Ua sauni le afioga i le alii kovana ia Lolo Moliga e tuuina atu se tala otooto e tusa ai o le tulaga ua i ai le Tamaoaiga o le atunuu i le tausaga atoa ua mavae atu 2013, i le taimi e tatala aloaia ai le tauaofiaga lona 3 a le Fono Faitulafono, mo lana nofoaiga lona 33 o lo o nofoia i le taimi nei.

I le fonotaga a le Kapeneta i le vaiaso na te’a nei, na toe faamanatu ai e le tofa Lolo i Faatonusili ma Faauluuluga o Matagaluega ma Ofisa uma a le malo, ina ia tuuina atu a latou ripoti e tusa ai galuega ma atina’e sa ausia e ofisa taitasi a le malo i le ulua’i tausaga talu ona tulai mai le faigamalo fou, ina ia mafai ai ona tuu faatasia sana ripoti e folasia atu i luma o le Fono pe a tauaofia i se taimi o le masina nei.

I lalo o le Faavae, o le aso Gafua lona lua o le masina o Ianuari i tausaga taitasi e tatala aloaia ai le tauaofiaga a le Fono Faitulafono mo ana galuega masani, ma maua ai loa le avanoa o le kovana mo le tuuina atu o se tala otooto i le tulaga o lo o i ai le tamaoaiga ma le atina’e o le malo, ina ia silafia ai e taitai o le Fono Faitulafono ma ona sui uma.

Na taua e Lolo i luma o le kapeneta e faapea, o le taua o le ripoti lea o le a folasia i luma o le fono i ni nai aso e le o mamao atu, o le a silafia ai e le Fono atina’e tetele sa mafai ona ausia e le faigamalo fou i totonu o le ulua’i tausaga e tasi o lana nofoaiga, atoa ai ma le tulaga o lo o i ai le tamaoaiga o le malo i le taimi nei.

I le ulua’i saunoaga faa kovana a Lolo i luma o le Fono i le masina o Ianuari 2013, sa ia faailoa ai i luma o le Fono le tele o auala e mafai ona galulue faatasi ai le malo ma le Fono, ina ia faaleleia le atina’e ma le tamaoaiga o le atunuu.

I lana saunoaga i lea aso, sa ioeina ai e Lolo le pologa o le atunuu i tulaga faaletonu o lo o i ai auala, ae i le taimi nei, ua tele vaega o le alatele ua maea ona faaleleia ma ua molimauina fo’i e le mamalu o le atunuu suiga lelei i vaega eseese o le alatele.

I le tulaga i le tamaoaiga o le malo e pei ona faailoa e Lolo i luma o le fono i le tausaga na tea nei, e tusa ma le $44 miliona aitalafu a le malo o lo o i ai, ae le aofia ai isi aitalafu e mae’a ona sailiili e le faigamalo.

O ni isi o aitalafu tetele a le malo na faailoa e Lolo i luma o le fono i le tausaga na tea nei, o tupe ua maea ona poloai e le faamasinoga maualuga le malo e totogi e pei o le $6 miliona mo le mu o le Laufou, ae ese ai foi le aitalafu a le malo i le Pulega o le Eletise ma le Suavai e silia i le $8 miliona.

Ina ua tapunia tusi a le malo mo le tausaga tupe tuai ia Setema 2013, na faailoa mai ai e le faigamalo le paleni o le tausaga tupe e aunoa ma se aitalafu, ma o se ulua’i taimi lea ua paleni ai tusi a le malo e pei ona taua e le Teutupe.

Na faailoa e Lolo i lana kapeneta, e leai se avanoa e toe maua ai se isi alofaga mo matagaluega uma ma ofisa a le malo, pe afai ae maea le tausaga tupe lenei 2014 ae mumu le paketi a se matagaluega.

Sa fautuaina foi e le alii kovana faatonusili uma o ofisa ma matagaluega a le malo, ina ia galulue e faatatau i a latou paketi ua uma ona pasia, ma e le tatau foi ona mumu se paketi a se matagaluega i le faaiuga o le tausaga tupe lenei 2014.