia tamaiti ona o popolega i le ulagia ma le sauaina o i latou ona o sauaga sa latou aafia ai.

FOAI  NOFOA FAATAAVALE

E 16 nofoa faataavale (wheelchairs) na fai meaalofa ai se alii e le atoatoa le malosi o lona tino i faalapotopotoga eseese i totonu o le atunuu. O le alii o Jordan Milroy e maua i le gasegase o le cerebral palsy ma e aafia ai savali ma lana tautala. Peitai e ui i ia faafitauli, sa finau malosi lea alii e saili se seleni e fesoasoani ai e le gata ia te ia, ae faapea foi isi tagata o le atunuu o lo o aafia i gasegase e moomia ai nofoa faataavale e feafioa’i ai.

O le tausaga na tea nei na faia ai se sailiga seleni a lea alii i Niu Sila. O lana anava tauave, “o le mea i ai le loto, e mafai ona faataunuu”. O nofoa faataavale e 16 na maua mai i ana sailiga seleni ma ana talosaga i faalapotopotoga i atunuu i fafo ma sa maua mai ai ia nofoa faataavale mai Vietnam.

FAAVAE SITEKI FOU EKALESIA MAMONA

Ua faamavae atu le Siteki a Upolu Samoa i Sisifo a le Ekalesia a Iesu Keriso o le Au Paia o Aso e Gata Ai, i ana uarota e tolu ia o le a agai atu e faavaeina se siteki fou a le ekalesia i lea foi itu o le atunuu. O uarota a Satapuala, Vailuutai ma Fasitoo-tai ia ua vavae mai le Siteki a Upolu Samoa i Sisifo mo le faavaeina o se siteki fou.

E iva uarota sa aofia ai i le Siteki a Upolu Samoa i Sisifo ma o le aso Tofi na sei mavae atu nei na faagasolo ai se fiafia tele e faamavae atu ai i uarota o le a vavae ese.  

Saunia: Lilomaiava Andrew Fa’asau, Naenae Productions