E silia i le $100,000 aitalafu tuai a le malo (long term liabilities) a le malo o lo o taumafai pea le faigamalo a Lolo e totogi i le taimi nei, e pei ona faailoa e le alii kovana ia Lolo Moliga i le taimi o lana saunoaga autu, ina ua tatala aloaia taualumaga a le Fono Faitulafono i le aso Gafua na te’a nei.

O ni isi o nei aitalafu e pei ona taua e le alii kovana i le fono e aofia ai nonogatupe sa faia e le malo mai teugatupe a le Litaea, o le ASPA, o aitalafu a le vaega o le Litaea (unfunded liabilities) po o aitalafu e le o lava le tupe e faatupe ai, lea na taua e le alii kovana o lo o fautua mai le Matagaluega o le Initeria e tatau ona tuu faatasi ma le ripoti a le malo, ma aitalafu i ova taimi, livi ma’i ma livi tausaga e tatau ona totogi atu e le malo.

Na taua e le alii kovana e faapea, a’o latalata ai ina maea ona totogi aitalafu laiti a le malo (short term liabilities), e mana’omia ni vaega tupe e faamama atu ai ma aitalafu tetele nei, ina ia aua nei toe avea ma faalavelave i le malo.

Mo se faataitaiga i le aitalafu a le malo i le Pulega o le Eletise ma le Suavai (ASPA), lea sa tula’i mai i le $9 miliona i le tausaga na te’a nei, peitai o lea ua maea ona totogi le $6 miliona  ina ia faaauau ai pea ona maua e le malo lea auaunaga mai le ASPA.

“O isi aitalafu tetele o lo o pagatia ai le malo i le taimi nei i le tau totogiina, o nonogatupe sa faia i le teugatupe a le litaea, lea fo’i ua aga’i atu ina faaitiitia nei aitalafu tetele,” o le saunoaga lea a le alii kovana.

Mo se faataitaiga o le nonogatupe e $10 miliona a le malo sa faia i le nonogatupe a le litaea, toe $7.1 miliona o lo o totoe i le taimi nei; o le isi nonogatupe e $20 miliona na auala mai foi i le teugatupe a le litaea, toe $11.8 miliona o lo o totoe e le i totogiina.

O isi aitalafu e pei ona folasia e le alii kovana, o le $15.7 miliona mo livi ma’i ma isi penefiti, o le nonogatupe sa faia i le tupe o le maliliega o le tapa’a (DOI Tobacco Loan) lea o lo o totoe ai le $11.1 miliona, ma le $8.4 miliona mo le tau o mea sa faaleagaina (Claims and Damages).

O le aitalafu pito i tele na taua e le alii kovana i lana saunoaga, o le $48.4 miliona o “unfunded liabilities” po o aitalafu e le o lava le tupe e faatupe ai.

“E ui i tulaga faaletonu e pei ona ou taua i aitalafu tetele a le malo, ae le o malolo ai le malo i le faatinoina o ona tiute, e pei o le aoina mai lea o tupe lotoifale ina ia fesoasoani i ana galuega faatino aemaise ai o le atina’e a le malo,” o se vaega lea o le saunoaga a le alii kovana.

“O se tala fiafia mo le malo ma le atunuu atoa, i le masina o Tesema 2012, e na o le $5 miliona sa mafai ona aoina mai e le Ofisa o le Tupe i tulaga o tatou lafoga, ae i le masina o Tesema 2013 na faatoa te’a atu nei, e tusa ma le $11.8 miliona le tupe sa mafai ona ao mai i tupe lotoifale,” o le saunoaga lea a Lolo.

Na taua e le alii kovana e faapea, e i ai lava auala e mafai e le malo ona fai ina ia saili ma faasao ai ana tupe lotoifale, e fesoasoani ai i le faatinoina o ana galuega i soo se taimi, nai lo le faalagolago pea i tupe e maua mai i le malo tele.

I le faataua ai e le alii kovana o tulaga i tupe lotoifale e ao ona malosi ma lelei mo le atina’e o le malo, sa ia taua ai le tatau lea ona saili e le malo ni isi auala, e faasao ai tupe lotoifale ina ia fesoasoani ai i le faaleleia o auala i le atunuu.

Mo se faataitaiga e pei ona saunoa Lolo, e i ai le taimi e gata ai le malosi o tupe mai le feterale e faamatuu mai e fesoasoani ai mo Amerika Samoa, ae afai e lava tupe lotoifale e faasao e le malo, o le a mafai ai ona faaauau tulaga i le faaleleia o auala.

Na faamalulu le alii kovana i le atunuu ona o le tele o auala e le o mafai ona faaleleia, pe a fuafua atu i le na o le 30% o auala i totonu o Tutuila ua maea ona faaleleia, ae o se vaega tele o lo o tumau pea le faaletonu, aemaise lava i le auala i le malae vaalele.

Saunoa Lolo, ua maea ona sainia le konekarate ma le kamupani fai auala ma le McConnell mo le fausiaina o le auala i le malae vaalele, ma ua i ai le faamoemoe atonu o le isi lua vaiaso o lo o lumana’i nei o le a amata aloaia ai le galuega, i le maea ai lea o fetuanaiga o lo o faia i tulaga o tupe o le pone.