Ads by Google Ads by Google

FAGOGO: POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea na faafuase’i ai ona tulai mai se vevesi i le malae vaalele ina ua fasi e Lasela ma lona aunty Tomboy le tina o Lisati.]

 

Ua le mafai e tagata o le aiga ona pupulu le misa ae ua atili ai ona fai fai tetele ona o lea ua aga’i atu isi fafine o le aiga o Lasela sa i luga o le pikiapu na o atu ai ma fesoasoani i le faatuputeleina o le vevesi, ae na avea le taumafai ane o isi leoleopo o le malae vaalele faapea ai Lisati ma lona tama ma isi tagata o le aiga ma itu na mafai ai ona pupulu le vevesi na tula’i mai, ae fetaui loa fo’i ma le taunuu ane o le Van na o atu ai leoleo lapopo’a e to’alua, ma la tau fesoasoani i le faatoafilemuina o le vevesi. Na pau lava le igoa na taia i le faalogo a alii leoleo, o le igoa o Lasela, o lea na musumusu atu ai loa le alii leoleo o Poe i le isi olomatua o lo o tu tu ai i tafatafa o le vaega tonu sa tupu ai le vevesi, pe na te silafia le tagata e suafa ia Lasela.

 

“Ou ke le iloa se Lasela ea po o mafela, alu e fesili i kagaka lae o a’u lea ou ke kuku ou ke le iloa se mea, pe maka valea ea legei leoleo,” o le tomumu lea a le olomatua ma toe faasaga i le isi itu, ao le alii leoleo o Poe, ua tau totolo ane le tiga o lona logo, ae talu ai o le matua tele o le olomatua, o le mafuaaga lea sa leai ai sana tali na fai atu i ai, ae sa na o le liliu ma toe savali i le isi itu o le malae vaalele ua tu tu mai ai, ae ona vaaia loa lana soa sa la to’alua atu o lo o ia taitaiina atu le lima o se fafine aga’i i le la taavale, ona manatu lea o Poe, le iloa po o Lasela lea ua ta’ita’i atu e lana paga i le taavale.

 

Sei o tatou liliu atu lava i le au malaga ma le au faatali malaga, na matua liua uma lagona o le fiafia i le tamaititi o Lisati ma si ana uo aemaise ai ona matua ma le latou aiga atoa, ona o le faalavelave na faafuasei ona tula’i mai ma aafia ai si ona tina. O le tama’ita’i o Lisa i le taimi lea, ua le malolo lona mafaufau i le saputu o le mau mafaufauga i lona loto, pe aisea lava ua mafua ai lenei faalavelave. “Afai o lea na fai mai Lisati e leai se mea na tupu i lo la va ma le teine lenei i aso a’o la laiti, aisea la ua ita faamoeome ai faapenei le tamaitai ia te ia ma lona aiga,?” o mafaufauga fai vavale ia o Lisa a’o nofo i luga o le nofoa, ae o le isi ona lima o lo o milimili ai le tauau o le tina a Lisati o lo o saofa’i i ona autafa.

 

“Aisea lava ua inaina ai faapea Lasela ia te oe ma lou aiga, ae ua le alu na ia e fai lona olaga ma atina’e lona aiga ua i ai,?” o le fesili fia malamalama lea a Lisa ia Lisati, a’o pisi le tama i le tau tootooina o manu’a o lo o i foliga o si ona tina, e faatali ai le taavale falema’i lea ua umai ona vili, ae o lo o sau mai Motootua. E le i tali Lisati i se upu sei vagana ai le maligi o ona loimata ona o le alofa i lona tina, pau lana faamalosi ia Lisa, aua ne’i avea mea ua tupu ma itu e fo’i ai lona naunau e faataunuu le la polokalame ua uma ona faataoto, o laua e nonofo i Samoa.