O le talitonuga lenei o nisi o afioaga i le atunuu, i auala na mafua ai ona maua igoa o nuu, mauga ma eleele i nisi o nuu i Upolu ma Savaii, e mafua mai i mea sa tutupu ai i aso ua mavae, e aofia ai la nisi o vaega sa tutupu i A’ana ma Fa’asalele’aga, lea e mafua ai lenei tala.

Na mafua le taua i le va o A’ana ma Fa’asalele’aga, ona ua toe taumafai le Tuia’ana ina ia toe maua atu e ia le pule lea sa ia Letufuga, ma ia manatu ai loa o le a sii le taua i Fa’asalele’aga, ma i’u ina amata ai loa le taua ina ua malaga le Tuia’ana i Fa’asalele’aga ma amata loa ona ia faasaga e fasi ma faasaua tagata.

E fai sau’aga a le Tuia’ana i tagata o le Fa’asalele’aga, ao le taimi lea o lo o seu lupe le alii o Letufuga i le vao, ma e fetaui lava le tilotilo atu o lana soaseu i tai, ae fao loa i lalo taliga o alii o le nuu, ona fesili lea o le soaseu ia Letufuga poo le a le mea ua tupu ua mafua ai ona fao i lalo taliga o alii o le nuu, ae tali Letufuga, o Aana le la ua ia sasa ma faapologa tagata o le itumalo, ona maua ai lea iina o le upu “ua tafafao taliga o Tufugauli.”

E lei umi ae sulu atu tagata Faasaleleaga i le vao o lo o seu ai Letufuga i le fia ola, ma e lei toe faatali ai loa iina ia Letufuga ae ua amata loa le taua ma Aana e faaola ai ona tagata, ua sau lava le taua ma ua oo i le mea e igoa o Vaia’ata. A toulu tagata i lalo ona fai atu lea o le soaseu ia Letufuga, vaai i tagata e pei e feata mai i lalo o le vai, ona fai atu lea o Lefutuga, faaigoa le mea lenei o Vaia’ata e faamanatu ai lau tala lena ua fai mai.

Ualu pea le taua ua oo i le mea e igoa o Masa, ma ua latalata lava i le Ituotane, ona toe liliu mai lea ua elo tagata, ona faapea lea o le soaseu, “ua masa le mea”, ona fai atu lea o Letufuga i lona soaseu, “Ia faaigoa le ogaeleele lenei ia Masa, e faamanatu ai le manogi leaga ua ta faalogoina.” Ua faaauau pea le taua ma ua sopoia atu le mauga o Vaiola, ma o iina na fai mai ai le talitonuga, na amata ai loa ona leaga le amio a le alii, i lona maua lava o ona fili ma olo gutu i le palapala, ma o iina na mafua ai ona maua le igoa o le mauga o Vaiola, o le “Mauga o Olo,” ae ina ua latalata atu le taua i Futiga, le fasi eleele lea e latalata i Logoipulotu, fai mai o iina na tula’i mai ai loa le faalavelave ina ua gau le laau seulupe a le ali’i, le laau o le “Ma”, fai mai ona faaaoga ai loa lea e le alii ona lima e uu ai le isi tagata ae ta i le isi tagata.

Faaauau atu i le vaiaso fou le vaega faaiu o le tatou tala lenei. Soifua.