MALAGA LE PALEMIA I LE FONO A LE ACP I PELESEUMA

Ua malaga atu nei le afioga i le alii palemia, le susuga Tuilaepa Lupesoliai Sailele Malielegaoi,e auai i le fono lona 98 a minisita o le fono a atunuu Aferika, Karipiane ma le Pasefika, lea e faia i Peleseuma mai le aso 9 e oo atu i le aso 11 o le masina nei.

O lea fono o le a taitaia e le afioga i le alii palemia i lona tulaga o le peresetene o lea faalapotopotoga, le ACP. E taua tele lea fono mo le faamalosia pea o le faiga paaga a Samoa ma le Iuni a Europa (EU). E tele fesoasoani ua tuuina mai le Iuni a Europa e fesoasoani i le atinaeina o Samoa.

O le aso Tofi na sei mavae atu na tuuvaa atu ai le afioga i le palemia faatasi ai ma le ofisa sili o le Matagaluega o le Va i Fafo ma Fefaatauaiga, le afioga Aiono Mose Sua, faapea le faatonu o le nusipepa o le Savali, le afioga Tupuola Terry Tavita.

SUESUE LE SUPAVAISA O LE SPORTSLOTTO I LE GAOI

O lo o suesueina nei i le Faamasinoga le mataupu o lo o molia ai se tamaitai sa avea ma supavaisa o le kamupani o taaloga o matematega, le Samoa Sports Lotto, ao faigaluega ai i le lala o le kamupani i Salelologa i Savaii.

O lea tamaitai o Nora Neemia, 27 tausaga le matua mai le afioaga o Sili i Savaii, o lo o teena moliaga 51 o le gaoi ao avea ma tagata faigaluega faasaga ia te ia. O le $31,000 o lea tinoitupe o teugatupe ia mo le taaloga o le Sportslotto, ao le isi tupe e silia i le lima afe tala, o le tupe a le taaloga o le Samoa National Lotto. O lo o masalomia na amata faatinoina lea solitulafono mai le tausaga e 2009. Na teena e Toomata ia tulaga uma ma sa ia faailoa, e ese le mafuaaga na faamalolo ai o ia, ae o le ua molia sa ia vaaia atoa le tulaga tau tupe o le lala i Savaii.

E lei tulai le ua molia e fai sana faamatalaga ae e atagia mai i ia suesuega e i ai nisi tagata o le kamupani e ono aafia ai. O lo o faaauau pea lea mataupu i le Faamasinoga Maualuga.

SAUNIA E LE SPREP SIKOLASIPI E ALOAIA AI LUI BELL

Ua faalauiloa nei se avanoa sikolasipi a le ofisa o le siosiomaga o le Pasefika, le SPREP, ua faaigoaina o le Lui Bell Post Graduate Scholarship, e aloaia ai se tasi o tamalii Samoa ua faiilagi le folauga sa faigaluega ai i le SPREP, le susuga ia Lui Bell, ona o lana tautua i suesuega faasaienisi i mataupu tau ogasami.

O lenei avanoa sikolasipi o le a mafai ona agavaa ai alo ma fanau aoga mai atunuu eseese o le Pasefika e aooga fua ai e saili ai a latou tikeri ma faailoga i mataupu tau saienisi e patino i meaola o le sami. i le faalauiloaina o lea avanoa sikolasipi, na saunoa ai le faatonu o le ofisa o le SPREP, le susuga David Sheppard, o se tasi lenei o vaega taua o galuega a le latou ofisa ma e $20,000 le tinoitupe ua faaagaaga e faatupe ai lea avanoa sikolasipi mo alo ma fanau e toatolu o le a faamanuaiaina ai i le tausaga fou.

O le susuga Lui Bell sa taulamua i le faasaoina o meaola o le sami e i ai le laumei mai le soona fagotaina, aemaise le faatamaia e meaola ma tagata o fuamoa o lea i’a pe a tuufua i matafaga.

MOLIA LE LEOLEO PO I LE TALEPE FALE MA LE GAOI

Na ioe se alii leoleo po o se faletalimalo o Tupolata Tupolata mai Sapo’e, Falealili, lona moliaga o le talepe fale ma le gaoi ma aveesea ai ni mea totino a le faletalimalo o le Samoana Island Resort i Matatufu, Falealili.

O lenei alii e faigaluega ai i le faletalimalo ma sa ia taupulepule ma nisi alii e toalua o Saito Ioatua ma Sisigafu’a Tufua e faigaluega ai foi i lea faletalimalo, latou te gaoia ni mea totino a le faletalimalo. O le aso foi lea na faate’a ai le alii leoleo po. E lata i le $200 le tau atoa o ni fagu malosi na aveesea mai le faletalimalo faatasi ai ma se tinoitupe e $150.

Na ioeina foi e le isi toalua sa auai i lea soligatulafono ia o la moliaga, ma sa faatonuina e le Faamasino le alii o Saito Ioatua e totogi le tinoitupe e $400 i le Faamasinoga, a leai e lua masina e taofia ai i le toese. Ua nofo vaavaaia nei i latou mo le tausaga atoa.

TATALA LE OFISA FOU O LE 2AP I LE MASINA NEI

Ua faamaonia e le Kapeneta le polokalama mo le tatalaina aloaia o le fale fou a le ofisa faasalalau o le 2AP, Le Siufofoga o Samoa i Mulinuu, i le aso Tofi le aso 19 o le masina nei i le Itula e 3 i le aoauli.

O le saunoaga autu o le aso o le a fofogaina e le afioga i le palemia, ae o le minisita o le Matagaluega o Fesootaiga ma Faamatalaga Tekonolosi, le afioga Tuisugaletaua Aliimalemanu Sofara Aveau, o le a ia ootiina le lipine. O le susuga i le Faafeagaiga EFKS i Fagalii, le susuga Iupeli Ieremia o le a taitaia le sauniga lotu.

O le a toe faamanatu ai i lea aso le amataga mai o le tautua a le leitio o le 2AP faapea le manatua ai o i latou sa faia lea tautua i tausaga ua mavae, o nisi ua faiilagi le folauga.

Saunia: Lilomaiava Andrew Fa’asau, Naenae Productions