Ads by Google Ads by Google

Fa’alauiloa polokalame faalelei ai pepa nofomau tagata ‘overstayer’

O ananafi i le taimi o le fonotaga a le kapeneta a le alii kovana, na faalauiloa ai le polokalame a le malo e faafou ai pepa nofomau mo tagata uma mai fafo, o lo o nofo faasolitulafono i le teritori, po o i latou o lo o taua i le gagana faaperetania o ‘illegal aliens’.

 

O le polokalame a le malo ua taua o le ‘Immigration Amnesty Program’ e pei ona taua e le tamaitai loia ia Jessop, o le a maua ai e tagata mai fafo o lo o nonofo faasolitulafono i le teritori le avanoa e faaleleia ai a latou pepa nofomau, ina ia tusa ai ma tulafono tau Femalagaaiga a le teritori.

 

O le aso 18 Fepuari, 2014 lea ua faamoemoe e amata aloaia ai lenei polokalame ae maea i le aso 18 Mati.

 

O i latou uma o lo o faaletonu a latou pepa nofomau i totonu o le teritori, amata mai i le aso 30 Iuni 2013 ma tua atu, ua fautuaina i latou i lalo o le polokalame lenei, ina ia lesitala loa o latou igoa mo le faaleleia o a latou pepa nofomau, e aunoa ma se faasalaga e ono tuuina atu ia te i latou.

 

O le itu i sasa’e o Tutuila o le a amata lesitala mai ai igoa o i latou uma e moomia ona faaleleia a latou pepa nofomau, ma faasolo mai ai lava i le taulaga seia oo atu i le itu i sisifo, ae faaiu i le motu o Manu’a.

 

O le a i ai foi le nofoaga faapitoa mo i latou e manaomia le fesootai i le gagana peretania, pe afai e fia lesitalaina i latou i lalo o le polokalame.

 

Saunoa Jessop e faapea, i le maea ai ona lesitalaina o i latou i lalo o lenei polokalame, ona taumafai loa lea e fau se tulafono mo le tuuina atu i le Fono Faitulafono, mo le pasiaina o le tulafono e faaleleia ai pepa nofomau a i latou nei.

 

O le filifiliina o i latou e agavaa i lalo o le polokalame lenei, e le faia e se tagata se toatasi e pei ona atugalu i ai ni isi o le atunuu, ae o le a iloiloina e se Komisi faapitoa e tofia e le alii kovana, ma, e le o i latou uma fo’i e lesitala o latou igoa i le polokalame e talia ma agavaa, ona e i ai i latou e le tatau ona talia e nonofo mau i le teritori, aemaise i lava i latou sa ta’usala i solitulafono mamafa i luma o le faamasinoga mo se faataitaiga.

 

“E le otomeki ona agavaa tagata uma mai fafo o lo o nonofo faasolitulafono i le teritori i lalo o le polokalame lenei, ae i ai ta’iala e tatau ona latou ausia ina ia lagolagoina ai le talia o i latou e faaleleia a latou pepa nofomau,” o le saunoaga lea a Jessop.

 

O faamaumauga uma o le a mafai ona maua mai ia i latou nei e pei ona taua e loia o lo o galulue i le polokalame, o le a malu puipuia mo faamaumauga, e le mafai foi ona avea nei faamaumauga ma auala e faigofie ai e le Ofisa o Femalagaaiga ona maua i latou o lo o nonofo faasolitulafono i le teritori, ma faia i ai se faaiuga e pei ona taua i atugaluga a ni isi o le atunuu.

 

Mo i latou uma e le o lelei a latou pepa nofomau e fia lesitala i lalo o lenei polokalame, ua fautuaina ina ia faafesootai le telefoni numera 633 8935, ma fesili mo le susuga ia Aofaga Ricky Salanoa mo nisi faamatalaga.