Ads by Google Ads by Google

Fatu La’au Cherry Blossom mo Amerika Samoa

Ua mae’a taua’aoina fatu la’au “Cherry Blossom” mai Uosigitone DC o le laumua  a le Iunaite Setete, ma ua aofia fa’atasi ai ma se fe’au taua mai le Koneferenisi o Setete uma o le Iunaite Setete[NCSS] ina ia fa’amau fa’ailoga ai le atoaga o le 100 tausaga o se fa’amomoli o le filemu ma le nofo lelei fealoa’i o Iapani ma le Iunaite Setete o Amerika ina ua mae’a le taua lona lua o le lalolagi.

 

“Ua toe fa’amanatu nei i loto ma agaga o tagatanu’u uma, lea meaalofa taua ma le lalelei e fa’aatagia ai le matagofie o le si’omaga saogalemu, lafulemu ma le nofo sa’oloto lelei o tagata uma o nei malo e lua, ina ua te’a le fetuatuana’i ma le va fete’ena’i,” o le feau taua lea  o le Cherry Blossom.

 

O nei pua o fatu la’au “Cherry Blossom” o se fa’aatagia lea o le feagaiga matagofie i le va o malo e lua, ae i le aganu’u a Iapani, o lea le la’au e tolu mea ma’oti e fa’aatagia ai, pe afai e faimeaalofa atu ai se tasi ia te oe: Lalelei, Malamalama, ma le Soifuaga atoa o le Tagata.

 

O lea fo’i se fe’au na toe fa’amanatu mai e le Emepasa o Iapani i Amerika, lea sa tu’u fa’atasi i totonu o le pusa fatu la’au ina ia fa’ao’o i setete uma ma teritori. O lea meaalofa taua, sa fa’ao’o mai e le tama’ita’i o Isapela Enesi, le tama’ita’i peresetene o le Sosaiete a Amerika Samoa i Uosigitone, lea e avea ma totino o le NCSS.

 

“Ou te fiafia tele e avea ma sui, e fa’ao’o mai lenei meaalofa o le ‘Leleiga ma le Nofo Sa’oloto i le Filemu’ i lona nofoaga e fa’amautu i ai, ma totoina ai e o tatou tagata, e avea fo’i ma se fa’amanatuga o le va lelei ma Iapani, ina ua mae’a taimi o fevaevaea’iga. I le fa’ataunu’uina o lea tiute, ua fai ma sao i lea fo’i galuega lelei, aua o lo’o va’ava’alua mai lea galuega ma se fe’au aualofa o le tatou Faipule Faleomavaega Eni mai Uosigitone.”

 

O se fa’amatalaga lea ma le fiafia a Isapela Enesi, a’o ia taua’aoina atu le pusa o fatu Cherry Blossom ia Gale’i fa’atasi ai ma le Fa’atonu o le Land Grant Tapa’au Dr. Dan Aga, ma le pule o le Vaega o Folesi a le tatou Land Grant o Lauagaia Mary Taufete’e.

 

O lea ua matu’u mai fatu nei mo Amerika Samoa, peita’i, e le tutusa le tausiga o nei fatu, ma isi fatu o la’au o le tatou vaomaoa. Ua i ai fa’atonuga fa’apitoa mo le tapenaga e toto nei fatu, e umi fo’i se taimi e fa’avai ai fatu, ona fa’ato’a toto ai loa lea i vaitaimi ua mae’a fa’atulaga mai mo lenei tausaga.

 

O le totoina o fatu la’au nei i setete uma ma teritori o Amerika, sa amatalia i le tausaga 2013 ina ua mae’a atoa le 100 tausaga talu mai ona foa’i fuaina mai le pusa fatu la’au mai Iapani i Amerika i le tausaga e 1912 o se fa’ailoga o le leleiga, le nofo sa’oloto i le alofa ma le filemu, ma ua toe fa’ataua atili lea fo’i leleiga.

 

O le fua o nei la’au e lanu piniki, ma e matele ina feso’ota’i ma olaga ma’ale’ale ma le lalelei o tama’ita’i o lea fo’i malo, ae ua tufa mai ia avea ma matagofie o le si’omaga o Uosigitone ma Amerika atoa e pei ona faia nei.

 

Ua fa’ailoa mai o fatu e ao ina teuina lea i le taumalulu o se ea malulu, a’o le’i fa’avaiina mo le masina atoa, ona fa’ato’a totoina ai lea i eleele e tele le suavai, ma e ola lelei tele i le taumalulu. O lo’o tele se lagona o ali’i ma tama’ita’i o le tatou Folesi, o le a mafai ona ola lelei pea a tatou Cherry Blossom lea ua fa’ao’o mai, aua o se la’au o lo’o sau ma se fe’au o le leleiga ma le filemu.

 

“ E taumafai le matou vaega ina ia toto ma ia ola toe fua mai a tatou Cherry Blossom uma nei, fa’afetai mo le fe’au o le leleiga, nofo sa’oloto ma le filemu fa’atasi ai ma le alofa ua o’o mai. E le galo fo’i le afuaga o le tatou totoina o nei la’au matagofie o lo’o paina ai auvai o le Vaitafe o Potomac, talu mai le tausaga 1912, se’ia o’o mai i le tausaga nei.”

 

Ua le gata i lea, ae ua i ai fo’i le vaitau o fa’aaliga taleni eseese ma agaifanua ua fa’aigoaina National Cherry Blossom Festival, e tele fo’i se sao o le Sosaiete a Amerika Samoa e faia ai, aua e faia ai fa’aaliga o Tu ma Agaifanua a atunu’u eseese o le lalolagi o lo’o aumaui totonu o eleele o le Iunaite Setete o Amerika.