E foliga mai o le isi laasaga lea o le a la’a atu i ai le malo e faamalosia i le taimi nei, o le faamalosia lea o le tulafono e faatatau i tagata o lo o avea ma sponsor o i latou uma mai fafo o lo o taofia i le toese i Tafuna, ina ia mautinoa o lo o tausisia ma usitaia a latou tiute tauave e pei ona manino i lalo o le tulafono.

I se ripoti mai le pulega o le falepuipui sa tuuina atu i le alii kovana ia Lolo Moliga i lana asiasiga i le falepuipui i le aso Lulu na te’a nei, sa taua ai e ta’ita’i o le toese e faapea, o le toatele o tagata o lo o taofia i le toese i le taimi nei o tagata mai fafo, ma, ana faamalosia le tulafono e alu atu ai le sponsor e tausi ma fafaga le tagata na ia aumaia, atoa ai ma le totogiina o le pasese e toe faafo’i atu ai i lona atunuu, atonu e le tele se tupe alu a le malo i le tausiga o pagota uma o lo o taofia i Tafuna.

O le taimi nei, e to’a 215 le aofa’i o pagota o lo o taofia i le taimi nei, ma o se aofaiga na taua e le komesina o Leoleo ia William E. Haleck ua “ova naua,” pe a fuafua i le lapopo’a o fale o lo o tausi ai latou.

Na faailoa e le alii kovana i le komesina ma le pulega a le toese i le vaiaso nei e faapea, e tatau ona tuuina atu le lisi o tagatanuu uma o Amerika Samoa o lo o latou sponsor ina pagota mai fafo o lo o taofia i le toese, se’i latou vaavaai i ai ma tau fai i ai se fuafuaga.

Ina ua fesiligia e le Samoa News le alii loia ia Eleasalo Ale, lea fo’i sa auai i le asiasiga a le kovana i sona finagalo e uiga i le mataupu e faatatau i sponsor, na saunoa ai le alii loia e faapea, afai lava o lo o fai mai le tulafono e tatau i le sponsor ona totogi pili ma vaega tupe uma e nofo aitalafu ai le tagata mai fafo, lona uiga e tatau ona usita’i le sponsor i le tulafono.

O nisi o mataupu e faatatau i tagata mai fafo o lo o tofu atu i luma o le faamasinoga faaitumalo i nisi o taimi, o le fiu lea e faatali le taimi e totogi ai le pasese e toe fo’i atu ai le tagata mai fafo i lona atunuu, ona emo ane lea ua toe totogi e tagata o aiga o i latou o lo o molia.

O le finagalo o le alii kovana ia Lolo na faailoa i le pulega o le toese atoa ai ma le alii komesina, afai e foia le faafitauli  e pei ona tulai mai i tagata mai fafo, ma tula’i mai a latou sponsor e faatino a latou tiute i lalo o le tulafono, e le gata o le a faaitiitia tupe alu a le malo e tausi ai i latou nei, ae o le a vave foi ona gaogao le toese, ona o nisi o i latou o lo o taofia ai i Tafuna o tagata o lo o faaletonu o latou pepa nofomau, ma o lo o manaoima vave toe faafoi i o latou atunuu, nai lo le nonofo umi ai i totonu o le falepuipiu.

I lalo o le Tulafono Toe Teuteu a Amerika Samoa (41.0408) (e) o lo o manino mai ai le tulaga lea, “soo se sponsor na te aumaia se tagata mai fafo ma aumau i le teritori o Amerika Samoa, e tatau ona totogi e lea sponsor pili o le falema’i mo lea tagata, lafoga, femalaga’aiga e toe fo’i atu ai le tagata mai fafo i lona atunuu, totogi o le aoga, totogi o le loia fautua, atoa ai ma isi lava tupe e nofo aitalafu ai le tagata mai fafo ma lona aiga i tagatanuu o Amerika Samoa.”