Ads by Google Ads by Google

Amatalia Galuega Feso’ota’iga Faipa-Opetika i le Teritory

Ua mae’a faia le sauniga e fa’amanuia atu ai i galuega amata o le feso’ota’iga fa’ata’alise  o le poloketi ua fa’aigoaina o le “BLAST” lea ua fa’amausali atili ai le lelei atoatoa o ala o feso’ota’iga i laina o telefoni, laina o initeneti ma tafa’ilagi, ma e aoga tele mo pisinisi ma ala o tamaoaiga saili i luga o ia fo’i ituaiga o feso’ota’iga.

 

O lenei le feso’ota’iga sa mo’omia tele ai ona fa’atuina o le Ofisa fou o le ASTCA lea ua mae’a i le tausaga 2012, ma o se mea lelei, ona o lo’o fa’agaoioia pea lea poloketi se’ia o’o mai i lona taunu’uga ua olioli e amatalia nei. O le tala mai e 15 masina e ao ina fa’atamo’e ai le gaoioiga fa’atino e mautu ai le amatalia o feso’ota’iga fa’a-opetika  (fiber optic).

 

O le kamupani o lo’o latou fa’ataunu’uina nei galuega fa’atino o le Michels Corporation mai le setete o Wisconsin. Ua fa’ailoa mai ua mae’a amatalia nisi o galuega patino e amatalia ai feso’ota’iga, ae o lea ua faiale sauniga, ina ia fa’alauiloa ai i le atunu’u lea fa’amoemoe ma fa’afetaia sui o le malo ma isi sa latou amatalia lenei fuafuaga.

 

O le taimi nei o le vasega o inisinia a le Michels Corp. lea ua nonofo mau lava ina ia fa’aleleia a’ia’i le galuega amata ona feso’ota’i i aiga, pisinisi ma ofisa eseese. O le ali’i Pule o le  Michels, Randy Thompson, sa ia fa’ailoa mai, “O lenei galuega e amatalia i le ulua’i vaiaso o Ianuari ma e tatau ona mae’a lelei nei feso’ota’iga i le mae’a ai o le tausaga ma le tolu masina. O le a mo’omia fo’i e i latou le fesoasoani i ni tagata faigaluega, e pei o nisi o tagata leipa, ave loli ma ave masini tetele.”

 

Ona o tulaga tuga o galuega e elia ai autu i autafa o alatele, e poloka ai fo’i le ala mo feoa’iga, sa fa’ailoa ai e Thompson, “E fa’aaoga e i matou le faiga lea e vili ai lava na’o se vaeaga ua fa’amau fa’ailoga mai e tatau ona fa’aofi ai le paipa. Ae le matua elia atoa le autafa o alatele. E taumafai lava ina ia le tele ni vaega o le atunu’u e elia.”

 

I le saunoaga a le ali’i CEO a le ASTCA Moefa’auo Bill Emmsley, sa ia talanoa mai ai i le taimi e taumafai ai ona au lenei auaunaga i maota ma laoa, “E tusa lea ma le 65% o le galuega e taoto i lea tautua, aua o le a tele fo’i ni fa’asea e o’o mai ai i le matou ofisa! O fa’asea masani lava, ona e le mana’o e sopo fua se ta’iga o se laina i lou fanua o lo’o tuaoi ma se aiga.”

 

“O le aia a tagata i o latou lava fanua, e faigata lea mataupu, peita’i o le ala lava lea o le fa’ato’ai muamua atu o lenei fa’asalalauga fa’alaua’itele, ina ia fa’aofi le onosa’i ma le fa’apalepale i loto o nai o tatou tagata, e mafai ai ona tatou fa’amae’a lenei galuega i se taimi atofa e pei ona mua’i fa’ailoa atu.”

 

O le afioga le Loia Sili Afoa Moega Lutu sa avea ma sui o le Kovana i lea mafutaga, ma sa ia mua’i fa’ailoa lava le aoga tele o nei feso’ota’iga i so’o se ofisa i totonu o le teritori.

 

“E le o i matou o ni ta’ita’i lelei mo le atunu’u pe afai e le fa’aauauina lenei poloketi aoga tele. O lenei le so’otaga mausali o le vaitaimi o lumana’i ma lo tatou vaitau, ae maise o le vaitausaga ua tuana’i fo’i. O le isi aoga sili ona tele, o ala o feso’ota’iga mo a’oa’oga a le fanau i lenei vaitau ma le lumana’i.”

 

O le galuega tele lenei, e suia mai ai feso’ota’iga i uaea kopa a le ASTCA i le ituaiga o Feso’ota’iga fa’a-Faipa Opetika i le Aiga.

 

“O aiga uma o Amerika Samoa e maua lea so’otaga fa’afaipa-Opetika, e na te maua feso’ota’iga vave lava, e maua ai feso’ota’iga mo ata tifaga e maimoaina i luga o komipiuta, tautua lasi o feso’ota’iga fa’auepesite, ma isi e mo’omia tele i a’oga, pisinisi ma talavou ua malamalama lelei i ala e saili ai le tamaoaiga e fa’aaoga ai le initeneti.”

 

faaliliu: Leua Aiono Frost