Ads by Google Ads by Google

Manatu faalia: “E le malosi le tulafono, a’o le tagata e fa’amalosia le tulafono!”

“E muamua ona fa’afetaia le tulaga ua alia’i mai e fesiligia ai le taofiofi o le fa’ateleina o tagata Asia e ulufale mai ma nonofo mau i lo tatou atunu’u, pe faipisinisi, pe galulue fo’i i pisinisi a isi tatou uso mai Asia,” o le manatu fa’asoa lea a le tina o Pamata Letuligasenoa Malae o Iliili.

 

“E moni le tala, e ao ina mataituina lelei e le Ofisa o Femalaga’iga ae maise le Komiti Fa’afoe o  Femalaga’iga a le Malo le usita’ia o tulafono o aiaia ai le ulufale mai o tagata Asia, nonofo mau ma fa’atautaia latou pisinisi, ae uma toe fa’aulufale mai ma o latou aiga mai latou atunu’u e faigaluega i a latou pisinisi, ae le toe maua ai e tatou tagata le aiaiga ole feagaiga na ala ai ona fa’atu a latou pisinisi; Ia maua ni avanoa faigaluega mo tagata o lo’o nonofo tumau fa’apea ma tagata nu’u o Amerika Samoa.” O nisi ia o manatu o le tina.

 

Na faamanino i le Samoa News e le afioga i le alii Senatoa ia Tuiasina S. Esera, o ia fo’i o le sui taitaifono o le Komiti o Femalagaaiga a le malo o Amerika Samoa e faapea, o le mataupu o lo o ia taumafai malosi ai e faatatau i le tau taofiofi lea o le soona ulufale mai o tagata mai Asia i le atunuu, e le o se taumafai e faailoa lanu e pei o le manatu o nisi, ae o lona vaai alofa i le lumana’i o alo ma fanau a le atunuu mo a taeao. “Ou te le faailoga lanu Amerika Samoa,” o le saunoaga lea a Tuiasina i le Samoa News i le amataga o le masina lenei.  “Pau lo’u agaga o lo o i ai, ia puipui le tulafono tau femalagaaiga a le malo, ma ia mautinoa e leai se tagata mai fafo e manatu mama i le tulafono a le malo o Amerika Samoa.”

 

Ae na taua e Malae faapea, o le tala moni e le o fa’ailoga lanu le manatu o Tuiasina, “O lo’o aputiputi se avanoa lelei, e taofiofi ai le so’ona tatala o avanoa tetele i tagatanu’u o Asia e fa’atutu ai pisinisi, ma latou toe avea atoa ai le tamaoaiga o le tatou atunu’u i lo latou fo’i malo. O lea ua fasi lua i tatou, e tele mea o le fa’atu o pisinisi, va’ava’aivale i o tatou tagata o faigaluega i a latou pisinisi e avea ma ala e latou te toe aumaia ai latou tagatanu’u e faigaluega i o latou pisinisi ma nonofo ai lava i totonu o nei faleoloa.”

 

Sa ia taua foi fa’apea, afai ua sitiseni se Saina po’o le Korea i Amerika, e matua le mafai e Amerika Samoa ona taofiofia tagata e fia fa’aulufale mai i le tatou teritori.

 

“Ou te toe fa’amanatu se tasi o iloiloga a le Maota Faitulafono na tali ai e le Korea sa fa’afesiligia, pe aisea na te aumaia ai nisi o ona tagatanu’u i le tatou malo, ae tali mai, ‘O le a sa outou fe’au i le pisinisi a a’u, aua o a’u o le tagata Sitiseni Amerika?’ O ituaiga tali nei e soso’o ma le toe fa’aleo mai fo’i ia i tatou, e le o toe mamao,” o le saunoaga lea a Malae.

 

“O le taofiofia o le so’ona ulufale mai o nisi tagata Asia e toe faigaluega i’inei, ua tatau ona taofiofia i se isi tulafono tau fa’aulu, ae ua tatau fo’i ona su’esu’e atoa le aofa’i o tagatanu’u Asia ua i ai i le tatou malo, e aunoa ma ni pepa nofo mau.”

 

“Ia toe sasa’a le fafao i o tatou taofi, ua mafua nei mea uma, ua i ai talavou Amerika Samoa ua latou talosagaina pepa o tagata Asia, ae leai se so’ototo o i ai i lea feagaiga, ae o le fesili, o fa’apefea ona e taofiofia lou malosi’aga o le lua feagaiga fa’apisinisi pe afai e le’i i ai sau vaega tupe na toina mo le amataga o le lua pisinisi?”

 

“Taga’i toto’a i au feagaiga fa’apisinisi po’o matele ia te oe le malosi’aga, po’o tele lava le sui mai Asia i mea uma, soso’o ma le tele o ana tupe, malaga i Amerika fai ai talosaga o lana sitiseni, emo ane le ata, ua e le toe gafatia taofiofi lea malosi’aga sa amata mai ai le feagaiga.”

 

“Ou te fa’afetai i le afioga le Kovana Sili ma le polokalama ua fa’ailo nei [Immigration Amnesty], atonu o se tasi lea o ala, e mafai ai ona iloa patino nai tagata o nonofo lava i aiga, fai fe’au ma tautua, ae le’i fa’amama lo latou alaala ai i’inei. O se mea tatau ua tapena nei e le faigamalo, ma o se ala alofa lea ua tatou faia e amata mea i se amataga fou, ae a mae’a lea, ona iloa patino ai lea o le aofa’iga o i latou ua alaala i le tatou malo ma fuafua tatau i ai polokalama fa’atautaia mo le tausiga o tagata i lenei atunu’u.”

 

“Manatua, o numera e le pepelo, ae o numera fo’i, o se ala lea i fuafuaga tonu ai le tamaoaiga e tausia ai le atunu’u ma e o nonofo ai, o lea mau e ala ina tausisia e le Ofisa o Femalaga’iga ma le Ofisa o Fuainumera Fa’amaumau [Statistics]. E tatau lava ona mautu i Komipiuta a le ofisa o Femalaga’iga nei mea uma!”

 

“E leai se vaipanoa e le’i va’ai toto’a i ai le Fono Faitulafono i ona tulafono tamau e aiaia ai le nonofo o uso mai fafo i le tatou atunu’u, ae gata le malosi o le tulafono, pe afai o le sui e fa’amalosia le tulafono, ua ia le usita’ia lona tiute fai e fa’amalosia ai le tulafono, o lo’o ua tofia o ia e fa’amalosi, i lona malosi’aga e tatau ai,” o le tala faa’iu lea a le tina ia Malae.