Na faamanino e le afioga i le alii Senatoa ia Tuiasina S. Esera, o ia fo’i o le sui taitaifono o le Komiti o Femalagaaiga a le malo o Amerika Samoa e faapea, o le mataupu o lo o ia taumafai malosi ai e faatatau i le tau taofiofi lea o le soona ulufale mai o tagata mai Asia i le atunuu, e le o se taumafai e faailoa lanu e pei o le manatu o nisi, ae o lona vaai alofa i le lumana’i o alo ma fanau a le atunuu mo a taeao.

“Ou te le faailoga lanu Amerika Samoa,” o le saunoaga lea a Tuiasina i le Samoa News.

“Pau lo’u agaga o lo o i ai, ia puipui le tulafono tau femalagaaiga a le malo, ma ia mautinoa e leai se tagata mai fafo e manatu mama i le tulafono a le malo o Amerika Samoa,” o le isi lea saunoaga a le alii Senatoa.

Na faamanino auiliili e le afioga i le Sa’o ia Tuiasina i le Samoa News e faapea, e le o i ai sona manatu e taofi motu loa le toe tuuina atu o ni pemita mo tagata mai Asia e ulufale mai ai i le atunuu, ae o lona faanaunauga o lo o i ai, ia sailia uma tagata mai Asia e le o tusa ai lo latou aumau i le teritori (illegal aliens) faapea ai ma isi fo’i tagatanuu mai isi atunuu o le lalolagi ma le pasefika e le o tusa ma le tulafono lo latou aumau ai i le teritori.

“O le tiute o le Komiti Faafoe o Femalagaaiga a le malo, o le puipui lea i le tulafono, ma ia vaavaai i auala e faaitiitia ai le toe tula’i mai o faafitauli i le atunuu e ono aafia ai tulafono tau femalagaaiga,” o le isi lea saunoaga a le alii senatoa.

I le talanoa so o mai ai o le afioga i le alii senatoa ia Tuiasina i le Samoa News i mataupu tau femalagaaiga aemaise ai o tagata mai fafo, ua atagia mai ai, o ia le isi tamalii o le atunuu o lo o popole i ni faafitauli e ono alia’e mai ia Amerika Samoa i le lumana’i, pe afai ae faaauau pea tulaga o le faatupulaia o tagata mai fafo e ulufale mai ma aumau i le teritori.

Na taua e Tuiasina i se talanoaga muamua ma le Samoa News e faapea, “e tasi lava le mafuaaga e ala ai ona faatutu pisinisi fou i le teritori, o le naunau lea ia maua ai ni galuega mo tagata o le atunuu, ae afai loa e tatala pisinisi fou ae aumai i Asia tagata e galulue i avanoa e pei o le tali tupe (cashier) faapea ai ma le teu oloa, lona uiga ua le usitaia le tulafono.”

I le faaiuga o le faatalatalanoaga ma le alii senatoa i le vaiaso nei, sa ia taua ai lona naunau ina ia mafai ona maua uma tagata mai fafo o lo o galulue faasolitulafono i nisi o pisinisi i le atunuu, tagata mai fafo ua maea a latou ID, faapea ai ma tagata mai fafo ua leva ona maea pemita na ulufale mai ai, ina ia fai i ai se fuafuaga ma toe faafoi i o latou atunuu, ina ia mautinoa ai e le o i ai lava se vaega o le tulafono tau femalagaaiga o solia.