Ads by Google Ads by Google

Tele pagota mai fafo uma ona tuli faasalaga ae ua mumusu toe fo’i

O se tasi o faafitauli o lo o fetaia’i ma le toese i Tafuna i le taimi nei, e pei ona faailoa e le pule tuai o le falepuipui ia Cpt. Lumana’i Maifea i le alii kovana sili ia Lolo Moliga, o le to’atele lea o tagata mai fafo o lo o taofia i totonu o le toese.

 

“O nisi o i latou nei ua uma ona tuli faasalaga faafalepuipui ae ua mumusu e toe fo’i i o latou atunuu, ae o isi fo’i o lo o taofia i le toese ona o mataupu a le Ofisa o Femalagaaiga, ma ua avea ma avega mamafa i le pulega a le toese le tausiga ma le vaavaaia o i latou nei, ae le o se latou tiute lea i lalo o le tulafono,” o le saunoaga lea a maifaea.

 

Ina ua fesiligia e Lolo le susuga Maifea i le tulaga o lo o i ai tagata mai fafo o lo o taofia i le toese, na taua ai e Maifea e faapea, o le toatele o tagata mai fafo ua maea ona lau a latou faasalaga i luma o le faamasinoga, o lo o aofia ai le poloaiga a le faamasinoga e toe faafoi ai i latou i o latou atunuu na o mai ai.

 

Sa ia toe faamanino atili e faapea, o le isi faafitauli o lo o tula’i mai, e le mafai e ia (a’o avea ma pule o le toese i Tafuna) ona faafo’i se tagata i lona atunuu e aunoa ma se tusi folau poo se ticket i le vaa e mafai ai ona toe fa’afo’i.

 

Na taua e Maifea le igoa o se alii pagota ua uma ona tuli lona faasalaga faafalepuipui, ma ua tatau ona toe faafo’i i Toga e tusa ai ma le faaiuga a le faamasinoga, peitai e oo mai lava i le taimi nei e le o i ai se tusi folau poo se ticket e mafai ai ona alu ese le tagata lea.

 

E lei faailoa e Maifea i le alii kovana, po o i ai ni tusi folau a pagota mai fafo ia ua uma ona tuli faasalaga ae ua mumusu e toe fo’i.

 

O le umi ona taofia o pagota i le toese ae ua maea ona tuli a latou faasalaga, o se tasi lea o itu o lo o atugalu i ai le alii kovana.

 

Saunoa Lolo, e tatau ona vaavaai toto’a le malo i tulaga o aia tatau o tagata nei, po o lelei ona puipui i lalo o le tulafono.

 

Ae na saunoa Maifea e faapea, na avea le tuai ona faafo’i o se alii mai Toga o lo o taofia i le toese, ma itu na vili atu ai se loia mai le ofisa o le loia sili i ni nai vaiaso e le’i mamao atu, ma otegia o ia, pe aisea ua tuai ai ona toe faafo’i le pagota i lona atunuu o lea ua uma ona tuli lona faasalaga.

 

Fai mai Maifea, ana ia le ta’uina i le loia e le o i ai se tusi folau ma se ticket e le toe fo’i ai le tama i Toga, e le faamalie atu le loia ia te ia ma fai atu, o le a ia toe vaavaai i le mataupu a le alii lea.

 

O le faafitauli na taua e Maifea o lo o fetaia’i ma le toese i tagata mai fafo, o tagata e loka atu e le Ofisa o Femalagaaiga, ona taofia ai lea lava i le toese e faatali ai le taimi e toe fa’afo’i ai le tagata i lona atunuu, ae alu ai le meaai ma le taimi o le toese e fafaga ma tausi ai latou, e aunoa ma se tupe a le toese o lo o maua atu ai i le Ofisa o Femalagaaiga.

 

O le fautuaga sa tuuina atu e le pule le tumau o le toese ua tofia nei ia Cpt. Fo’ifua Fo’ifua Jr sa tuuina atu i le kovana ma le Komesina o Leoleo ia William E. Haleck, e tatau ona toe vaavaai i le tulaga e faatatau i ‘sponsor’ na aumaia tagata mai fafo, ina ia toe faamanino atili i ai a latou tiute i lalo o le tulafono, lea e aofia ai le tausiga o le tagata mai fafo na ia aumaia a’o i ai i le teritori.

 

Sa fautuaina e Lolo le puleaga o le toese e tuuina atu le lisi o tagata mai fafo uma lava o lo o taofia i le toese, sei vaavaai i ai le kovana ma tau fuafua se auala e faafesoota’i ai a latou sponsor e uiga i o latou tiute i lalo o le tulafono.