O le alii faigaluega i le Ofisa o Femalagaaiga a le malo o Amerika Samoa, lea na tuuaia i lona faia o ni I.D pepelo ina ia mafai ai ona aumau i le teritori ni tagata mai Asia e le o tusa ma le tulafono mo la aumau ai i le teritori, ua ia ta’utino i le faamasinoga maualuga ananafi, e faamaonia tuuaiga faasaga ia te ia.

I le tali ioe ai o le alii o Polone Savea, 50 tausaga le matua o lona soifua, i le moliaga mamafa e tasi o lona faia lea o ni tusitusiga tau faasese, na talosaga ai loa le malo i le faamasinoga maualuga ina ia solofua isi moliaga mamafa e lua o lo o totoe ai i le pepa o tagi sa latou faaulu, le moliaga o le faia o faamaumauga tau faasese, atoa ai ma le moliaga o se tagata tautua lautele sa ia talia ni taui e ui faaalatua.

Na talosaga fo’i le malo i le faamasinoga ina ia solofua moliaga mamafa e tolu sa latou faila faasaga ia Savea i le mataupu 155-12, lea foi o lo o tuuaia ai o ia i lona tuuina atu lea o ni I.D pepelo se lua i ni tamaitai se to’alua mai Asia, ina ia mafai ai ona aumau i laua i le teritori, e ui e le o tusa ai ma le tulafono lo la aumau ai i totonu o le teritori.

I le tali ioe ai o Savea i le moliaga e pei ona ta’usala ai o ia, sa ia ta’utino ai e faapea, i le va o Aokuso ma Setema o le 2011 ao avea o ia o se tagata faigaluega a le Ofisa o Femalagaaiga, sa ia faaaogaina ai I.D tuai o tagata mai fafo ua latou tuua le atunuu, e fai ma I.D mo ni tagata se toalua mai Asia, ina ia faafoliga ai o ni I.D moni ia I.D, ae le iloa o I.D pepelo.

Na taua e Savea e faapea, i lona faaaogaina ai o I.D tuai e faaaoga e tagata mai fafo e to’alua faatoa ulufale mai i le atunuu, sa ia pu’eina ai ata o i latou ma faapipii i luga o I.D pepelo ia, sa faapea fo’i ona tuu i ai ma faamaumauga uma e faatatau ia te i laua e pei o la aso fanau atoa ai ma o la igoa.

Sa i ai fo’i i luga o I.D pepelo ia nisi o faamaumauga a le Ofisa o Femalagaaiga, e aofia ai le saini a le loia sili tuai sa i ai o Fepulea’i A. Ripley, atoa ai ma le faamau faailoga a le ofisa o le malo.

O lo o molia faatasi Savea ma Matagi Lelili’o i le mataupu lenei, ma o le taeao nei lea ua faamoemoe e lau ai le faasalaga a Lelili’o i luma o le faamasinoga maualuga, ina ua ia tali ioe i le solitulafono mama o lona fesoasoani lea i se tagata faigaluega a le malo e faatino le solitulafono o le faia o tusitusiga tau faasese.

O le aso 7 Fepuari lea ua faatulaga e lau ai le faasalaga a Savea i luma o le faamasinoga, ina ua ta’usala o ia i le moliaga mamafa e tasi sa ia ioeina.

O le alii loia ia Matailupevao Leupolu Jr o lo o tulai mo Savea, ae o le tamaitai loia sili lagolago ia Camille Phillippe o lo o tula’i mo le malo.