O se tasi o mafuaaga na ala ai ona asia e le alii kovana ma nisi o sui o lana kapeneta le toese i Tafuna i le aso Lulu na te’a nei, o le vaavaaia lea o le nofoaga ua fuafua e fausia ai le falepuipui fou, i le nofoaga tuai lava o lo o i ai le toese i le taimi nei.

O se tasi o manatu ua mafua ai ona naunau le tofa Lolo Moliga e faanatinati loa le fausiaina o le falepuipui fou, ina ia taofia ai le faafitauli lea ua maitauina le faatupulaia i le toese i le taimi nei, o le sosola lea i tua o pagota.

O le falepuipui fou lea o le a fausia e pei ona faamaonia mai e le faatonusili o le Matagaluega o Galuega Lautele a le malo ia Faleosina Voight, e $3.5 miliona lona tau, e foga falelua, e to’a 180 pagota e mafai ona nonofo ai.

O se tasi o mataupu na faailoa e le pule tuai o le falepuipui ia Cpt. Lumana’i Maifea i le alii kovana ina ua taunuu lana asiasiga, o le faaletonu o fale o lo o nonofo ai pagota, atoa ai ma le pa o lo o si’omia ai le lotoa, o le mafuaaga lena o le sosola soo o pagota.

“O le mea o lo o nonofo ai pagota i le taimi nei, e mafai ona ou faapea atu, e le o leaga, e le o lelei, ae o lo o faaletonu, o le isi lena mafuaaga o le sosola soo o pagota, e le mautu fale e nonofo ai ma le pa o lo o si’omia ai le lotoa,” o le saunoaga lea a Maifea i le alii kovana.

Ina ua faailoa e Maifea i le alii kovana tulaga faaletonu  o le falepuipui, na saunoa ai loa le alii komesina o leoleo ia William E. Haleck e faapea, o lo o i ai se fuafuaga a le matagaluega o leoleo, e fausia se falepuipui le tumau e vaelua i ai pagota o lo o taofia i totonu o le Bravo Units, ina ia faaitiitia ai le faafitauli o le to’atele o pagota o lo o nonofo ai i totonu.

Ae na saunoa le alii kovana, na te le taliaina le fuafuaga e fausia se falepuipui le tumau e vaelua i ai pagota.

“Ou te le mana’o e fai le mea lena, o le atili ai lena ona matuia le faafitauli o lo o tula’i mai, ae ua tatau ona fai se auala mautu e foia ai le faafitauli,” o le saunoaga lea a Lolo i le komesina ma i latou uma sa i ai i le asiasiga, ma ia faatonuina ai Voight ina ia avatu ni ana tama faigaluega e galulue i le faaleleia o faaletonu o lo o tulai mai i falepuipui tuai o lo o i ai nei, ae se’i amata ona faataoto fuafuaga mo le fausiaina o le falepuipui fou.

“Ou te mana’o ia fau se falepuipui e tali ai le manaoga o lo o tulai mai i le taimi nei atoa ai ma le lumana’i, aua nei tatou fausia se fale e foia ai na o le faafitauli i le taimi lenei, ma ia fai le galuega ia lelei ma gafatia i le tupe o lo o i ai,” o isi ia saunoaga a le alii kovana ia Faleosina ma Haleck.

E tusa ai o le fuafuaga na faalauiloa e Voight i le alii kovana, o le vaega tonu o lo o i ai le falesa a pagota i le taimi nei ma faasolo atu i tua i le itu o lo o i ai le Falepuipui a Tamaiti (Juvenile Detention Center), o iina lea ua fuafufa e fausia ai le falepuipui fou.

O totonu o lea falepuipui fou o le a u’amea uma moega ma mea uma e faaaoga e pagota, o le a le toe vaaia ai ni moega laupapa e tu’itu’i i fao e pei ona vaaia i le falepuipui o lo o i ai nei, ona o isi nei auala e le tatau ona i ai i totonu o falepuipui, o ni mea e ono mafai ona faaaoga e le isi pagota e osofa’i ai le isi pagota.

O le fonotaga a le kovana ua faamoemoe e faia i le itula e 9:30 i le taeao nei, o le a toe faamautuina ai le tulaga e faatatau i le falepuipui fou, aemaise ai o le talanoaina o auala e foia ai faafitauli o lo o tutupu mai i le toese.

O i latou o le a auai i lea fonotaga e aofia ai le Komesina o Leoleo ma le Komesina Lagolago, Pulega o le Toese i Tafuna, Ofisa o le Loia Sili, Ofisa o Femalagaaiga, faapea ai ma Faleosina.