VENTILATE MOTULIKI

O le tina lea na tuuaia i lona umia faasolitulafono o se vaega o le pauta faasaina o le aisa, ua ia ta’utino i le faamasinoga maualuga, e sa’o tu’uaiga faasaga ia te ia.

O le aso Faraile na te’a nei na talia ai e le faamasinoga maualuga se maliliega na sainia e Ventilate Motuliki, 55 tausaga le matua o lona soifua,  ma le malo lea e pei ona toe teuteu ai e le malo le mamafa o le moliaga na latou ulua’i molia ai le ua molia, ina ia faailoa ai le solitulafono feololo o le umia faasolitulafono lea o se vaega o le pauta o le aisa.

I le tali ioe ai o Motuliki i le solitulafono lea ua toe teuteu e le malo, sa ia tautino ai i luma o le faamasinoga e faapea, i se taimi o le aso 6 Mati, 2013 i Amerika Samoa, sa ia umia faasolitulafono ai vaega o le pauta faasaina o le aisa e aunoa ma se faatanaga faaletulafono.

Na tautino Motuliki e faapea, i le aso e pei ona taua, na alu ai i le Falemeli i Fagatogo e piki mai se afifi sa aumai i lona igoa. Na tautino le ua molia, sa ia iloaina lelei lava, o le afifi lea na alu e piki mai o lo o i ai vaega o le pauta faasaina o le aisa, ma sa ia faamoemoe a uma ona ia kiliva le afifi i se tasi tagata, ona maua lea o lona totogi e $500 mo le pikiina ma le kilivaina o le afifi lea.

Na ioe Motuliki, e 11 tama’i taga pepa iila sa i totonu o le afifi lea, ma o ia tama’i pepa o lo o i ai vaega o le pauta o le aisa.

O lo o taofia pea Motuliki i le toese e faatali ai le aso 14 Fepuari lea ua faatulaga e lau ai lona faasalaga.

PATI JR JENNINGS

O le ali’i talavou lea na auai ma ni isi ali’i i le osofaia o le fale a se ulugali’i matutua na tuufua, a’o malaga le ulugali’i i fafo mo le la talavai, ua toe tolopo le lauina o lona fa’asalaga i luma o le fa’amasinoga maualuga i le aso Faraile nei, ona e tele isi faamaumauga o lo o finagalo le fa’amasino sili e tatau ona silafia e le fa’amasinoga, a’o le i tuuina atu se faasalaga faasaga i lenei ali’i.

Saunoa le faamasino sili ia Michael Kruse i le aso Faraile na te’a nei ina ua valaau le mataupu a Pati Jr Jennings, o se tasi lenei o mataupu e pito sili ona faamomoi loto i lona lava manatu fa’a ali’i fa’amasino, ona o le matutua tele o le ulugali’i na aafia i lenei mataupu, atoa ai ma le tele o la meatotino sa aveesea.

Fai mai Kruse, e tutusa lelei lava mataupu e aafia ai fanau laiti ma le mataupu lea ua aafia ai le ulugali’i matutua lea, i le silasila a le fa’amasinoga, o le mafuaaga lea e pito sili ai ona matuia lenei mataupu i le silasila a le fa’amasinoga.

Na fautuaina e Kruse loia a le malo atoa ai ma le Ofisa Nofovaavaaia, ina ia taofi le taula’i o le latou vaai i le lumana’i o le ali’i talavou ia Jennings, ae tatau ona taula’i muamua la latou vaai i le ulugali’i matutua na aafia, po o a la mea totino na gaoia e le i mafai ona toe maua, fia iloa po o fea ua ave i ai isi la meatotino na gaoia, ae o le a fo’i le tulaga ua o o i ai mataupu a isi ali’i na molia faatasi ma Jennings i lenei mataupu.

Na fautua fo’i Kruse, afai e mana’omia e le Ofisa Nofovaavaaia ni isi faamatalaga faaopoopo e faatatau i le mea atoa sa tupu, ae po o fea fo’i ua ave i ai isi oloa sa gaoia, e manaia fo’i ae fesiligia le ua molia mo sana fesoasoani, mo le tuuina atu o ni isi faamatalaga faaopoopo e uiga i lenei mataupu.

Ina ua valaau le mataupu a Jennings, na faatoese le ua molia e tusa ai o lana solitulafono sa fai, ma ia talosagaina ai le faamasinoga mo se avanoa se’i toe fo’i atu ai i lona aiga, e faauma lana aoga ma faamautu lana moemitiga o lo o i ai, o le fia ulufale lea i vaega au a le malo tele.

Na taua fo’i e le ua molia e faapea, o masina e 7 lea na taofia ai o ia i le toese, sa ia aoaoina mai ai le tele o lesona taua mo lona olaga i le lumana’i, ae ina ua tula’i lona tama mo lana molimau i luma o le faamasinoga, sa ia taua ai lona fiafia tele ina ua taofia lona atalii mo le 7 masina, ua mafai ai ona ia a’oa’oina se isi lesona taua mo lona olaga.

Na taua e le tama e faapea, o le faalavelave na tula’i mai ina ua ave lona atalii ma tuu i se tasi o latou aiga i Mapusaga, ae malaga i Hawaii mo le 2 masina, ae talu mai le la mafutaga ma lona atali’i mo le 17 tausaga, o se taimi muamua lenei ua aafia ai o ia i se solitulafono faapenei.

Na tutu faatasi le loia a Pati Jr ia Michael White ma le loia a le malo ia Camille Phillippe ina ia faanofovaavaaia le ua molia, ae ua lava masina e 7 lea na taofia ai o ia e fai ma ana faasalaga i lenei mataupu. O lo o taofia pea Pati Jr i le toese.