Ads by Google Ads by Google

FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea na faateia ai Kati ina ua faamatala atu e le tamaitai lea o lo o la mafuta tala uma e faatatau i le tagata lenei o Tomasi, le taitai o le au faatupu faalavelave.]

 

Na te’i Kati ina ua faamatala atu e le tamaitai lea ia te ia, o Tomasi, e le gata o le pule lea o le fale talimalo lea o lo o faigaluega ai, ae o ia foi o le taitai o le au faatupu faalavelave uma i totonu o Enelagi, ma soo se tagata lava e faigaluega ia Tomasi, e le mafai e lea tagata ona toe alu ese ma le galuega, aua o le taimi lava e alu ese ai lea tagata, o le a fasiotia o ia atoa ai ma lona aiga atoa. E i ai fo’i penefiti tau tupe e ofo atu e Tomasi ma lana kamupani i ana tagata faigaluega uma lava, ina ia taofia ai i latou mai le toe fia o ese mai lana galuega. Sa na o le nofo o Kati ma faalologo ona taliga i le tala’aga atoa o Tomasi lea ua fofola atu e le tamaitai i ona luma, ma ua talitonu fo’i o Kati, ana le sa’o le fale talimalo na muamua alu i ai, semanu e lamatia lona ola i totonu o Enelagi.

 

E le i toe popole le tama i lana paga lea ua maua i Enelagi, ma ua ia talitonuina fo’i le tamaitai lea ua la mafuta nei, o ia lea o le a ia faailoa atu faamatalaga uma o lo o ia moomia mo lana galuega. Na faailoa e le tamaitai o Ianeta ia Kati, na pau lava le auala e mafai ai ona ia maua Tomasi, o le totogi o sona potu e nofo ai i le fale talimalo taugata lea e latalata i le fale o le tamaloa, o iina e masani ona alu le tagata lenei o Tomasi ma taalo Casino ai, atonu e mafai ai ona ia maua ma saili sona avanoa e fasioti ai o ia. Ua talia e Kati le fautuaga ma ua totogi le potu e nofo ai i le fale talimalo pito taugata lea e i totonu o le isi aai o Enelagi, ona alu loa lea o Kati ua nofo ai ma le lua vaiaso, pau le tulaga lea ua fai nei e le tama, ua sui ona foliga e faaaoga ina ia faigata ai ona iloa o ia, ma ua teu le tama pei lava o teuga a tagata Enelagi milione, ua fiafia fo’i e faatasi atu i le Casino lea e toatele tagata milionea e taaalo ai.

 

I le isi afiafi ao tafao Kati i totonu o le fale e fai ai le Casino, na tei ina ua ia vaaia ni tagata ofu uli ua savavali atu i totonu o le Casino, e le i umi ae vaaia loa e Kati se tagata e laei mama ua alu atu ma lana ato pa’u lanu uliuli, ona valaau lea i tagata uma o lo o i totonu o le Casino e o atu uma i le isi laulau lea e masani ona fai ai la latou pele suipi, o le a fai le latou taaloga, ma sa mulimuli atu ai fo’i ma Kati i le taimi lea, o iina na faatoa iloa lelei ai loa e Kati o le tagata tonu lava lea o lo o ia sailia i totonu o Italia, lea uat oe foi mai i Enelagi. Ua fai le taaloga ma ua vaaia le tele o le tupe e tufa e Tomasi i tagata sa latou taaalo e aofia atu ai ma Kati, o se tagata e agamalu ma aga malie i le tele o taimi, e fiafia fo’i e faauo i tagata uma o lo o taaalo i lana Casino ma nonofo i lona fale talimalo, pau le itu na maitauina e Kati, afai e mana’o Tomasi i se tamaitai i totonu o le Casino, e alu lava ma ia, tusa lava po o se toalua o se isi tagata.