Ads by Google Ads by Google

Aso Fa’asamoa A’oga Maualuga Fa’asao Malisi

Na mata’ina taumafaiga a le fanua a’oga uma lava i le A’oga Maualuga a Fa’asao Malisi i Lepuapua, ina ua latou taumafai e fa’ataunu’u vaega uma sa fa’atulaga ina ia tauva ai vasega ta’itasi e ala i latou togi ma tupe foa’i na maua i luga o le fola, e maua ai se aotelega o se vasega o le a maua le tulaga muamua i lenei tausaga.

 

I le aotelega, ua fa’ailoa ai e le ‘au fa’amasino filifilia mo le fa’amoemoe a le a’oga maualuga, ua manumalo a’ia’i ai le vaega a le Juniors po’o le Vasega 11. O le latou tausala Julie Merelisha Elisara ma le Manaia o Tekiu Hunt ua la’ua mauaina le tulaga muamua i le tauvaga, ma ua avea ai nei i la’ua ma Tausala ma Manaia mo le tausaga aoga  2013-2014.

 

Peita’i, e le’i fa’apito manu ia tasi, sa matua iloga ona matagofie mea uma lava na tapena i ai le fanau e afua mai lava i latou tauvaga solo tusia fa’aSamoa ina ua mae’a le ‘ava o le feiloa’iga, sa pa’u lea o se toe sao o le vasega fa’ai’uaso o lenei tausaga.

 

Matagofie le fa’atinoga o le ava fa’atupu o le feiloa’iga, i ona lauga ma le agaia fo’i e taulele’a o le tausala i ona faiva a’o toto’o i le ‘ava i lea taeao fesilasilafa’i.

 

Na soso’o lea ma le sausaunoaga a le ali’i peresetene o le vasega fa’ai’uaso ma le a’oga atoa i Fa’asao Malisi. Ina ua mae’a le tauvaga solo sa soso’o mai ma le tauvaga puletasi, ua sili atu ona faigata ai le galuega a ali’i ma tama’ita’i fa’amasino. Ina ua mae’a lena sa matagofie fo’i le toe tauva mai o taulele’a talavou a vasega ta’itasi i le Folafolaga o To’ona’i ma ua iloga ai, e le o vale tu’ulima lava a tatou tu ma agaifanua.

 

I le tauvaga sulatoga, na matua iloga ai le taumafaiga a le tama’ita’i o le Level 10 ae sa le mamao lava le va ma isi o sui tauva a le vasega 9 ma le 11, ae ua iloga lava le ma’ema’e o le tama’ita’i sulatoga a le vasega fa’ai’uaso.

 

I le tauvaga o le Ofu Laula’au, sa iloga fo’i ona fuli le fanau ma aiga e matua su’ia ia matagofie nei laei fa’aleaganu’u. O le ofu o le tama’ita’i Tausala o Tavaetoto Uti ma le Manaia o Leone Alofa na saunia lelei lava i le ti’ula, ma sa mamanu i le lautalotalo pa’epa’e ma ua matagofie lava le tu’ufa’atasiga o la’ua la’ei.

 

O le vasega 10 sa ese fo’i le saunia lelei o laei o le tama’ita’i Tausala o Victoria Reid ma Mark Tafua i le lau La’au o le Vaveao, lea e fa lelei lanu o le nuanua o lo’o fefiloi i ai, ma ua fa’apena ona saunia ma o la’ua sei e fa’afetauia o la’ua la’ei, ae toe mamanu i le teuila mumu ua matua i’ila lelei i le u’u samoa. Matagofie atili fo’i le tu’ufa’atasiga o la’ei o lea lava soa.

 

O le vasega 11 na latou filifilia le Tausala o Mere Elisara ma le Manaia o Tekiu Hunt. O i la’ua ia sa ese o la’ua la’ei lau sului sa savavali mai ai i totonu, ae o’o ina fa’aalia o la’ua la’ei launiu i luga o le fata ma fa’ailoa ai, o lo’o la’ua laeia le laniu i ona lanu uma lava, e amata mai i le lanu meamata vaivai se’ia o’o lava i le launiu ua matua ma ua meamata pa’auli. O le aoga o le toe fa’ailoa mai o le ola.

 

O le vasega fa’ai’uaso sa suia lea e Viki Koli Talosaga ma Sofai Petelo lea sa saunia lelei o la’ua la’ei i le teuila lanu muamua ae mamanu mai i le teuila lanu piniki. Matagofie fo’i le tu’ufa’atasiga o la’ua la’ei ma ua talafeagai lava ma le vevela o le la.

 

O Mauluulu, Sasa ma le Taualuga sa fa’ai’u i ai le aso fa’apitoa, ma ua matua sili ona faigata ona fa’amasino, aua e taufai tutusa lelei le matagofie o tapenaga a le fanau i lea tauvaga. E leai se sasi o taga o le sasa, e o tutusa fo’i taga a le isi vasega ma le tasi vasega, ae sili ai, e mata’alia uma tama ma teine i le fa’atinoga o latou sasa. O mauluulu e leai se mea e sese ai tama’ita’i i a latou teuga ma taga o vavai na fa’atino ai auga o pese Samoa sa usuina mo latou fa’aaliga o taleni.

 

O le taualuga o fa’amoemoega uma, sa toe sausaunoa ai le tama’ita’i o lo’o avea ma Tausala ma Manaia filifilia a le a’oga Fa’asao Malisi, Tiara Lafaele ma Isopo Filiva’a. Ona fa’ato’a fa’amae’a ai lea o mea uma i le sausaunoaga a le PTA ma le latou laulauatofi, ma fa’atalitalia ai le fa’ai’uga a le vasega o fa’amasino.