Ads by Google Ads by Google

VAVAU A SAMOA: FAIGAUO A TUIATUA MA LETUFUGA

O le tala i le Aso nai Tumua, na mafua mai i le faigauo a Tuiatua Faisautele ma Letufuga, fai mai le faamatalaga o se faigauo fealofani ma mafanafana le faigauo a le toalua lea, e naunau lava le isi na te fia faia se mea sili poo ni mea lelei i le tasi, ma o faanaunauga na o alii nei.

 

O Tuiatua, o se tagata e fiafia tele e alu e tiu, ma o nisi o taimi e tele masina o tuua e le alii lona aiga ma si ona faletua, ae alu i ana tiuga, fai mai la le tala, ua oo i le isi aso, ona fai atu lea o Tuiatua i lona faletua o Gaogaooletai, e faatali atu i le aiga se’i alu lana tiuga, ma lana faatonuga i lona faletua, afai e tuai na fo’i mai ae alu atu lana uo o Letufuga e tafao atu, ia alofa i ai ma fai faalelei o ia, ia sua le aulapa-uta, sua le aulapa-tai ina ia faamalieia le finagalo o si ana uo, ma sa usita’i lelei fo’i le faletua i faatonuga uma a lona alii.

 

Sa fesoasoani Gaogaooletai i le tapenaina o le vaa a lona alii mo mea uma e manaomia i lana malaga, ona sauni loa lea o Tuiatua e alu malaga ae ua faamuli atu Gaogaooletai i lo la aiga. A’o nofo le faletua na o ia i le aiga, ua tele aso o alu Tuiatua ma ua tuai ona toe fo’i atu, i le isi aso, na faateia ai le faletua ina ua asiasi atu Letufuga i le fale, ma e le’i alo tamala le faletua i le faiga o faatonuga uma sa faatonu ai o ia e lona alii e fai i lana uo, ma i’u ina nonofo ai loa Lefutuga ma Gaogaooletai. Ua umi aso o le mafuaga, ona ma’itaga lea o Gaogaooletai ia Lefutuga, ae ina ua iloa e le alii ua ma’itaga le faletua a lana uo ia te ia, ona toe sola ai loa lea o le alii i Savaii ae tia’i ai na o le faletua i lona aiga. Ua faagasolo pea aso ona fanau lea o le pepe a Gaogaooletai ae le’i toe fo’i mai lava Tuiatua. O le mea ua tupu, ua tupu le tamaititi ma matua, pau le faafitauli e leai sona igoa e faaigoa ai.

 

Ua oo i le isi aso ao pisi lava le fafine ma lana tama i galuega masani o le aso, na faafuase’i ona vaaia e Gaogaooletai le va’a a lona to’alua ua tuta mai gatai, ona tamo’e fiafia atu lea o le fafine e faafeiloa’i i lona ali’i, ae tamo’e atu ai ma le tamaititi, lana tama ia Letufuga, na oso fiafia mai Tuiatua e faafeiloa’i i lana manamea, ae na te’i ina ua tau atu lana vaai i le tamaititi o lo o tu atu i tafatafa o lona to’alua, ona fesili lea o le alii ia Gaogaoolelagi, “Siaula, o ai lenei tamaititi?”, ae na ata Gaogaooletai ma tali ia Tuiatua e faapea, “Ua galo fo’i ia te oe lau poloaiga sa tuu mai i le aso ete le’i alu ai, ia fai faalelei lau uo pe a sau i le fale, ia sua le aulapa-uta, sua fo’i le aulapa-tai, lea la ua i ai le tamaititi lea.”

 

E le’i pisa Tuiatua ae sa na o le luelue o lona ulu e tusa ai o le tala a lona faletua, ona nonofo ai lava lea o le aiga i lo latou fale. I le isi aso, na faatonu ai loa e Tuiatua lona toalua e tapena le la faiva ma si ona atali’i o le a alu, ma sa usita’i Gaogaooletai e tusa ai o le faatonuga a lona toalua, ua tapena foi mea uma e manaomia i le faiva, ona alu loa lea o le faiva ae faatali atu na o Gaogaooletai i le fale na o ia. A’o alu le faiva, sa vaaia e Tuiatua e ese lava uiga o le tamaitiiti e faaali atu ia te ia. Fai mai ua ina ua oo atu i le tuagalu ae vaaia e Tuiatua le lele mai o le manu, ona valaau atu lea o Tuiatua i le tamaititi e alu ane e seu le manu, ae na te’i Tuiatua ina ua tali atu lona atalii ia te ia, “seu la e a’u le manu ae taga’i oe i le galu,” ma o iina na maua ai le muagagana o lo o faaaoga e le toatele o failauga ia latou lauga e faapea, “Ia seu le manu ae taga’i i le galu.”