Mo nogatupe e fa’afou pe fa’aleleia ai falenofo o le atunu’u e ala mai se tinoitupe o toina mai e le Matagaluega o Fefa’ataua’iga [DOC] ae fa’auia talosaga mai le Faletupe o Atina’e o Amerika Samoa, ua mae’a faia le se’i mo le 75 sui e fa’aulu latou talosaga mo nogatupe mo lea alamanuia.

O lenei la’asaga ua o’o i ai talosaga mo nogatupe, o se ala sili lea ona tonu i le fa’autautaga loloto a le Matagaluega o Fefa’ataua’iga ma le Faletupe o Atina’e, e tatau ona sailia mai ai se to’a 75 o ni sui agava’a e filifilia mai ai nisi e maua fa’amanuiaga mo le motu o Tutuila ma Aunu’u, ae o le masina o Ianuari 2014 o le a fili ai fo’i i lea lava faiga, le 15 sui mo le Manu’atele.

“O le lona fa lenei o la’asaga fa’ataoto ua fa’atautaia ai le filifiliga o ni sui agava’a mo talosaga i nogatupe o le fa’afouga o fale, ua mae’a ona fa’ailoa ia i latou uma mea e ao ina saunia lelei, a’o le’i o’o mai i le la’asaga ua tatou i ai nei. Afai la ae fa’aulu lau talosaga mo se nogatupe, ae le pasia ona ua i ai se aiaiga o le talosaga ua e misia e le’i mua’i tapena, o le fa’atamala lava o le sui talosaga.” O se talanoa mai lea a Magdalene Petaia o le DOC.

Mai le toluselau o tagata na fa’amoemoe e talosaga, ua sailia mai ai le 75 o nei sui, ma e le’i faigofie fo’i ona fa’amalie finagalo o le to’atele ua toe taliu i aiga e le’i manuia lana numera, peita’i, ua mae’a fa’ailoa ia i latou, e toe taumafai fo’i mo lea tausaga i lona fo’i alagatupe fa’atulaga mo nei lava ituaiga o nogatupe.

“E le mafai ona fausia ai sou fale fou, pe fa’atula’ia ai sau pisinisi, ua na’o le fa’afouga pe toe fa’aleleia le fale nofo o i ai i le taimi nei.” O se tala lea a Petaia.

O le sauniga lotu na si’itia lea e le auauna a le Atua ia Malaki Timu, ae sa susu atu le ali’i sui peresetene o le Faletupe o Atina’e Jason Betham ma le Sui Fa’atonu o le DOC Willie Le’auanae e va’ai patino i le fa’atinoga o le se’i e agava’a ai mo ni talosaga fa’aulu.

O i latou na se’ia numera, sa amata mai ia Malaki Timu, soso’o ai ma Betham, faapea Le’auanae

ma o’o mai loa ina se’ia e i latou ua mae’a fa’amanuiaina, ina ia eseese lava sui e se’ia mai nu’u eseese i Tutuila ma Aunu’u.

I le matau atu, o se faiga lelei tele ua fa’atautaia ai lenei sailiga o sui agava’a mo talosaga i nogatupe. Ua ilogale tonu ma ua agatonu fo’i ma finagalo o le to’atele sa le pale.

Ua vala’auina i latou uma ua umia numera sa se’i, ia o’o ane i le Faletupe o Atina’e i Fagatogo e taua’ao atu ai latou pepa talosaga e fa’atumu mo nei nogatupe ma e mo’omia e le faletupe o outou ID Amerika Samoa, lou pepa fanau ma le numera saogalemu.