O le tagata faigaluega a le malo lea na faa falepuipui e le faamasinoga faaitumalo i le masina o Oketopa 2013 mo le 90 aso, ina ua ta’usala o ia i le moliaga mamafa o le ave ta’avale a’o se’i lona laisene, ua toe molia nei o ia i le isi moliaga e pito sili atu ona mamafa, o le umia faasolitulafono lea o vaega o le laau faasaina o le mariuana.

O le aso 31 Tesema ina ua toe fo’i le alii o Alesana Peko i totonu o le toese i Tafuna, na maua ai se afa sikaleti mariuana i totonu o le taga o lona ofu sa faia, ina ua siaki e leoleo o le toese o ia i le taimi na sauni ai e ulufale atu i totonu o le lotoa.

Pe tusa o le itula e 6:00 i le taeao o le aso 31 Tesema 2013, na tatala ai Peko e alu i tua e faigaluega ma toe foi atu i totonu o le toese, e pei ona talia ai o ia i le polokalame o le ‘work release’.

O Peko ua silia i le lua tausaga o galue i le Matagaluega e Pulea Uafu ma Malae vaalele, o ia o se moa vao i le vaega a le Maintainance Division i le malae vaalele i Tafuna, le Pago Pago International Airport.

Pe tusa o le itula e 12:00, na manava ai Peko mai lana galuega i le malae vaalele, ma aga’i sa’o atu loa i lona aiga i Pago Pago, ma la feiloa’i ai ma se tasi o ana uo, ma tuu ai loa e lana uo ia Peko se sikaleti mariuana ua uma ona taai.

Na vaelua e Peko le sikaleti mariuana, ona ia tuu lea o le isi afa i le latou fale i Pago Pago, ae tuu le isi afa sikaleti i totonu o le taga o lona ofuvae sa fai ma toe aga’i atu ai loa i le toese i Tafuna.

O le alii leoleo faata’ita’i o le falepuipui ia Sam Lili’u ma Lt. Fa’agata na su’eina le tino o Peko i le taimi na taunuu atu ai i luma o le faitoto’a, ma maua ai loa e Lili’u se afa sikaleti mariuana i le taga o le ofu a Peko sa fai.

Ina ua faia se suega faapitoa i le afa sikaleti mariuana sa maua ia Peko, na faamaonia ai o lea sikaleti o lo o i ai lau mamago o le mariuana.

Ina ua fesiligia e leoleo Peko, sa ia ioeina ai lona alu ese mai i le malae vaalele ina ua maea le galuega, ma aga’i atu ai i lo latou aiga i Pago Pago, ma la fetaui ai ma sana uo, ona tuu atu lea e lana uo ia te ia se sikaleti mariuana, ona ia vaelua lea o le sikaleti ma tuu le isi afa i le taga o lona ofuvae sa fai ma alu loa ma ia i le falepuipui i Tafuna.

O moliaga mamafa e lua ua tuuaia ai e le malo Peko e aofia ai le umia faasolitulafono o mariuana atoa ai ma le sola ese ao tatala i tua e alu e faigaluega.

O le ogatotonu o le tausaga e 2013 na ta’usala ai e le faamasinoga faaitumalo ia Peko i le moliaga mama o le ave taavale ‘ona, ma se’i ai loa lana laisene mo le 6 masina, i lalo o tuutuuga, e aua ne’i ona toe aveina se taavale.

I taimi ao faagasolo e matagaluega eseese a le malo le faatonuga a le alii kovana, ina ia tofu le matagaluega ma le faleaoga e tapena ma faamama, na tulai mai ai loa le faalavelave ina so’a e se taavale a le pulega a le malae vaalele na ave e Peko le taavale a le Pulenuu a Tula, ma molia ai loa Peko e le malo i le moliaga mamafa o le ave taavale a’o se’i le laisene.

O le masina o Oketopa 2013 ina ua ta’usala Peko i le moliaga mamafa lea, na poloaina ai loa e le faamasinoga le ua molia na te tuliina aso e 90 i le toese i Tafuna, o se tasi lea o tuutuuga o lana nofovaavaaia e 5 tausaga.

O nisi o poloaiga sa tuuina atu e le faamasinoga ia te ia, e le gata ia aua ne’i ona toe aveina se taavale mo le 12 masina, ae ua faasa fo’i ona ia toe soliina se tulafono, ae i le aso mulimuli lava o le tausaga na te’a nei, na tula’i mai ai loa le faalavelave lea e pei ona toe molia ai Peko i le tulafono.

Ina ua fesiligia e le Samoa News le Faatonusili o le Pulega o Uafu ma Malae vaalele ia Taimalelagi Dr. Claire Tuia Poumele i sona finagalo e uiga i lana tagata faigaluega, na taua ai e le tamaitai faatonu e faapea, e mafai lava ona galue le tagata faigaluega a le malo pe a maua lana ‘work release’, sei vagana lava ua fai e le tagata faigaluega se mea matuia e pei o le umia o fualaau faasaina i totonu o le galuega po o taimi foi o le galuega, ona faatoa fai lea i ai o le faaiuga e faamalolo.

I le mataupu a Peko, saunoa Taimalelagi, sa leai lava se afaina o le faigaluega ai pea o Peko i le matagaluega a le malo e ui o lo o tuli lana faasalaga faafalepuipui e 90 aso.

“E manino lava le tulafono, a maua loa le ‘work release’ a le tagata faigaluega ua falepuipui, ona mafai lava lea ona faigaluega i lana galuega,”o le saunoaga lea a Taimalelagi.

Ae na taua e le pule a Peko i le malae vaalele ia Faafouina Popoalii i le Samoa News e faapea, talu ai e leai lava se isi tagata e faamoemoe i le moaina o le vao ua na o Peko, o le mafuaaga lea sa le mafai ai ona faamalolo Peko mai le galuega, ina ua falepuipui o ia i le tausaga na te’a nei, ae sa tuu ai pea le avanoa e galue ai o ia ma tuli lona faasalaga.

“I lalo o le Ulutala 7.0801 o le Tulafono Toe Teuteu a Amerika Samoa, o lo o taua mai ai le tulaga lenei, e mafai ona sui le tulaga o se tagata faigaluega, faamalolo mo se taimi le tumau pe faate’a fo’i mai lana galuega, pe afai ua le ausia e lea tagata faigaluega le amio e tatau ai mo le galuega; le tusa ai le amio i fafo atu o le galuega e atagia atu ai ma le malo; ta’usala i se solitulafono mamafa, ma faasala ai i le falepuipui mo le 30 aso pe sili atu fo’i; poo lona le usitaia fo’i o ta’iala ua faatula’i e le pulega a le malo e tatau ona amio ai tagata faigaluega a le malo.”