O le vaega o A’oa’oga Tau Fa’amalositino [Physical Education] a le Matagaluega o A’oga, ua matua fa’atamo’ea lava le la’ua polokalama mo a’oga tulaga lua, ina ia mafai ona maua se suiga i le mamafa o le fanau a’oga e fa’amauina, a’o le’i o’o atu i le masina o Aperila 2014.

“O lenei taumafaiga, ina ia amata atu fo’i tima’iga ma gaoioiga e fa’aitiitia ai le mamafa o fanau a’oga tulaga lua i le Matagaluega o A’oga, o se matati’a o lo’o mo’omia ona ave i ai le fa’amuamua i le ma’ua itu o le auaunaga.” O se tala lea a le susuga Valusia.

O polokalama fa’ataoto, e aofia ai le Ta’aloga Soka e fa’atautaia ma fesoasoani malosi i ai le FIFA, ma e faia i le ta’i lima a’oga i le taimi e tasi. “O le ulua’i fa’atasiga lea o le ta’aloga soka sa mua’i faia ia Novema 5, 2013, ma ua mae’a fuaina fo’i le mamafa o le fanau vasega 8 sa auai e ta’a’alo mai a’oga e lima: Matatula, Afonotele, Aua, Matafao ma Aunu’u.

Ua sauni atu le isi lima a’oga e tauva i lea lava ta’amilosaga ia Fepuari 7, 2014 lea e aofia ai: Coleman i Pago Pago, Leatele i Fagasa, Pavaiai Elementary, Tafuna Elementary ma Lupelele Elementary i Iliili.

O le aso ananafi, sa fa’atagisia ai se fesoasoani mai a le Asosi o Ta’aloga Afeleti i Amerika Samoa mo ni ta’aloga e faia i le Malae Ta’alo tele o le Malo i Tafuna. Na pa’au Falenaoti Deanna Fuimaono ma se tasi o ona soatau i le fo’i fa’agatama e fesoasoani i le vasega o faia’oga o le Level 8 a Manulele Elementary, ma sui fo’i ole Physical Education a le DOE mo le faia o nei ta’aloga matagofie mo le fanau e fa’alusi ai o latou pauna.

I ta’aloga, ua matauina le mamafa o tino o le fanau, ae le taitai ona mamao se togi e gafatia e i latou ona togi ai le pulu mamafa po’o le tao fo’i ma le u’amea salafa. “O lo’o i ai le malosi i le fanau, ae le’i a’oina lelei ia iloa ona togi pe velo fo’i le tao.” O se tala lea a Valusia.

I tu’uga tamo’e, e i ai le fanau o lo’o le mafai ona vaovaoa i lea ta’aloga, ae i ai nisi e matua musu mai e tamo’e so’o. Ae ina ua tamomo’e le vaega faigata lea, ua matua sisina lava le afu latou, ua aoga le fa’amalositino ua aia nei.” O se tala fiafia lea a Valusia ina ua va’aia lea suiga tele i le fanau.

O le umi na faia ai nei ta’aloga ile Malae e tasi ma le afa itula, ma ua amatalia fo’i e Manulele lenei tausaga i lea fo’i faiga fou ia fa’aitiitia pauna o le fanau a’oga talavou, ia fa’aitiitia ai le avanoa e maua ai i latou i le ma’i suka, lea e numera tasi ai Amerika Samoa i le to’atele o tatou tagatanu’u ua tau togafitia i le mai suka.

I le aso lava ananafi, sa o’o ane ai fo’i Clayton ma Valusia i le a’oga a Colemna i Pago Pago, mo le amatalia o le la’ua galuega i lea lotoa, e saunia ai mo le ta’aloga soka ia Fepuari e pei ona fa’atulaga.

O le to’a 10 o a’oga nei o le a mae’a tauva i le soka, o le a fuaina o latou pauna ia Aperila, ma iloa ai, pe o aoga ia i latou fa’amalositino, ina ua iloga, ua fa’aitiitia pauna o le fanau mai le pauna na mua’i fuaina a’o le’i amatalia lea ta’amilosaga soka.

“O le tima’iga, e le fa’asaina le taumafa, ae ia faia se fa’amalositino, e toe fa’aalu ese ai le afu, ma toe fa’aaoga i ai mea taumafa sa e ‘aina.” O se tala ata lea a Valusia mo le fanau.