TAOFIA NI TAGATA FAIGALUEGA A LE MALO I LE TOESE

E toalua ni tagata faigaluega a le malo o lo o taofia i le toese i Tafuna i le taimi nei, ina ua masalomia lo la umia o vaega o le pauta faasaina o le aisa, e ala i lo la faaaoga o se taavale a le malo, le ituaiga o le (PW-7) e faatau mai ai fualaau faasaina mai Malaeloa i le aso Gafua na te’a nei.

I se ripoti na tuuina mai i le vaega e suesueina mataupu tau i fualaau faasaina a le Ofisa o Leoleo, na taua ai e faapea, ao faatino tiute masani a leoleo i le aso Gafua na te’a nei i le itu i sisifo o le atunu, sa maitauina ai se taavale a le malo o aga’i atu i se nofoaga i Malaeloa ma Taputimu, o lo o masalomia o lo o faatau mai ai e ni isi o tagata fualaau faasaina o le aisa.

Na tulimata’i e leoleo le taavale lea a le malo i le taimi na afe ai i tua o le auala, ae i le taimi na toe fo’i mai ai le taavale lea o le PW-7, sa mulimuli atu ai loa leoleo i tua ma vaaia ai ua aga’i le taavale aga’i i le auala i Aoloau, ma sa faapea ona mulimuli atu ai pea le taavale a leoleo.

E le i umi se taimi ae taofia loa e leoleo le taavale a le malo ma faatonu alii e toalua o lo o i totonu e tulioso i fafo, ona o lo o masalomia lo la umia o ni vaega o fualaau faasaina, ae ina ua sailia e leoleo totonu o le taavale, sa maua i ai se taga pepa iila e tasi o lo o i ai vaega o le pauta pa’epa’e, sa faia loa i ai se suega faapitoa i le pauta pa’epa’e lea ma iloa ai, o vaega ia o le fualaau faasaina o le aisa.

O le isi to’atasi o le to’alua lea o le a molia i lona umia faasolitulafono o vaega o fualaau faasaina o le aisa, ae o le isi toatasi o le a molia i lona fesoasoani lea i le isi tagata i le umia faasolitulafono o fualaau faasaina.

O le taimi nei o lo o taofia pea i laua ia i le toese e faatali ai gaioiga a leoleo ma le ofisa o le loia sili o lo o faagasolo  i le taimi nei, o le faatulagaina o pepa atoa ai ma moliaga faasaga ia te i laua, ma ua faamoemoe o se taimi o le vaiaso nei e tatau ona tutula’i ai i laua i luma o le faamasinoga mo le taimi muamua, mo le tuuina atu o la tali e tusa ai o moliaga faasaga ia te i laua.

JENNIFER TOFAEONO

O le aso 21 Mati 2014 lea ua faatulaga e toe valaau ai le mataupu a Jennifer Tofaeono i luma o le faamasinoga maualuga, ina ua ia tula’i ma teena moliaga faasaga ia te ia i le taeao ananafi.

O le tamaitai loia ia Sharron Rancourt o lo o tula’i mo le ua molia ma faaleoina le tali tete’e a le ua molia, lea fo’i e le i i ai se faatuiese a le malo.

O Tofaeono o lo o tuuaia faatasi ma Felise Toilolo, ona o le faalavelave lea o lo o masalomia ai lo la ave faagaoi o se vaega tupe mai le falema’i o le LBJ i Fagaalu, ao avea ai i laua ma tagata faigaluega.

O Tofaeono sa avea ma pule o le vaega o pisinisi a le falema’i i le taimi na tulai mai ai lenei faalavelave, ma o lo o masalomia lona faaaoga o credit cards a le falema’i e aveese mai ai tupe e pei ona tuuaia ai o ia.

O lo o o tumau pea poloaiga a le faamasinoga o lo o tatala ai Tofaeono e faatali ai le taimi ma le aso lea ua faatulaga e toe tulai ai i luma o le faamasinoga.

ONEIL LEVI

Ua molia nei e le malo le alii o Oneil Levi i le moliaga o le ave taavale ‘ona atoa ai ma le ave taavale a’o se’i lona laisene, ona o le faalavelave lea na ia aveina ai se taavale i le vaiaso na te’a nei, ma i’u ina tula’i mai ai se faalavelave i Tafuna.

O le masina o Setema 2013 na se’i ai e le faamasinoga le laisene a le ua molia mo le 6 masina, ina ua faamaonia le moliaga o le ave taavale ‘ona sa molia ai o ia e le malo.

I le aso na lau ai le faasalaga a Levi i luma o le faamasinoga faaitumalo, sa fautuaina ai e le faamasinoga o ia ina ia aua nei ona toe aveina se taavale ao sei lona laisene, ma aua foi nei ona toe tagofia le ava malosi i totonu o le tausaga atoa o lana nofovaavaaia.

O se faalavelave tau taavale na tulai mai i Tafuna i le vaiaso na te’a nei, ina ua so’a e le pikiapu na alu atu ai Levi se taavale laupasese sa paka i luma o se faleoloa, ma logo ai loa e le ave taxi leoleo mo se fesoasoani, ina ua fesili atu ia Levi i le mafuaaga o lona so’aina o lana taxi, ae faaali i ai le fia ulavale o le alii ua molia.

Na taunuu leoleo ma latou vaaia ai Levi ma le ave taxi o lo o tau vaovao mai e tagata faatau a la fusuaga, ma ave ai loa i laua i le ofisa o leoleo i Tafuna mo suesuega, ma o iina na manino ai le mata o le vai, ma toe tatala ai i tua le ave taxi ae taofia ai loa Levi i le toese ma molia i le moliaga o le faatupu vevesi i nofoaga faitele.

Mulimuli ane i le vaiaso lava na tea nei, na faatoa faila ai loa e le malo le moliaga o le ave taavale ‘ona atoa ai ma le moliaga mamafa o le ave taavale ao sei le laisene faasaga i le ua molia.

O le masina fou lea ua faatulaga e toe fofogaina ai le mataupu a le ua molia, ma o lo o taofia pea o ia i le toese i Tafuna sei vagana ua ia totogi le $500 ona faatoa mafai lea ona tatala o ia i tua.