O le aso Faraile na te’a nei i le Hall a le Ekalesia Katoliko i Nuuuli sa fa’atautaia ai le fa’au’uga o le to’a 86 o tagata matutua ua mae’a a’otauina i a’oa’oga tau le tulafono, o le soifua maloloina, o ala o le va fealoa’i ma fanau talavou ma isi fo’i tagata matutua i totonu o galuega, o aia tatau a tagata taito’atasi ae maise le fanau talavou e le’i atoa le 18 tausaga, o le soifua maloloina o fanau, ae maise le toe avanoa ua tu’uina i fanau e le’i ausia maka e fa’au’u mai ai i a’oga maualuluga ona o a’afiaga ua solitulafono ai latou olaga talavou.

O nei a’oa’oga uma, ae maise lava o le gagana e ao ina saunoa ai i fetufa’iga ma le fanau talavou, ua mae’a ona tima’ia ai i latou nei.

I le polokalama fa’asolo o le latou fa’au’uga, sa auai atu le ali’i peresetene o le TAMM (Toe Amua Mai Matua), le susuga Petelo Mikaele mo lana vaega o le toe fautua tasi lea i le vasega o tagata matutua, ina ia utagia a’oa’oga ua mae’a fa’ao’aina ai i latou, ia avea ma auupega malosi i le latou feagai ai ma le tupulaga i totonu o a’oga.

“O outou isi mata ma taliga filifilia ua i ai nei ina ia mafai ona outou iloa lelei tamaiti fa’atupu fa’alavelave, o e ua le mafai ona vaoia e le tele o fautuaga a faia’oga ma tulafono fo’i ua mae’a tamau e le Matagaluega o A’oga, ina ia fa’atautaia ai a’oa’oga a fanau i o latou potu a’oga ma lotoa a a’oga, o i latou na e ao ina sao i ai sa outou fautuaga, ma taumafai e fa’atalanoa, pe mata e mafua mai ona fa’apea i latou ona o ni sauaga ma ni omiga e ono toe lamatia ai le ola o lea tamaititi i le lumana’i, fa’atasi ai ma le soifua o nisi e to’atele!”

O le ala lea o le tele o vaega o le malo sa latou tu’u taimi e a’otauina ai lea vasega o matua. Ua tofusia i latou ma avanoa lelei e fa’apupula ma fa’amatala atili aga ma uiga a fanau e sauaina i totonu o latou aiga.

Ina ua mae’a le tima’iga a le tama fa’aleagaga i le sauniga, sa tula’i fo’i Valasi Gaisoa o le o lo’o mafuta lava ma nei matua i a’oa’oga uma o lo’o latou fa’atinoa i aso ta’itasi mo lana saunoaga.

 “Ua mae’a nei la matou vaega na fa’atino ina ia fua mai ni fua lelei a’o tou fa’atinoina faiva ua tofia ai. O la outou matafaioi, ia fua mai ni fua lelei, e pei ona mo’omo’o i ai le Ofisa o A’oga, ae maise ia le toe femisa’i lava fanau. Ia outou sofa’i le pogati le vevesi, ma ia fua mai ni fua o le filemu i le agaga o fanau, ia fealofani i latou tusa lava po’o fa’atauva a’oga i ta’aloga, ia mautu le fa’amoemoe, ia fetufa’i tomai i ta’aloga ia aga’i i luma le malamalama!”