Vaega: 48

E muamua pea mea i Matautusa, ma o tatou fa’afo’i le vi’iga ma le fa’afetai i le Atua Soifua, ona o Lana tausiga alofa mo i tatou e le mavae, lea o lo’o tatou maua ai le ola fa’apea ma Ana fa’amanuiaga i aso uma mo i tatou. ia manuia le alo faiva o le atunu’u i feau ma galuega o le feagai ai i lenei aso.

Na muta mai la tatou tala, ina ua maliu le Tama’ita’i Sa, i totonu o le falema’i i Ngliema lea na ave i ai mo ona togafitiga, peita’i, ua le manuia ma na maliu ai lava. Ae i totonu o le falema’i lava lea sa i ai se tama’ita’i tausi ma’i e igoa i a Mayinga N. O le tama’ita’i lenei, sa gafa ma le tausia po’o le va’aiga o le Tama’ita’i Sa o M.E.

E le tau mate pe na pa’i lima o lenei tama’ita’i tausima’i i le toto po’o puaiga lanu uliuli o le Tama’ita’i Sa, lea ua mafua ai ona maua o ia i le virusi. Na iloa lelei e Mayinga ua ma’i, peita’i, sa taumafai pea ina ia ‘aua ne i iloa e se tasi. O Mayinga e sau mai se aiga e lima vaivai, ae sa ia maua le sikolasipi e mafai ai ona fa’aauau ana a’oa’oga i Europa. Fai mai le fa’amatalaga, o lenei tama’ita’i, e sogasoga lona mafaufau e atamai fo’i, ma o le ala lea na taumafai ai ina ia faigaluega i totonu o le falema’i lenei, e tapena ai mo lana a’oga i Europa.

Na popole tele lenei tama’ita’i, ona ua ia manatu ifo, afai ae ma’i, o lona uiga o le a le mafai ona alu i Europa mo ana a’oa’oga. Ina ua amata ona tiga lona ulu, sa ia tu’ua ai loa le falema’i i Ngaliema ma alu ‘ese mai ai. E lua aso o alu ‘ese Mayinga mai le falema’i, ae o le mafua’aga na taumafai e alu i le a’ai, ina ia faia lona pemita e mafai ai ona malaga mo ana a’oa’oga i Europa.

O le aso muamua na alu ‘ese ai mai le falema’i o le Aso 12, o le masina o Oketopa 1976, na alu le aso atoa o tu i le laina e fa’atalitali ai lona taimi e mafai ai ona ia feiloa’i i le Minisita o Femalaga’iga i totonu o Zaire mo ona pepa malaga.

A’o le aso na soso’o ai, Aso 13, o Oketopa, na ia fa’alogoina ai ua amata ona tigaina, e le i alu i lana galuega, ae sa toe alu i le a’ai mo le faia o ona pepa malaga. Ina ua ma’ea, na alu ai loa i le tama’i ta’avale i le falema’i tele i Kinshasa, ua fa’aigoaina o le Mama Yemo. O le taimi lea, ua amata ona luluti ona tiga, e le gata i lona ulu, ae ua fa’apea ona tiga ma lona manava.

Na umi ona fa’asolo tagata mo togafitiga, a’o lea lava e fa’atalitali ai ma Mayinga ina ia maua sona avanoa e va’ai ai le foma’i. Fai mai le fa’amatalaga a le tusi tala o Richard Preston, sa faigata lava ona talia i le loto ma le mafaufau o Mayinga ua maua o ia i le fa’ama’i. Ae fai mai, o se teine e amio lelei ma ua luasefulu ona tausaga, o ia o le i oi mata o ona matua, o se tama’ita’i e naunau i lana a’oga, ae maise ai, o lea o le a malaga i Europa ona o le sikolasipi na ia mauaina e toe fa’alautele ai lona atama’i i tulaga tau foma’i.

Na maua lona avanoa e va’ai ai le foma’i, ma ua fai nei lona tui puipuia, ma le fa’atonuga a le foma’i, e tatau ona taofia o ia mo togafitiga, peita’i, e le lava potu, e le lava fo’i moega e tao’oto ai tagata mama’i i totonu o le falema’i lea, ma o le ala lea na toe alu ‘ese ai Mayinga.

Ua toe alu nei le tama’ita’i i le ta’avale la’u pasese ma fa’atonu le ave ta’avale e ave ia i le isi falema’i e igoa o le University Hospital, ma lona fa’amoemoe o le a maua ai se togafitiga mo ia. Ua lagona le popole ma le atuatuvale o le loto ma le mafaufau o Mayinga ona o tulaga pagatia ua o’o nei ia te ia. O tulaga fo’i ua i ai nei le toe fa’aauauina o ana a’oa’oga i Europa, ua fesiligia nei, ona o se sikolasipi sa ia taumafai malosi ia maua, ona o lona alofa i ona matua, ae maise o lona aiga e lima vaivai ma le tagolima, o lea ua fesiligia fo’i, pe taunu’u pe leai.

E faia pea …

Fa’aliliu: Akenese Ilalio Zec