O le ali’i lea sa avea muamua ma leoleo o le malo, lea na faafalepuipui mo le tausaga ina ua ta’usala o ia i le solitulafono o le faaoolima i le 2009, ua toe faafalepuipui fo’i e le faamasinoga maualuga mo faaiuga o vaiaso e lima i le toese i Tafuna, ina ua ta’usala o ia i lona faapa faasolitulafono o se fana.

“E le avea vevesi e tula’i mai i mataupu o eleele ma fanua o aiga Samoa ma auala e faataga ai ona soli le tulafono,” o le feau tuu sa’o lea mai le afioga i le faamasino sili ia Michael Kruse na tuu atu i le alii o John Tialavea ma lana loia fautaua o Sharron Rancourt, ina ua lau le faasalaga o Tialavea i le aso Faraile na te’a nei.

Na manino i le molimau mai le Sa’o o le aiga a le alii ua molia, le tofa Fuata Tagiilima I’atala sa tuuina atu i luma o le faamasinoga, sa ia taua ai e faapea, na avea le taumafai o Tialavea e puipui eleele a lona aiga na soifua ma ola mai ai tuaa i tausaga ua mavae ma itu ua ia soli ai ma le tulafono.

O le vaega foi lea o le molimau a Tialavea i le taimi na faaleo ai lana faatoesega i luma o le faamasinoga, sa ia taua ai e faapea, e tiga lava ona taumafai e toto atu lana faatoaga ma atina’e lona aiga, ae o atu lava tagata o le aiga o lo o latou vevesi i le fanua ma faaleaga mea toto, ma ua oo i le taimi ua tauau ina le lava ai ma lona onosa’i.

O Tialavea na ulua’i tuuaia e le malo i le moliaga mamafa o le faaoolima i le tulaga muamua, faapea ai ma le moliaga o lona faapa faasolitulafono o se fana, ae i lalo o se maliliega sa latou sainia ma le malo ma talia e le faamasinoga, sa ia tali ioe ai i le moliaga mama o lona faapa faasolitulafono o se fana, ae solofua e le faamasinoga  le isi moliaga.

I faamaumauga a le faamasinoga o lo o taua ai e faapea, o se vevesi na tulai mai i le masina o Me, 2012 i le aiga a le ua molia i le itu i Sasa’e o le atunuu, na mafua ai ona ia faapa se fana ina ua ia vaaia ni tagata o lo o galulue mai i le fanua lea o lo o tulai mai ai se feeseeseaiga i le va o le latou aiga ma le aiga o Mamea.

Na taua e Kruse e faapea, i tausaga ua mavae ina ua faatoa galue i le galuega, sa foliga mai ai na avea ma alofaga le tulaga lea, peitai o le taimi nei, e le o toe i ai se alofaga e ono mafai ai ona sao mai se tasi e aafia i mataupu faapenei i se faasalaga e ono tuuina atu i ai e le faamasinoga.

Na faailoa e Kruse i le loia a Tialavea e faapea, e foliga mai e na o le molimau a le aiga o Fuata lea ua tuuina atu i luma o le faamasinoga e uiga i lenei mataupu, ae leai se molimau mai le itu a Mamea e tusa ai o le latou fo’i mau i le mea sa tupu.

O Tialavea na ta’usala e se vaega iloilo iuga i le 2009 i le solitulafono mama o le faaoolima i le tulaga tolu, ma faasala ai loa o ia e le faamasinoga e nofosala i le toese i Tafuna mo le tausaga atoa.

I le mataupu fou e pei ona tausala ai o ia e le faamasinoga, e 5 faaiuga o vaiaso lea ua poloaina e faasala ai o ia i le toese, o se tasi lea o tuutuuga o lana nofovaavaaia e 2 tausaga, ma o le itula e 4:00 i le afiafi o le aso Faraile na te’a nei na amata tuli ai le faasalaga a Tialavea, ae toe tatala i tua i le itula e 4:00 i le aso Sa na te’a nei mo le umi e lima faaiuga o vaiaso sosoo.

O isi tuutuuga o le nofovaavaaia a Tialavea, e aofia ai lona auai i ni aoaoga e fesoasoani ai i le tulaga o le ita vave, atoa ai ma le faasa lea ona ia toe taumafai e faafesootai le aiga o Mamea sa aafia i lenei mataupu.