Ua toe fautuaina e Kovana Lolo Matalasi Moliga sui uma o le Kapeneta, ina ia faaeteete i faamatalaga latou te tuuina atu i Tusitala, ina ne’i avea lea ma itu e faaseseina ai le atunuu.

“E lelei tele tusitala i le sailiina lea o auala e mafai ai ona outou talanoa atili atu ia i latou,” o le saunoaga lea a Lolo i le fonotaga a le kapeneta i le vaiaso ua te’a.

Sa ia faailoa foi i lana kapeneta faiga faavae a le faigamalo e tatala ai ona fesootai atu i tusitala, e pei o le mafai lava lea e le faatonu ona saunoa i vaega faasalalau, i soo se mataupu e faatatau i lana matagaluega.

I ulua’i fonotaga a le kapeneta i le amataga o le tausaga nei, na faailoa ai e Lolo i faatonusili e faapea, na pau le tagata e mafai ona tuuina atu ni faamatalaga i tusitala e ese mai ia i laua ma le Lutena Kovana, o faatonusili o matagaluega ma ofisa uma o le malo.

I le fonotaga a le kapeneta i le vaiaso na te’a nei, na faalauiloa aloaia ai e Lolo lona le taliaina o se fuafuaga na faalauiloa e Joseph David Fleming i le Samoa News, i sana fuafuaga e tuu atu sana paketi faaopoopo (supplemental) e $7.5 miliona i le malo i le masina fou, ina ia fesoasoani ai i le faatinoina o nisi o manaoga i totonu o le falema’i o le LBJ.

“Afai lava na e misi le pasi muamua, e leai se pasi lona lua,” o le saunoaga lea a le alii kovana. Sa ia faailoa foi ia Fleming e faapea, na te le toe alu i le Fono ma toe faailoa i ai, “o le mea lea o lo o mana’omia.”

O le aso Lua o le vaiaso na te’a nei na lolomi ai i le Samoa News se ripoti e faatatau i se fuafuaga a Fleming, mo le tuuina atu lea o lana paketi faaopoopo e faatino ai manaoga a le falema’i.

Na saunoa faalaua’itele le alii kovana i le kapeneta ma faapea, o le tiute o le faatonu o le nofo lea i lalo i le amataga ma faatulaga le paketi e manaomia mo lona ofisa.

Sa ia toe faamanatu foi i lana kapeneta le taua o le mataupu i paketi a ofisa taitasi, lea na te faamanatu atu pea i soo se taimi e fono ai le kapeneta, ona o lona talitonuga o le vaega pito sili lea ona taua i le faatautaiga o galuega a ofisa ma matagaluega a le malo.

“Soo se Faatonu lava e tatau ona ia silafia lelei lana paketi, o iina e fuafua i ai galuega faatino a lona ofisa i le tausaga atoa,” o le isi lea saunoaga a Lolo.

O se tasi o auala na faailoa e le alii kovana e mafai ai ona foia ai le faafitauli o le mumu lea o paketi a nisi o ofisa, o le latou nonofo lea i lalo ma fetufaa’i i auala e faaleleia ai le paketi, aemaise lava i matagaluega sa tetele vaega tupe na ova ai a latou paketi i le tausaga tupe 2013 na faatoa mavae atu nei.

Mo se faataitaiga o le Matagaluega o Uafu ma Taulaga e pei ona taua e Lolo, lea sa maua le avanoa latou te nonofo ai i lalo ma le tamaitai faatonu ia Dr. Claire Tuia Poumele ma nisi o lona ofisa, ma latou toe iloiloina le latou paketi atoa aemaise ai vaega na mafua ai ona ova le latou faaaoga.

Na faailoa e le alii kovana i lana kapeneta e faapea, na pau le alofaga mo i latou i le tausaga tupe na tea atu nei, latou te le’i amataina le paketi i le ulua’i kuata, ui o lea, sa lelei le galuega na latou faia ina ua tapunia le tausaga faaletupe 2013.

“Ae o le paketi mo le tausaga tupe lenei 2014, ou te faamoemoe o le a uliuli uma paketi a matagaluega ma ofisa a le malo, pe paleni fo’i, ou te iloa e faigata ona outou faatinoina lena tulaga, ae o lou tiute lena faa faatonu, o le mautinoa e te le solia se vaega o le tulafono tau i le paketi,” o le saunoaga lea a Lolo.

Sa ia fautuaina foi faatonuina o matagaluega sa mumu a latou paketi i le tausaga tupe 2013, ina ia saili se avanoa e fetufaa’i ai ma le Teutupe a le malo, o le faatonusili o le Ofisa o le Paketi atoa ai ma le faatonusili o le Ofisa o Tagata Faigaluega a le malo, i ni fautuaga ma auala e fesoasoani ai i le faaleleia o a latou paketi.