Ads by Google Ads by Google

TOTOGI TUPE TAMA’ITA’I LAITI TO’ALUA AE FAI I AI UIGA MATAGA

Ua taofia nei e leoleo i le toese i Tafuna se ali’i e 53 tausaga le matua, ona o tuuaiga i lona totogi tupe lea o ni tama’ita’i laiti se to’alua ae fai i ai uiga mataga.

 

O le taeao ananafi na tula’i ai lea alii i luma o le faamasinoga faaitumalo mole taimi muamua, ma ua faamoemoe o le aso Gafua o le vaiaso fou e toe valaauina ai lana mataupu i luma o le fa’amasinoga, mo le faatulagaina o le aso e faia ai lana ulua’i iloiloga.

 

O le a le mafai e le Samoa News ona faalauiloa le suafa o lenei ali’i, ona o puipuiga lava i le ono mafai lea ona iloa atu ai ma tamaitai laiti o lo o aafia i lenei mataupu, o le alii fo’i ua molia, o le uncle o teneiti e 9 & 13 tausaga o lo o a’afia.

 

O le mataupu lenei na tofu atu i le Ofisa o Leoleo, ina ua faila e matua o teneiti na aafia sa laua tagi i le Ofisa o Leoleo i Tafuna, faasaga i le alii ua molia nei i lona faia lea o uiga mataga i le la tama teine e 9 tausaga le matua, ma tofia ai loa le alii leoleo suesue ia Det. Leaupepetele Vili Fa’apouli na te su’esu’eina lenei mataupu.

 

E na o le teineititi e 9 tausaga na masalomia e matua sa faia i ai e le ua molia uiga mataga, ae ina ua fesiligia e leoleo le ua molia e uiga i lenei mataupu, sa ia tautino ai sa aafia atu ai fo’i ma le teineititi matua e 13 tausaga i gaioiga mataga sa ia faia.

 

Na faamatala e le teineititi e 9 tausaga le matua i leoleo e faapea, talu mai lava le masina o Aokuso 2011 ina ua faatoa alu atu le ua molia ma latou nonofo i lo latou aiga, o iina na amata mai ai ona ia faia uiga mataga nei ia te ia, i le valaau lea o ia e alu atu i totonu o lona potu ae faatino ai uiga mataga e pei o le tagofia o ona itutinosa, faamatamata o ia i ata leaga (pornographic), pe tago fo’i ua toso atu ona lima ae tuu i lona totoga sa (tulou).

 

I le aso 21 Novema 2013 e pei ona faamatala e le teineititi e 9 tausaga i leoleo, na te’i ai ina ua valaau atu le ua molia e alu atu i totonu o lona potu, ma ina ua alu i totonu o le potu, na te’i ina ua taunuu atu o lo o matamata ata leaga a le ua molia, ona ia taumafai lea e pupuni ona mata i ona lima, ae na po ese e le ua molia ona lima.

 

Na taua e le tina o le teineititi i leoleo e faapea, e le’i aoga lana tama i le aso lea, ina ua te’i lava ua fai atu ia te ia o ia ua faama’ima’i, peitai e leai lava se mea e ono ma’i ai fua.

 

Sa faapena foi i le aso na sosoo ai, Novema 22, 2103 e pei ona faamatala e le teineititi i leoleo, na tei ai fo’i ina ua valaau atu le ua molia ia te ia e alu atu i totonu o lona potu, ae ina ua taunuu atu i totonu o le potu, sa toso atu e le ua molia ona lima ae tuu i lona totoga sa mo ni nai sekone, ona tago lea ua toe aveese ona lima.

 

O nisi o taimi e tatala ese ai e le ua molia ona lavalava (tulou) ae tu telenoa i luma o le teneititi na aafia, ao ia faia uiga faasotoma e faamalie ai ona lagona tu’inanau.

 

Na taua e le teineititi na aafia i leoleo e faapea, na te manatuaina le isi aso na tago ai le ua molia ua faatamala teisi le faitoto’a o lona potu, ona ia faia lea o ni uiga mataga ma faamatamata mai ai o ia a’o nofonofo mai i luma o le potu malolo, ae na vave lava ona taofi e le ua molia ana gaioiga ina ua ia vaai atu ua savali mai le tina o le teineititi i totonu o le potu malolo.

