Ua tofia nei e le afioga i le alii kovana ia Lolo Moliga le alii loia sili lagolago ia Talauega Eleasalo Ale, e avea ma Loia Sili le tumau.

O le aso Gafua na te’a nei, 30 Tesema 2013 na faatoa aloaia ai le fa’amavaega a le afioga Afoa L.S. Lutu mai le tofiga o le Loia Sili, ae o le aso na sosoo ai na tuuina mai ai loa se poloaiga faalaua’itele mai le alii kovana, e tofia ai le susuga Ale e fai ma Loia Sili le tumau.

I se vaega o le poloaiga a le alii kovana, e le gata o lo o ia faalauiloa ai lona tofia aloaia o Ale e avea ma Loia Sili le tumua mo le malo, ae o lo o taua ai fo’i le amata o lea auaunaga i le aso lava lea, 31 Tesema  2013, ma e tatau ona ia tauaveina tiute ma galuega uma sa tauave e le Loia Sili ua mavae atu, e pei ona faatulaga mai i le tulafono.

O le umi o le tofiga a le alii kovana mo le susuga Ale, faatoa maea i le taimi e faia ai le filifilia faai’u mo se tasi o le a avea ma Loia Sili.

A’o le’i tofia Ale e avea ma loia sili le tumau, sa galue o ia i le vaega o mataupu savili o le ofisa o le loia sili, ma o ni isi o mataupu sa ia tauaveina e aofia ai mataupu savili e faia faasaga i le malo o Amerika Samoa.

E pei ona silafia, o le tofiga o le loia sili sa tauave mai lea e le afioga i le Aloalii ia Afoa ua faamavae nei, ona o lea ua ia taliaina le fa’aaloalo ua tuuina atu i ai e lona itumalo o le Maoputasi, ina ia fai o ia ma o latou sui i le Maota Maualuga, mo le faaauauina o le tofi Senatoa a le itumalo sa nofoia e Faagata Mano Faagata ua tuumalo.

Ina ua fesiligia e le Samoa News le susuga i le alii loia ia Ale e tusa ai o lenei tofiga taua, sa ia faafetaia ai le alii kovana e tusa ai o le valaauina o ia e fai ma loia sili le tumau mo lenei taimi.

“O le agaga faafetai e le faaitiitia i le Atua, ina ua mafai ona tofia au e le kovana ou te tauaveina lenei foi tiute taua, o se tofiga e le faigofie, ae faamoemoe i le Atua e maua mai ai le poto ma le malosi, e faatino ai le auaunaga, faafetai foi i le alii kovana mo lenei tofiga maualuga,” o le saunoaga lea a Ale.

O le susuga Ale na amata galue i le Ofisa o le Loia Sili a le malo ia Fepuari 2012 mo masina e tolu, lea e pei ona galue fua ai mo le malo, ma toe tali atu ai i fafo, ae i le masina o Aokuso 2012, na toe taliu mai ai Ale ma toe galue loa mo le ofisa o le loia sili i lalo o lana konekarate seia oo mai lava i le taimi nei.