FIAPAPALAGI ETEUATI LETULI

O le tina lea sa faigaluega muamua i le Ofisa o le malo e taua o le ASESRO (American Samoa Economic Stimulus & Recovery Office), lea na ulua’i tuuaia e le malo i moliaga mamafa e 16, ua ia ta’utino i le fa’amasinoga e faamaonia tuuaiga faasaga ia te ia.

O le vaiaso na te’a nei na tolaulauina ai i luma o le faamasinoga maualuga se maliliega na sainia e Fiapapalagi Eteuati Letuli ma le malo, ae ina ua maea ona tolaulauina tuutuuga uma o lea maliliega i luma o le faamasinoga, sa faia ai loa le poloaiga a le faamasinoga ina ia toe tolopo lenei mataupu e toe faaauauina i le aso Tofi o le vaiaso nei.

Na ulua’i tuuaia e le malo ia Letuli i moliaga e mamafa e 8 o le gaoi, atoa ai ma isi moliaga mamafa e 8 o lona faia lea o ni tusitusiga tau faasese, ae i lalo o le maliliega na latou sainia ma le malo, ua ia malie ai e tali ioe i moliaga mamafa e lua, le moliaga o le gaoi ma le faia o tusitusiga tau faasese, ae solofua e le malo moliaga e 14 o lo o totoe ai.

I le tali ioe ai o Letuli i lalo o le maliliega lea ua maea ona latou sainia ma le malo, sa ia tautino ai e faapea, i se taimi o le aso 14 Ianuari 2011 i Amerika Samoa, a’o avea o ia ma tagata faigaluega a le malo o Amerika Samoa, sa ia saunia ai ni faamaumauga mo itula faigaluega a se tagata sa laua galulue faatasi, ina ia faailoa ai o lea tagata o lo o faigaluega ae o le taimi lea o lo o malolo livi ai lea tagata ona o lo o malaga i fafo mo ana talavai, ma ia talaina ai se siaki sa tusia mai i le igoa o lea tagata ma ia faaaogaina le tupe mo ia lava e aunoa ma se faatanaga faaletulafono.

E tusa ai ma faamaumauga a le faamasinoga o lo o taua ai e faapea, o tuuaiga faasaga ia Lefuli na afua mai ina ua talosagaina e le Faatonusili o le Ofisa o le ASESRO le ofisa o leoleo ina ia faatino se suesuega faasaga i lenei mataupu, ina ua masalomia le ua molia i lona faia o ni gaioiga faasolitulafono i totonu o le Ofisa sa galue ai.

Ae pei ona taua i faamaumauga a le faamasinoga, i le va o le aso 14 Ianuari e o o atu i le aso 5 Aokuso 2011, e tusa ma le $7,860.65 le aofa’i o le tupe sa maua mai i siaki na saini faamalosi e le ua molia ma tala e aunoa ma se faatanaga faaletulafono.

O lo o tumau pea tuutuuga a le faamasinoga o lo o tatala ai Letuli i tua, e faatali ai le aso Tofi lea ua faamoemoe e toe fofogaina ai lana mataupu i luma o le faamasinoga.

OTO TUPUA MA DOVIAN SALAVE’A

O ali’i e to’alua ia na tuuaia i lo la faaoolima i se isi ali’i ma manu’a ai, ua la ta’utino i le fa’amasinoga maualuga i le vaiaso na te’a nei e faamaonia tuuaiga faasaga ia te i laua.

O Oto Tupua ma Dovian Salave’a na ulua’i tuuaia e le malo i le moliaga mamafa o le fa’ao’olima i le tulaga lua, ae i lalo o se maliliega sa latou sainia ma le malo, ua la tali ioe ai i le moliaga lea ua toe teuteu e le malo, ina ia faailoa ai le solitulafono mama o le faaoolima i le tulaga tolu.

I le tali ioe ai o Tupua ma Salave’a i le moliaga mama lea e pei ona toe suia e le malo, sa la tautino ai e faapea, sa la faaoolima ai i le alii na aafia ma manu’a ai o ia.

Na tautino Tupua e faapea, i se taimi o le aso 9 Ianuari 2013 i Amerika Samoa, sa ia fesoasoani ai ia Salave’a i le faaoo lea o ni manu’a i le alii na a’afia, e ala i lona ta kikiina o le alii na a’afia a’o taatia o ia i lalo o le palapala.

I le tali ioe a Salave’a sa ia tautino ai e faapea, i se taimi o le aso 9 Ianuari 2013 i Amerika Samoa, sa ia faaoolima ai i le alii na aafia e ala i lona tu’iina o ona foliga i lana moto, ma i’u ina auina atu ai o ia i le falema’i ona o manu’a tuga sa aafia ma tiga ai lona tino.

O le alii o Salave’a e 38 tausaga le matua, ma Tupua e 26 tausaga le matua, o lo o tatalaina pea i tua e faatali ai le aso 31 o Ianuari  lea ua faatulaga e lau ai a laua faasalaga, ma ua poloaina fo’i e le faamasinoga maualuga le Ofisa nofovaavaaia, ina ia saunia se ripoti e tusa ai o tulaga tuga sa i ai manu’a na aafia ai le alii na manu’a, atoa ai ma le pili o le falema’i na totogi ona o lenei fa’alavelave.