E ui i le tele o mafuaga e manatu nisi o lo o mafua ai ona sosola i tua pagota mai le toese i Tafuna, peitai na faa faigofie e le Komesina o Leoleo le tali o lea fesili ina ua asiasi atu le alii Kovana Sili i le toese i Tafuna i le aso Lulu na te’a nei, ma ia faailoa i ai e faapea, “o leoleo lava o le toese o lo o mafua ai ona sosola i tua pagota.”

O le saunoaga lea a William E. Haleck na tuuina atu i le alii kovana ia Lolo Moliga ma nisi o sui o lana kapeneta, i se talanoaga puupuu na faia a’o le’i taamilo le alii kovana e asiasi i totonu o falepuipui o lo o loka ai pagota.

Na taua e Haleck e faapea, o se tasi o mafuaaga ua mafai e le matagaluega ona mataituina o lo o mafua ai faafitauli nei, o le le tausisia lea e leoleo o le falepuipui o tulafono ma ta’iala e tatau ona faia.

Mo se faataitaiga e pei ona saunoa Haleck, e leai se pagota e tatau ona toe tatala i tua mai le sela o lo o loka ai pe a ta le itula e 6:00 i le afiafi o aso uma, ae o le faafitauli lea ua latou maua, e i ai leoleo o lo o latou tatala pagota i tua i le taimi lea e o fai a latou feau ma fai faatau.

“Ona oo lea i le po ua moe leoleo ae maua ai loa le avanoa o le pagota e sola i tua,” o le saunoaga lea a Haleck.

Ae ina ua fesiligia le alii komesina po o i ai se gaioiga a le matagaluega o leoleo o fai i leoleo o le toese o lo o aafia i lea tulaga, na tali Haleck, o lo o faagasolo i ai suesuega a le matagaluega i le taimi nei.

Na ia faaalia atili e faapea, e i ai leoleo o le falepuipui o lo o faia i ai ni suesuega faalotoifale a le matagaluega (Internal Investigations) ona o tuuaiga o lo o aafia ai latou, ma e le o toe umi se taimi ae mae’a suesuega o lo o faia, ona laa atu loa lea o le matagaluega mo le faia i ai o sana faaiuga, fuafua i se ripoti o le a tuuina atu i suesuega o lo o faia.

Ae mo le taimi nei e pei ona saunoa Haleck, e toatasi le isi leoleo o le toese ua faamalolo mai lana galuega, ma le isi toatasi ua faasala e malolo mo le 30 aso e aunoa ma se totogi, ae o lo o faagasolo lem pea suesuega i isi leoleo.

E le’i faailoa mai e Haleck po o ai igoa o leoleo o lo o aafia i faaiuga e pei ona ia taua, ae ina ua fesiligia e le alii kovana poo i ai se gaioiga a le matagaluega o faia ina ia foia ai le toa laiti o le aufaigaluega o lo o galulue i le toese, na saunoa ai Haleck e faapea, e to’afitu leoleo fou mo le toese o lo o fuafua e amata a latou aoaoga i se taimi e le o toe mamao, o i latou ia o le a fesoasoani i le faafitauli o le le lava o le aufaigaluega o lo o i ai i le taimi nei.