Ads by Google Ads by Google

FALEPUIPUI LE ALI’I NA IA SASA ULU LONA USO SAMALA

O le ali’i mai Pago Pago lea na ia sasa le ulu o lona uso matua i le samala, e mafua mai i se feeseeseaiga na tula’i mai i lo la va i le tausaga na te’a nei, ua faasala e le fa’amasinoga maualuga e taofia i le toese i Tafuna mo le 6 masina, o se tasi lea o tuutuuga o lana nofovaavavaia e 3 tausaga.

 

A’o le i tuuina atu e le fa’amasinoga maualuga lana faasalaga fa’asaga i le alii o Dicklah Te’o i le taeao ananafi, na muamua faafofoga le fa’amasinoga i faafinauga a loia mo se faasalaga mama mo le ua molia, atoa ai ma le faatoesega a le ua molia.

 

Na faatoese Te’o i le faamasinoga faapea ai lona uso matua na aafia e tusa ai o le faalavelave na tula’i mai i lo la va, lea ua mafua ai ona ta’usala o ia e le fa’amasinoga i le moliaga mamafa o le fa’aoolima i le tulaga lua.

 

Sa ia faatoese fo’i i lona tina ma le aiga atoa e tusa ai o le faalavelave na tula’i mai i le va o ia ma lona uso.

 

Ina ua maua le avanoa e molimau ai le uso matua o le alii ua molia i luma o le faamasinoga, sa ia talosagaina ai le faamasinoga ina ia aua ne’i tu’uina atu se fa’asalaga faafalepuipui mo lona uso.

 

Na taua e le alii na aafia e faapea, talu ai sa i ai fo’i lana vaega sa faia na mafua ai ona tula’i mai le faalavelave i le va o ia ma lona uso, o lea e tatau ai ona ia faatoese fo’i i lona uso e tusa ai o le mea sa tupu.

 

Na tutu faatasi le loia fautua a Te’o ia Karen Shelly faapea ai ma le loia a le malo ia Camille Phillippe e finau i le fa’amasinoga, ina ia nofovaavaaia le ua molia ae aua ne’i tu’uina atu i le falepuipui.

 

Sa laua finauina fo’i le tatau lea ona auai Te’o i ni aoaoga faa faufautua e fesoasoani ai i le tulaga o le tagofia o le ava malosi aemaise ai o le loto ita.

 

Saunoa le ali faamasino sili ia Michael Kruse e faapea, e ui ua maea ona latou iloilo ma ona uso faamasino lagolago faafinauga a loia, talosaga a le ua molia ma lona uso, faapea ai le ripoti sa saunia e le Ofisa Nofovaavaaia e uiga i lenei mataupu, peita’i o le itu e le o mafai e lo latou mafaufau ona fa’amatala, pe faapefea ona tupu se mea faapenei i le va o se au uso, o le ta e le isi le ulu o le isi i le samala.

 

Saunoa fo’i Kruse, tusa lava fo’i pe faapea sa aafia i le tiapolo i le vevesi na tula’i mai i le va o le au uso lenei, sa le tatau lava ona tupu se mea faapea.

 

Na faamatala e le faamasinoga le gaioia a Te’o na fai i lona uso, o se gaioiga e fai lava si matuia, ona sa faaaoga i ai se a’upega mata’utia po o le samala.

 

E foliga mai i le silasila a le faamasinoga, o le tele o mataupu faapenei e aafia ai tulaga tau faaoolima, e tuuaia ai lava le tiapolo pe afai sa ‘ona se tasi i le taimi na tupu ai se faalavelave.

 

E 3 tausaga i le falepuipui ma le salatupe e $1,000 na manatu le faamasinoga e faasala ai Te’o, peita’i ua faamalumalu lona tuliina o le 3 tausaga i le toese, ae o le a nofovaavaaia ai o ia i lalo o poloaiga a le faamasinoga.

 

O ni isi o ia poloaiga e aofia ai lona tuliina o le 6 masina i le toese, ma totogi le salatupe e $1,000.

 

O le a mafai fo’i ona tatala o ia i tua e alu e faigaluega, i le aso Gafua e o o atu i le aso Faraile, mai le 6:00 i le taeao e o o atu i le 6:00 i le afiafi.

 

Ua poloaina fo’i o ia e auai i aoaoga e fesoasoani ai i aafiaga o le ava ma le tulaga o le ita, ma ia aua ne’i ona toe soliina se tulafono a le malo.