O le fonotaga muamua a le kapineta mo lenei tausaga, lea na usuia i le maota o Gov. Rex Lee Auditorium i le taeao ananafi, e le gata na faataoto ai ni isi o fuafuaga a le malo mo ana galuega faatino o lenei tausaga atoa, ae na faalauiloa ai fo’i e le afioga i le kovana, Lolo Matalasi Moliga ni isi o tofiga fou e fa ua faaopoopo i totonu o le kapineta.

O tofiga fou a le alii kovana e aofia ai le tofia o le susuga a Talauega Eleasalo Ale e avea ma Loia Sili o le malo; o le tofia o Ruth Matagi Faatili e avea ma peresetene o le Faletupe o Amerika Samoa; tofia Aliitama Sotoa e faauluulu i ai le Ofisa o le Enetia (TEO), ma le susuga ia Jonathan Fanene e avea ma Faatonusili o le Matagaluega o Tupulaga Talavou, Tina ma Tama’ita’i.

Na taua e Lolo e faapea, talu ai o le faaiuga a le fono e faatatau i lana ulua’i tofiga mo le faatonusili o le Matagaluega o Tupulaga Talavou, Tina ma Tamaitai, ua ia filifilia ai loa le faatonusili fou le tumau ia Fanene, na te tauaveina lenei tofiga taua.

Sa ia faalauiloa i luma o le kapeneta e faapea, o i latou nei e toafa ua ia filifilia, ua atoa i ai le agavaa ma le tomai mo le faatinoina o galuega ua tofia i latou e galulue ai.

$10,000 FESOASOANI MALO MO LE ATUNUU O FILIPAINA

O le taeao ananafi i le taimi o le fonotaga a le kapeneta, na tauaao aloaia atu ai e le afioga i le kovana, le foa’i tupe e $10,000 i le sui o le vaega o le Koluse Mumu ia Vaito’a Langkilde, mo le faaoo atu i sui o le atunuu o Filipaina i Amerika Samoa, e fesoasoani ai i tulaga pagatia ma le faaletonu sa aafia ai lea foi atunuu i le tausaga na te’a nei.

Na taua e Lolo i lana saunoaga e faapea, o lea foai e le o se tupe na tuuina mai e le malo, ae o le foa’i na tauaao e tagata faigaluega taitasi uma a le malo, i latou sa mafai ona maua le avanoa e ofo mai lo latou tamaoaiga e fesoasoani ai i tagata o lenei atunuu o lo o mafatia, ona o le faalavelave faalenatura sa aafia ai lo latou atunuu, aiga ma le malo.

Na saunoa faafetai le susuga a Vaito’a e fai ma sui o le vaega a le Koluse Mumu i le kovana ma le malo, ona o le foa’i maualuga ua mafai ona latou tuu faatasia, e faailoa atu ai lagona fia lagolago i tagata Filipaina o lo o pagatia.

O lenei foa’i na amata tuu faatasia mai e le malo i ni nai masina e le i mamao atu.

FAATULAGA POLOKALAME O LE FU’A

O le isi fonotaga a le kapeneta lea o le a sosoo nei, o le a faalauiloa aloaia ai loa e le Ofisa o Mataupu Tau Samoa polokalame mo le fu’a i lenei tausaga.

Saunoa le alii kovana e faapea, o le taua o le vave tuuina atu o le avanoa i le afioga a Satele Galu Satele Sr., le Failautusi o lea Ofisa ma lana taupulega e galulue ai e faatulaga se polokalame mo le fu’a, ina ia lava ai le taimi e galulue ai matagaluega uma a le malo mo le tuu faatasia o lenei faamoemoe.

E pei ona silafia ai e le atunuu, o le ulua’i sisiga fu’a i lalo o le taitaiga a Lolo ma Lemanu i le tausaga na te’a nei, sa leai ni valaaulia mai Samoa i tulaga o pese ma siva faaleaganuu, e o o lava fo’i i fautasi, ona o le tulaga utiuti ma le faaletonu o le tamaoaiga o le malo sa i ai i lena tausaga, ae sa faalauiloa e Lolo i se tasi o fonotaga a le kapeneta ao lumana’i ai le faamanatuina o le fu’a i le tausaga na te’a nei, o lo o i ai le faamoemoe o le tausaga nei e tatau ona maua ai ni valaaulia mai Samoa, pe afai e talafeagai ai ma le tamaoaiga o le malo.

FESOASOANI MO LE MALO O TONGA

Ua sauni le malo e tuuina atu le isi ana fesoasoani tau tupe, mo aiga ma tagata o le atunuu o Tonga na aafia i le afa o Ian na sei mavae atu nei.

Na taua e le alii kovana sili i le fonotaga a le kapeneta e faapea, mai le $17,000 lea sa mafai e tagata faigaluega a le malo ona tuu faatasia mo le faamoemoe e fesoasoani ai i tagata o le atunuu o Filipaina na aafia i le lua masina talu ai i le galulolo, e $10,000 ua tuuina atu mo Filipaina, ae o le $7,000 o lo o totoe ai o le a taumafai ai se fesoasoani mo tagata Tonga na aafia o latou aiga i le afa o Ian i le vaiaso na te’a nei.

E tusa ai o ni ripoti na faasalalauina e vaega faasalalau na taua ai e faapea, e toatasi se tagata na maliu i le afa o Ian i Tonga, ma le toatele o aiga sa faaleagaina a latou fale ona o le malosi o le afa.