TOALUA MALILIU, TOALUA SAILIA PEA

E toalua tagata ua faamaonia ua maliliu ma le isi toalua o lo o tau sailia pea ina ua tafea le taavale sa malaga ai ao taumafai e sopoia se vaitafe i le afioaga o Tiavea i le taeao o le aso Tofi na sei mavae atu nei. Na faaalia e le sui sooupu o leoleo, le afioga Fauono Talalelei Tapu e faapea, o i laua ua faamaonia ua maliliu o se alii e 30 ma ona tupu tausaga ma se tamaititi e lua tausaga le matua. Peitai na ia faaalia, o lo o tau sailia pea se ulugalii matutua sa malaga mai ai i lea taavale.

E le o mautinoa i le taimi nei po o le ulugalii o lo o tau sailia o matua ia o se tasi po o i laua ua maliliu. Na lipotia mai e faapea, o lea aiga na malaga mai le malae vaalele i Faleolo i le vaveao o le aso Tofi ma latou te lei iloa ua atia ma tafea ese se vaega tele o le auala sima e tafe ai lea vaitafe ona o le mamafa o timuga, ma sa faapea ona tafea ai loa ma le taavale.

E tupu lenei faalavelave pe a ma le afa o le tolu i le vaveao ma sa faigata ona faia se gaioiga e laveai ai i laua ua maliliu. E toafitu i latou sa malaga i lea taavale ma e toatolu isi sui o lea aiga sa auina atu i le falemai mo togafitiga.

MAMAFA TIMUGA MA LOLOGA 2014

Ua amata le tausaga fou e 2014 i le mamafa o timuga ma lologa i vaega eseese o le atunuu ma ua tuua ai e nisi o aiga i vaega maualalalo o latou maota, toe motusia ai nisi o auala e agai mai i Apia faapea Salelologa i Savaii.

I lipoti mai Savaii o lo o taua ai le pa o le vaitafe o le Mali’oli’o ma ua taofia ai femalagaiga i lea vaega o le motu tele i Salafai a i latou o lo o fia agai mai i Salelologa. Na lipotia mai e se tasi sa poloka ai i le pa o le Mali’oli’o e faapea, ua matua malosi le pa o le vai ma e foliga mai e pei ua toa’tama’i le vaitafe.

O lea vaitafe na maliliu ai se ulugalii i le tausaga na te’a nei ina ua la taumafai e kolosi le vai i le la taavale ma faapea ona tafea ma maliliu ai i laua. I le taulaga i Apia, ua maitauina le lolovaia o Saleufi, Taufusi, Fugalei ma Matautu-uta. Ua leva ona maitauina le vevela o le tau mai lava i le tausaga na tea nei, peitai o le aso Tofi na sei mavae atu nei na amata ai loa ona timu ma faagasolo mai ai lava i le aso Faraile atoa.

FINAUGA A LE EKALESIA ASO FITU

O lo o fa’aauau pea i le 2014 ia feeseeseaiga a le Ekalesia Aso Fitu o le Toe Afio Mai i le aso tonu e tapua’i ai. E pei ona silafia, o le suiga o aso i le tausaga na te’a nei na suia ai le aso tapua’i a le ekalesia mai le aso Toonai i le aso Sa, ina ua avea le aso Sa ma aso lona fitu o le vaiaso e pei ona finauina e le pulega o le ekalesia i Samoa. Peitai, o lo o tetee nisi sui o le ekalesia lea o lo o tapuai pea i aso Toonai ma ua faaigoaina nei o le Ekalesia Aso Fitu Tutoatasi.

O le aso Tofi na sei mavae atu nei,  na faatoa faamanatuina ai e sui o le Ekalesia Aso Fitu Tutoatasi le tausaga fou. Ua tele tusitusiga i lea mataupu i le va o taitai o le ekalesia mai ia vaega e lua ma ua tuuina atu i le komiti faapitoa ua tofia e le ofisa autu o le ekalesia e iloiloina lenei mataupu. Na taua i le pepa na tusia e se tasi o faifeau a le ekalesia i Niu Sila, le susuga Pastor Neone Okesene, o le faaiuga a le komiti faafoe o le Misiona a Samoa ma Toelau ina ia faamamaluina le aso Sa e avea ma aso lona fitu o le vaiaso, ua fesiligia ai le faamaoni ma le amiotonu o talitonuga ma aoaoga a le ekalesia e faatatau i le aso Sapati.

MANAO LE MAFINE LA TE FAIAIGA MA LONA TAMA

O le vaiaso na tea nei na tulai ai i le Faamasinoga Maualuga se tamaitai ua 30 ma ona tupu ona tausaga ma ia faaalia, o ia na manao la te faiaiga ma lona tama. O le masina o Setema i le tausaga na tea nei na ioe ai lenei tamaitai ma lona tama moni, i le moliaga o le mataifale. Na fesiligia e Faamasino Vui Clarence Nelson lea tamaitai pe aisea ua eseese ai ana faamatalaga na fai i leoleo ma le faamatalaga na fai i le ofisa faanofovaavaaia.

Na fai lea tamaitai i leoleo o lona tama sa manao la te faiaiga, ae fai i le ofisa faanofovaavaaia e faapea o ia sa ia talosaga i lona tama la te faiaiga. Na tali lea tamaitai e faapea, e sa’o lana faamatalaga na fai i le ofisa faanofovaavaaia. Fai mai a ia, e faatolu ona ia talosagaina lona tama la te faiaiga. Na teena e lona tama ana talosaga e lua muamua. Peitai o le faatolu sa ia alu ao moe lona tama ia Me o le tausaga na tea nei, sa la faiaiga ai loa. Na ioe foi i laua i lo la faiaiga ia Iuni o le tausaga na tea nei.

O lenei mataupu na alia’e ina ua lipotia e le toalua o lea tama i le fono a tamalii ma failauga o lo latou afioaga ma lipotia foi i le ofisa o leoleo. E toavalu le fanau a lea tama ma lona toalua. O le aso 20 o le masina nei e lauina ai le faaiuga a le Faamasinoga.

Saunia: Lilomaiava Andrew Fa’asau, Naenae Productions