Ads by Google Ads by Google

Galulue Samoa e lua atia’e ma faalelei tulaga o le tamaoaiga

O le vaiaso na te’a nei na sainia ai se maliliega (MOU) i le va o Samoa e lua, ina ia galulue soosoo tauau mo le faaleleia ma le atina’eina o le tamaoaiga i le va o Amerika Samoa ma Samoa.

 

O lea maliliega na sainia lea i le va o le ‘Samoa Chamber of Commerce & Industry’, i lalo o le taitaiga a le perestene, le afioga Namulauulu Sami Leota, ma le ‘American Samoa Chamber of Commerce’ i lalo o le taitaiga a le alii taitai fono ia David Robinson.

 

E lua aso o se faaaliga sa usuia i Samoa i le vaiaso na te’a nei, lea na autu i auala e atina’e ma faaleleia ai pisinisi i totonu o Samoa e lua, ma o nisi sa mafai ona auai i lenei fonotaga e aofia ai sui o pisinisi i Samoa faapea ai ma Amerika Samoa nei.

 

Na taua e le afioga Namulauulu i se ripoti na faasalalauina e le TV3 a Samoa e faapea, o le taua o le galulue faatasi o malo e lua i lenei faamoemoe, o se auala lea e mafai ai ona faaleleia le tamaoaiga i totonu o le malo atoa ai ma pisinisi lotoifale.

 

Sa ia faafetaia fo’i le susuga ia Robinson i le mafai lea ona auai i lenei fonotaga, ua mafai ai ona fetufaa’i metotia e faamalosia atili ai le tamaoaiga o pisinisi ma malo e lua.

 

“I lo’u talitonuga, e le mafai ona malosi le tamaoaiga o se malo pe afai e le lelei ona atina’e ana pisinisi lotoifale, ae mafai fo’i ona malosi le tamaoaiga o pisinisi lotoifale pe afai e tutu faatasi tagata faipisinisi ma le malo e saili auala e faamalosia ai lea atina’e,” o le saunoaga lea a Namulauulu i luga o le TV3 a Samoa.

 

O se kopi o le MOU na mafai ona maua e le Samoa News o lo o faalauiloa ai nisi o vaega taua e pei ona malilie i ai itu e lua.

 

I le faatomuga o le MOU o lo o taua ai e faapea, e talitonu malo e lua, o le galulue ma le fetufaa’i faatasi o metotia ma mafaufauga, o le a mafai ai ona televave le tupu o le tamaoaiga i le va o malo e lua. I le faataotoina ai o Ta’iala mo le Galulue faatasi o itu e lua:

 

• Ua malilie ai ina ia faalauiloa auala eseese e mafai ai ona unaia le tamaoaiga ina ia vave faatupulaia i totonu o Samoa ma Amerika Samoa, e le gata i tulaga tau i fefaatauaiga ae o le fetufaa’i fo’i i aoaoga e faalautele ai le silafia o tagata.

 

• E tatau ona faapolokalame lelei auala e faatautaia ai tulaga o fefaatauaiga i le va o atunuu e lua.

 

• E tatau ona faalauiloa tautua a kamupani e ono mafai ona latou fesoasoani i le tuuina atu o atina’e ma tautua lelei, e fesoasoani ai i le atina’eina o isi pisinisi fou.

 

• Ia fesoasoani i pisinisi i le faalauiloaina o a latou oloa faatau atu aemaise ai o tautua, ina ia faaleleia lea tulaga i fesootaiga faaonaponei, ma fesoasoani i le faamalosia ma le faatumauina o itu e malosi ai atina’e o pisinisi, ina ia mafai ona faalautele a latou tautua i totonu o atunuu e lua.

 

O lo’o taua foi i le maliliega  auala e ao ona uia e itu e lua ina ia saga faaleleia atili ai taumafaiga e pei ona malilie i ai,  ina ia faatumauina tulaga lelei o fesootaiga, fefaasoaa’i auala e mafai ai ona faatumauina tulaga tuputupua’e o atina’e ma le tamaoaiga, e aofia ai ma le fetufaa’i lea o a latou faamaumauga ma minute o a latou fonotaga e faia, e fesoota’i ma auala o le latou galulue faatasi mo le faaleleia o le atina’e o malo e lua.

 

Ma o lenei maliliega na amata aloaia mai lava i le taimi na sainia ai i le va o faalapotopotoga a malo e lua, e mafai foi ona toe faia i ai ni suiga e itu e lua, mo auala e talitonu e faaleleia atili ai lana manulauti.

 

E i ai fo’i le talitonuga i le va o itu e lua, o le a le mafai ona faalavelaveina tulaga i mataupu ma tulaga tau tulafono, ae o le agaga atoa ia mafai ona fetufaa’i lagona ma mafaufauga e fausia ai se atina’e lelei ma malosi mo motu e lua.