TALI LE TAUTUA SAMOA IA TUILAEPA

Ua tali le vaega upufai o le Tautua Samoa i saunoaga a le alii palemia, le susuga Tuilaepa Lupesoliai Sailele Malielegaoi, e faatatau i a latou manatu faaalia e pei ona faailoa ai e le taitai o le vaega, le afioga Palusalue Faapo II, lona manao ina ia vave faia faiga palota lautele a le atunuu.

E pei ona lipotia muamua i a tatou tala, na saunoa le alii palemia, afai ae faia lea tulaga, o lona uiga e nao Palusalue lava lana vaega aua o le a o atu uma sui o le Tautua Samoa i le HRPP. Na faaalia e Tuilaepa i le au tusitala e faapea, e le malolo le tatagi o lana telefoni i sui o le Tautua Samoa o lo o suesue avanoa atu i le HRPP, ma ana leai le tulafono o lo o i ai nei e faasa ai ona fesuisuiai vaega faaupufai a sui faipule, ua leva ona o atu uma o le Tautua Samoa i le latou vaega. Peitai na faaalia e Palusalue i le au tusitala i le aso ananafi e faapea, o le tulafono e pei ona taua e le alii palemia, nao le pau lena o le pa puipui o lo o taofia ai sui o le HRPP mai le o atu i le Tautua Samoa.

“O le mafuaaga foi lena na faia ai e Tuilaepa lea tulafono ina ia taofiofi ai sui o lana vaega,” o a Palusalue lea. Na ia toe laga le mataupu na sainia ai e sui faipule e toa 19 le tusi ina ia aveesea ai le minisita o Tupe, le afioga Faumuina Liuga Tiatia, mai lona tofiga. “Ana leai le tulafono lena, ua leva ona omai le toa 19 lena i le matou vaega,” o le saunoaga lea a Palusalue.

TAPUNIA LE FAAALIGA O OLOA, SAINIA LE FEAGAIGA

O le aso Faraile na sei mavae atu nei na tapunia aloaia ai le faaaliga o oloa a le au faipisinisi laity mai Samoa e lua sa faagasolo i luma o le maota o le malo i Matagialalua, ma na faapea sainia ai ma le Feagaiga o le Malamalamaaga (Memorandum of Understanding) i le va o Faalapotopotoga o le Au Faipisinisi a Samoa e lua.

O lea feagaiga ua aloaia ai le galulue faatasi o ia faalapotopotoga e lua i le sailia o auala e faaleleia atili ai fefaatauaiga o oloa gaosi a atunuu e lua. Na saunoa le peresetene o le Faalapotopotoga o le Au Faipisinisi a Samoa, le susuga Namulauulu Sami Leota e faapea, ua tele se aoga o lenei faaaliga i le faalauiloaina o oloa gaosi e le gata i kamupani ae faapea foi tagata faipisinisi laiti.

Fai mai a ia, o le itu e taua ai lea faaaliga, aua o Amerika Samoa le atunuu aupito i lata mai i Samoa ma e faigofie toe taugofie le auina atu ma le faaulufaleina mai o oloa, aemaise o pusa apa i’a mai le kamupani o le StarKist, lea o le a amata auina mai i le masina fou.

FAATAUTO ALII MA TAMAITAI PISIKOA E TO’A 15

E to’a 15 alii ma tamaitai Pisikoa mai Amerika ua aloaia la latou auaunaga e avea ai ma alii ma tamaitai Pisikoa i Samoa nei i le maea ai o le sauniga o le faatautoga sa faagasolo i le aso Faraile na tea nei.

O nei Pisikoa e toa 15 o le a galulue i totonu lava o le Matagaluega o Aoga, Taaloga ma Aganuu e avea ma faiaoga e aoaoina le gagana faaperetania. E 10 aoga tulaga lua i Savaii ma aoga tulaga lua e lima i Upolu nei ua filifilia e galulue ai i latou nei.

O le amepasa o le malo Amerika i Samoa nei na faatautaia le sauniga o le faatautoga ao le minisita o le Matagaluega o Aoga, Taaloga ma Aganuu, le afioga Magele Mauiliu Magele, na saunoa faafetai e fai ma sui o le malo ma aloaia ai nei alii ma tamaitai Pisikoa e galulue i Samoa nei.

FAAFETAIA E LE MALO LE TOA SAMOA

O le aso Lulu o le vaiaso nei na savalia ai e le aufili laka liki a Samoa, le Toa Samoa, le taulaga i Apia i se valaaulia a le malo ina ia amanaia aloaia ai e le atunuu lo latou tautiga i le taamilosaga o le ipu o le lalolagi e pei ona sa faia i Egelani i le masina nei.

E pei ona lipotia muamua i a tatou tala, ao lei tuuvaa atu le au mo lea faamoemoe, sa lapataia e le alii palemia, le susuga Tuilaepa Lupesoliai Sailele Malielegaoi, afai ae toe faiaina mataga, o le a le toe faamatuuina atu se fesoasoani tau tupe a le malo. E tele i si faafitauli sa feagai ai ma le au ao sauni atu mo le ipu o le lalolagi e pei o le toe faamamulu o le alii kapeteni na filifilia, le susuga Roy Asotasi faapea le le avanoa o nisi o taaalo ona o manuaga. Peitai, sa faateia le atunuu ina ua oo le taumafaiga a le au i le vaega muamua o le pa’u ma nofo (quarter-finals) lea na faiaina ai i le au a Fiti.

O le maoae tele o taumafaiga a le au na totogi ai e le malo pasese a tama taaalo e toe foi mai ai i Samoa sei fai i ai se faaafe a le malo.

Saunia: Lilomaiava Andrew Fa’asau, Naenae Productions