 

O isi taimi e faia ai e le ua molia uiga mataga nei i le teineititi na aafia, o taimi e tuua mai ai lana aoga ma alu atu i totonu o lona potu e sui ona ofu aoga, ae te’i i le ulufale faamalosi atu o le ua molia ma faaauau foi lana amio o le tagotago solo i ona itutinosa atoa ai ma lona faia o isi gaioiga mataga faasaga ia te ia.

 

I le aso 22 o Novema e pei ona taua e le tuagane laititi a le teineititi i leoleo, a’o tu tu i tafatafa o le potu a le ua molia, sa ia faalogoina ai o valaau le ua molia i lona tuafafine e alu atu e valu lona papatua, a’o i ai lona tuafafine i totonu o le potu, na taua e le tamaititi lona vaaia o le ua molia o tago atu ma tuu le isi lima a lona tuafafine i luga o lona totoga sa, a’o si’i e lona tuafafine si ona tei laititi.

 

Ina ua fesiligia e leoleo le ua molia e tusa ai o lenei mataupu, sa ia tagi ai ma loimata ma faatoese i leoleo i le mataga ma le leaga o lana mea sa fai, lea ua ia lagona ai lona sese ma lona fefe, ona, sa le tatau ona ia faia nei mea.

 

Na taua e le ua molia i leoleo e faapea, o se taimi o le tausaga e 2012 na amata mai ai lana amio lea, o lona faamatamata o teineititi na aafia i ata leaga, aemaise ai lona tagofia o ona itutinosa ina ia faamalie ai lagona tu’inanau sa ia te ia, e le gata sa ia faia i le teineietiti e 9 tausaga le matua, ae sa aafia ai foi ma lona uso matua e 13 tausaga i gaioiga lava foi nei e tasi.

 

Na tautino le ua molia, o totonu lava o lona potu na te faatinoina ai gaioiga e pei ona tuuaia ai o ia, a maea, ona ia tuu lea o tupe i teneiti e faapele ai i laua ma le faaupuga, aua ne’i o la ta’uina i o la matua.

 

Ina ua fesiligia e leoleo le teineititi matua e uiga i lenei mataupu, sa ia faamatalaina ai mea leaga uma a lona uncle sa fai atu ia te ia, aemaise lava i taimi e moe ai totonu o lona potu, lea e alu atu ai ma tago tago solo atu i ona itutinosa.

 

O taimi uma lava e faia ai e le ua molia uiga mataga nei i teneiti na aafia, o le taimi lea e le o i ai matua o teneiti i totonu o le fale, ona o nisi o taimi e galue ai le tama i le fafo i le fanua ae o le tina e faatino ona tiute faatina i totonu o le fale.

 

O aso Tofi uma lava ma aso Faraile e pei ona faamatala e teneiti i leoleo, e avatu ai e le ua molia tupe ta’i $2 & $3 mo laua.

 

E $50,000 lea ua faatulaga e le faamasinoga e totogi ona faatoa mafai lea ona tatala le ua molia i tua mai le toese i Tafuna, afai ae mafai ona tatala le ua molia i tua mai le toese, ua faasa ona toe taumafai e faafesootai teneiti o lo o aafia i lenei mataupu.

 

E tolu moliaga mamafa ma moliaga mama e fa ua tuuaia ai e le malo le ua molia ona o lenei mataupu, o nisi o ia moliaga e aofia ai le moliaga pito mamafa o lona faia o uiga mataga i fanau laiti, lea e mafai ona soloatoa ai se tasi i le falepuipui, poo le faasala i le isi faasalaga o le 10-30 tausaga i le toese.

 

O isi moliaga e aofia ai le faia o uiga faasotoma, tagofia o itutinosa o fanau laiti, lua moliaga o le faamatamata o fanau laiti i ata leaga, atoa ai ma moliaga e lua o lona faia o ni gaioiga e ono lamatia ai le saogalemu o se fanau e talavou i lalo o le tulafono.