Ua faamaonia mai e le tofa Velega Savali Vaeao i le Samoa News i le vaiaso na te’a nei, le fesiligia e se sui o le vaega a le CMS (Centers for Medicaid and Medicare Services) o ia e faatatau i le auala na toe filifilia ai e le Komiti Faafoe a le falema’i o le LBJ i Fagaalu, le susuga i le ali’i foma’i ia Dr. Iotamo Saleapaga.

Ina ua fesiligia e le Samoa News le tofa Velega, o ia fo’i o se totino o le Komiti Faafoe a le LBJ e uiga i lenei mataupu, e le gata sa ia faamaonia mai ai le faafesoota’i atu o ia e se sui o le CMS e uiga i le toe faa faigaluegaina o Dr. Saleapaga, ae sa ia taua fo’i e faapea, e na o ia lava le totino o le Komiti Faafoe na tete’e i le toe faafouina o le konekarate a le ali’i foma’i.

Saunoa Velega e faapea, e i ai mafuaaga maumaututu na mafua ai ona faamalolo e le Pulesili tuai a le falema’i le ali’i foma’i, faatasi ai ma le lagolagosua a sui o le Komiti Faafoe tuai sa i ai, peitai o lea ua toe faa faigaluega e le Komiti Faafoe fou le alii foma’i.

Na taua e Velega e faapea, e i ai lona talitonuga e i ai le mea e le o sa’o i le va lea, e tatau fo’i ona fai i ai se fuafuaga.

E le i faalauiloa mai e le tofa Velega pe na faapefea ona faafesootai atu o ia e le sui o le CMS, ae tali ai o ia o se totino o le Komiti Faafoe, ua ia taua ai lona sauni e tuuina atu faamatalaga uma e manaomia e le sui o le CMS e tusa ai o lenei mataupu.

Na taua foi e le tofa Velega e faapea, e i ai mafuaaga maumaututu na ala ai ona ia teena e le Komiti Faafoe tuai a le LBJ le toe faafouina o le konekarate a Dr. Saleapaga, ae masalo o le faaiuga a le alii kovana e toe faa faigaluega le alii foma’i, na mafua ai ona faia le faaiuga a le Komiti Faafoe e lagolago le faaiuga a le alii kovana.

Ae ina ua fesiligia e le Fesoasoani faapitoa mo le alii kovana le tofa Iulogologo Joseph Pereira, sa ia teena ai le manatu e faapea sa aofia ai ma le alii kovana ia Lolo Moliga i le toe faa faigaluegaina o le alii foma’i ia Dr. Saleapaga.

Saunoa Iu e faapea, afai o lo o i ai se sui o le Komiti Faafoe a le falema’i o lo o fai mai sa aofia ai ma le kovana i le toe faa faigaluegaina o le alii foma’i, e tatau i lea totino o le komiti faafoe ona tuuina atu mau maumaututu e lagolagoina lea tulaga.

Na taua e Iu e faapea, e sili ai le 5 tausaga o la galulue faatasi ma le alii foma’i ia Dr. Saleapaga, ma e leai ma se mea e ono tulai mai ai se faafitauli i le va o ia ma le alii foma’i.

“O se tasi o itu taua e tatau ona silafia e tagata, e na o le alii fomai ia Dr. Saleapaga sa mafai ona ia sainia pepa mo le toe faatumuina mai o tupe mo le CMS, ona, e na o ia le foma’i e i ai le faailoga o le US MS degree, o le toatele o fomai sa faauu mai i aoga faa foma’i i Fiti (Fiji School of Medicine), lona uiga e le agavaa i latou i lalo o ta’iala e mafai ai ona latou sainia pepa mo le toe faatumuina mai o vaega tupe mo le CMS,” o se saunoaga lea a Iu.

Na taua foi e Iu e faapea, i le tele o nisi o mataupu, e na o Dr. Saleapaga fo’i le fomai e mafai ona ia sainia fualaau mo le tuuina mai mo le falema’i, ona e na o ia le foma’i o lo o agavaa i ta’iala e pei ona moomia e le falema’i.

Na taua e Iu e faapea, o se tulaga lelei tele foi pe afai o le sui lava lea o le CMS na fesoogai ma Velega, o ia lava fo’i lea o le a fesootai atu i le alii kovana e tusa ai o ni atugaluga e uiga i lenei mataupu.

faaliliu Ausage Fausia