LOLO: Aga’i ina lelei tamaoaiga o le malo e ui i le tele o aitalafu

I le tatala aloaia ai o le tauaofiaga lona 3 o le nofoaiga lona 33 a le Fono Faitulafono i le taeao ananafi, na faalauiloa ai e le afioga i le alii kovana ia Lolo Matalasi Moliga le aga’i malie atu pea o le atina’e ma le tamaoaiga o le malo i se tulaga lelei ma le manuia, e ui i le tele naua o aitalafu o lo o i ai.

Na auai faatasi i lenei sauniga taua ta’ita’i o le malo i ona tafa e tolu, faapea ai ta’ita’i faaleaganuu aemaise ni isi o le atunuu na mafai ona auai atu e molimauina lenei faamoemoe taua.

E pei ona masani ai i soo se taimi e tatala aloaia ai tauaofiaga a le Fono Faitulafono, o le alii kovana na te tuuina atu le tala otooto i le tulaga o lo o i ai galuega ma atina’e a le malo, ae o le afioga i le peresetene o le Senate e fali fuaitau i le lauga a le malo.

TAMAOAIGA O LE ATUNUU

Talu mai lava le ulua’i taimi na afaina ai le tamaoaiga o le lalolagi ma le atunuu i le 2008, sosoo ai ma le galulolo na aafia ai Amerika Samoa i le 2009, faatasi ai ma le tapunia o le  kamupani i’a o le Samoa Packing, o iina na amata faaletonu mai ai lava le tamaoaiga o le atunuu e pei ona taua e le alii kovana, e ui i ni taumafaiga e faaleleia ma toe faafoi le tamaoaiga i lona tulaga malosi sa i ai muamua.

O ia tulaga faaletonu na mafua ai ona leiloloa le tusa ma le 5,000 galuega i totonu o le atunuu, ma o le leiloloa ai o nei galuega na aveese atu ai ma le tulaga malosi sa mafai ona fesoasoani atu atu ai pisinisi tumaoti i le tamaoaiga o le malo.

“Ae ui i nei tulaga faaletonu, o lo o taumafai pea le malo faapea ai ma le fesoasoani mai a le Matagaluega a le Initeria e faaaoga tupe mai fafo atoa ai ma tupe lotoifale o lo o mafai ona tatou maua, e fesoasoani ai i pisinisi lotoifale ina ia faalelei ma mautu, ina ia fesoasoani ai i le faamalosiina o le tamaoaiga o le malo,” o le saunoaga lea a le alii kovana.

Talu mai le masina o Ianuari 2013 seia oo mai i le masina o Tesema na te’a nei e pei ona saunoa Lolo, tusa i le 700 galuega fou ua mafai e le malo ona faaopoopo, ma le faamoemoe e o o atu i le 2015 ua faaopoopo le silia i le1,000 o isi galuega fou, pe afai ae tatala le auaunaga a le kamupani o le Tri-Marine lea ua toeititi maea ana galuega toe faaleleia, faapea ai ma le toe faaopoopoina o isi tagata faigaluega i le auaunaga a le kamupani i’a o le StarKist Samoa.

“E le o mafai ona nofonofo le malo i le tau sailiina o auala eseese e fesoasoani ai i le atina’eina o pisinisi, ina ia mautu ma lelei ma maua ai isi galuega faaopoopo mo le atunuu,” o le isi lea saunoaga a le alii kovana.

Mo se faataitaiga o galuega o lo o galulue faatasi ai le malo e fesoasoani ai i pisinisi ma le atunuu, o le faaitiitia lea o le tau o le eletise e pei ona taumafai i ai le Pulega o le Eletise ma le Suavai (ASPA).

Saunoa le alii kovana e faapea, o taumafaiga a le Komiti Faafoe o le ASPA e saili nisi auala e mafai ai ona gaosi le eletise i auala e aunoa ma le toe moomia ai o le suauu, e pei o le faaaoga o le malosi o le la, savili faapea ai ma le malosi e maua mai i le palapala, o isi ia o auala o lo o taumafai le ASPA e faia ina ia fesoasoani ai e faaitiitia le tau o le eletise mo le atunuu ma pisinisi.

“Talu ona tula’i mai le matua ia Utu Abe Malae i le taitaiina o le ASPA faapea ai ma le fesoasoani a le Komiti Faafoe sa ou tofia, ua faaitiitia le tau o le eletise i le 6 sene, ae o lo o galulue pea i latou e saili isi auala e mafai ai ona gaosi le eletise e pei o le faaaoga o le malosi e maua mai i le eleele e gaosi mai ai le eletise, ma o lea auaunaga o lo o faamoemoe e amata mai i Manu’a i se taimi e le o toe mamao,” o le saunoaga lea a Lolo.

Na faamalulu le alii kovana i taitai o le fono pe afai sa i ai se taimi na feeseesea’i ai o latou lagona i ni isi o mataupu aua le manuia o le atunuu, ae i lona talitonuga, e mafua ona eseese manatu ona o le naunau e fai le mea sili mo le atunuu.

TALI FUAITAU LE PERESETENE O LE SENATE

Na faafetaia e le peresitene o le Maota Maualuga, Gaoteote Palaie Tofau le alii kovana faapea ai ma le lutena kovana ia Lemanu Peleti Mauga, ona o galuega lelei ua mafai ona ausia e le la kapeneta mo le malo, ao lea faatoa tasi le tausaga talu ona latou tula’i mai i le taitaiina o le malo.

“O le a sau faafofoga le atunuu aemaise le Fono i tulaga ua i ai le atina’e o le malo atoa ai ma lona tamaoaiga. Tailo ia te oe, ae o la’u faalogo, ua tele galuega lelei sa fita i tuga i ai le malo, ma ua moni ai upu a le atunuu, ua malie mata e vaai, ua malie taliga e faalogo i le manaia o galuega ua outou faatinoina,” o le saunoaga lea a Gaoteote.

Sa ia taua foi e faapea, o tala fiafia e faatatau i le tulaga ua i ai le malo, ua faatusa i le galu ua fati sisina, e le gata i le taitaiga a le Atua ia Amerika Samoa ae o le atamai ua foa’i i ona ta’ita’i ua mafua ai ona manuia le folauga i le ulua’i tausaga o le nofoaiga a le faigamalo fou.

“Talofa e Lolo ma Lemanu, ua lua afutoto i le taumafaiga o le malo, ae o lea ua avatu le ua o le Fono e fesoasoani ai i lua tauau, ina ia tatou tausoa faatasi le galuega e le faigofie,” o le saunoaga lea a Gaoteote.

Pau le tulaga na faailoa e Gaoteote i le alii kovana, ona o tala o lo o faasalalau e nusipepa ma le leitio fai mai “e aua le togi togi ma’a,”, o isi foi taimi fai mai ua “confuse le Fono,” a le o lena fo’i ua faapea mai le nusipepa ua “mumu faasoloatoa tupe a le Fono.”

“O le talosaga, aua le avea nusipepa ma leitio e fai ma auala o fesootaiga mo le malo ma le fono, ae o mai tatou fesilafa’i e manuia ai la taua galuega, o tulaga fo’i i le eseese o manatu, e mafua ona o se taumafai ina ia manuia le atunuu atoa,” o le saunoaga faaiu lea a le alii peresetene.