O le grandfather amio valea e 64 tausaga le matua lea na ia faia uiga mataga i ana grand daughters e to’alua, e ala i lona tagotago i o la itutinosa, ua faasala e le faamasinoga maualuga e taofia i le toese i Tafuna mo le 10 tausaga i le taeao ananafi, ina ua ta’usala o ia i moliaga mamafa e lua o lona faia lea o uiga mataga i ni fanau e laiti i lalo o le tulafono.

O le faasalaga o le solitulafono e tasi e pei ona ta’usala ai le ua molia, e mafai ona faasala ai se tagata i le falepuipui i le umi e amata mai i le 10 tausaga ae le sili atu i le 30 tausaga.

E ta’i 10 tausaga i le moliaga e tasi na manatu le faamasinoga e faasala ai le ua molia, ae talu ai nisi o itu lelei sa maitauina e le faamasinoga mo ia, ua manatu ai alii faamasino, o le a tuli faatasi lana faasalaga i le toese, lona uiga e na o le 10 tausaga e loka ai o ia.

Na toeititi leai se isi i totonu o le teritori nei e le’i afea e le ua molia i lana faatoesega, na amata mai lava i le kovana sili ma le lutena kovana ma la faletua le faatoese, ma faasolo atu ai i faamasino, loia, aiga na lua, ekalesia ma lona nuu, aemaise ai o lona toalua ma lana fanau, ae mulimuli i tamaitai laiti e toalua na aafia.

Na taua e le ua molia e faapea, ua ia lagona le sese o lana solitulafono sa faia, ma ua ia aoaoina fo’i se lesona taua mo lona olaga.

Na taua e lona toalua i lana molimau e faapea, o le ua molia o se tama e tausi aiga lelei, e faamoemoeina i totonu o le aiga, e loto alofa fo’i i lana fanau. E anoanoa’i isi itu lelei na faailoa e le fafine i luma o le faamasinoga e faatatau i lona toalua, ma faaiu ai loa lana faatoesega i lona talosagaina o se isi avanoa e toe fo’i atu ai lona toalua i lo latou aiga.

Na finau le loia a le malo ina ia faasala le ua molia i le faasalaga pito sili ona mamafa o lo o faamanino mai e le tulafono.

Saunoa le alii faamasino sili ia Michael Kruse e faapea, o le solitulafono ua ta’usala ai le ua molia, o se solitulafono pito sili lea ona matuia i totonu o Amerika Samoa, e pei ona faamamafa mai e le Fono Faitulafono.

O tuuaiga faasaga i le ua molia, na alia’e mai ina ua ia taumafai e tagofia itutinosa o ana grand daughters e to’alua na aumai na te faatamafaiina, ma avea ai loa ma itu na o ese ai tamaitai mai lo latou aiga ae aga’i atu i le fale o le latou faifeau ma faailoa i ai le mea ua tupu, ma mafua ai loa ona oo atu le mataupu i le ofisa o leoleo.

Saunoa Kruse e faapea, o le itu e pito sili ai ona matuia ai ituaiga solitulafono nei, o le aafia ai o fanau e laiti i lalo o le tulafono, aemaise lava i latou e i lalo o le 12 tausaga.