Ads by Google Ads by Google

Fa’atauto Afoa ma Gaea avea ma Senatoa

O le taeao ananafi na faataunuuina ai se sauniga faapitoa i totonu o le maota fono o le Senate, e faatauto afioga i ali’i senatoa fou e to’alua e sui tulaga i afioga i alii senatoa e to’alua ua tuua le malo.

 

O afioga i ali’i senatoa fou e to’alua e aofia ai le afioga i le Aloalii ia Afoa Su’esu’e Lutu, lea ua sui tulaga i le afioga i le alii senatoa ia Faagata Mano ua tuumalo, mo le isi nofoaga o le itumalo o le Maoputasi, faapea ai ma le tofa Gaea Perefoti Failautusi, e sui tulaga i le afioga i le Sa’o ia Letuligasenoa Soli ua tuumalo fo’i.

 

O le itula e 8:00 i le taeao ananafi na faataunuuina ai le sauniga o le faatautoina o ali’i senatoa, a’o lumana’i ai le tatala aloaiaina o le tauaofiaga lona 3 o le nofoaiga lona 33 a le Fono Faitulafono.

 

Na faatumulia luga o le maota fono a le senate i uo ma aiga o alii senatoa, aemaise ai ni isi o sui o itumalo sa lolofi atu latou te molimauina lenei sauniga taua.

 

O le afioga i le peresetene o le Senate ia Gaoteote Palaie Tofau na faafeiloaia afioga i senatoa i le taimi o le latou tauaofiaga, ma ia tofia ai loa se komiti faapitoa e toatolu ona sui, latou te iloiloina tulaga o tofiga ma faaiuga mo alii senatoa e toalua, ina ia tusa ai ma faiga faavae a le maota.

 

O sui e toatolu o le komiti, o e alii sui peresetene ia Nuanuaolefeagaiga Saoluaga o le taitai komiti, ma afioga i alii senatoa ia Soliai Tuipine Fuimaono ma Leatualevao Asifoa.

 

E le i umi se taimi na iloilo ai e le komiti faaiuga a itumalo e tusa ai o alii senatoa fou, ae tuuina atu loa la latou ripoti i luma o le maota, ma latou faaalia ai lo latou taliaina o le faaiuga, ina ia aloaia le avea o Afoa ma Gaea o senatoa o la itumalo i totonu o le senate.

 

Ina ua maea ona fofogaina le faaiuga a le komiti e le taitai komiti ia Nua, na valaau faapitoa ai loa le Faamasino Sili ia Michael Kruse mo le faatautoina o ali’i Senatoa.

 

Sa faafeiloaia faapitoa e le Fofoga Fetalai o le maota o sui ia Savali Talavou Ale i le taimi na tatala aloaia ai le aofia a le fono i le taeao ananafi, afioga i alii senatoa fou e tusa ai o le avea o i laua ma sui fou o le fono.

 

Saunoa le alii kovana ia Lolo Moliga i lana saunoaga, sa i ai lava le manatu o le a latou galulue pea ma le afioga i le Aloalii ia Afoa, peitai o lana filifiliga ina ia talia le faaaloalo a lona itumalo, o se filifiliga ua tatau ma onomea, ma atonu o le a faaaoga lona tomai e fesoasoani ai i se isi vaega o le galuega a le Fono Faitulafono.

 

Ina ua talanoa le alii kovana i le taua o le Faavae o le malo, sa ia faafetaia ai Afoa, o se tasi o tamalii sa i totonu o le Komisi faapitoa na iloiloina tulaga o mataupu mo le faavae, i lona sao tele i le taumafaiga o lea fo’i vaega taua i le tala faasolopito o Amerika Samoa.

 

Na fautuaina e le alii kovana taitai o le fono ina ia faaaoga lo latou malosi e faia ai suiga i le Faavae, e avea o se auala latou te vaavaai ai i suiga lelei ma talafeagai mo le Faavae o le atunuu, ina ia manuia ai le atunuu atoa.

 

Saunoa Lolo e faapea, o le isi lea mataupu tuga o lo o feagai ma le malo i le taimi nei, o taumafaiga e fai suiga i le faavae, ma talu mai le 2006 lea na tofia ai se komisi faapitoa latou te iloiloina tulaga tonu e tatau ona taoto ai se faigamalo talafeagai mo Amerika Samoa, o lo o faigata pea ona faaofi nisi o suiga i le Faavae o le atunuu.