Ads by Google Ads by Google

VAVAU A SAMOA: FAIGAUO A TUIATUA MA LETUFUGA

O le faaauauina lenei o le vaega mulimuli o le tatou tala i le mafutaga a Tuiatua ma Letufuga, lea na mafua ai ona maua ni isi o muagagana a le atunuu ma o lo o faaaoga e le toatele o Faleupolu i taimi o a latou lauga.

 

A’o alu le vaa, sa faailoa e le i’a i le tamaititi, a latalata atu loa i Savaii, ona vave oso lea i lalo ma aau i uta ne’i pa’ulia o ia pe a latalata tele i uta, ona faapena loa lea ona fai le maliliega a le toalua lea. Ua aga’i atu le malaga a le i’a ma le tamaititi ma tau atu i le Atu Aleipata, ona la vaaia lea o tamaiti o le nuu o lo o sausau lupo mai i luga o le sami i le isi motu pito i tai, ma ua tosina atu ai lava le vaai a le tamaititi, ae na avea ma itu na fesili atu ai le i’a i le tamaititi, pe aisea e autilo ai i uta, ae na tali le tamaititi, e fia sau sau lupo pei o tamaiti o lo o sausau lupo mai i uta, ona fai atu le o le i’a i le tamaititi, e oso i luga o lona si’usi’u e tu ai ma sausau lupo. Le tama la lea na mafua ai le muaagaga lea, “ua ou tu nei i siua ae ou sausau i le moana.”

 

Ae o le i’a, fai mai le tala na alu atu lava le i’a a’e i Lalomanu i le maota o Fuataga ma mate ai, ona feamoa’i ai lava lea o le i’a i uta toe amo i tai, faasolo mai i Falealii ma alu atu ai i Solosolo, e oo ane la le amoina o le i’a i se ogaeleele e latalata i Manunu, o lo o tutu ai le tama o Seleselelimalelei le alo o Fa’ifa’i o Manunu, fai mai ona alaga lea o le tama fai mai,

 

“E, ta fia fai a’ea lena i’a.” na lagona e tagata na tausoaina le i’a le alaga a le tama ona latou valaau loa lea i le tama o Seleselelimalelei, e alu atu loa e faasoa le i’a, ma o lalo o le fu’afu’a na faasoa ma lufilufi ai e le tama o Seleselelimalelei ma tagata nei le i’a, o iina na mafua ai loa ona maua malae fono o Atua iina, le malae i “Lulilufi ma Lalogafu’afu’a.”

 

Fai mai le tala ona vaetolu lea o le i’a, ua ave le ulu o le i’a ia Tafua ma Fuataga, ona maua ai loa lea iina o le “Ao o Atua,” ua ave le ogatotonu o le i’a ia Iuli ma Moeono, ona maua ai loa lea iina o le “Uso o Atua,” ma le si’usi’u o le i’a na ave ia Taloolemaagao ma Tofua’eofoia, ona maua ai loa lea iina o le “I’u o Atua,” o iina lea na faatoa taoto ai tofiga a Atua.

 

MUAGAGANA:

 

“Ia seu le manu ae taga’i i le galu”

 

“O le a fa’amanusina le atu o le taeao”

 

“Ua ou tu nei i siui ae sausau i le moana e pei o le fetalaiga ia Velova’a.”