Ua faaalia le toatele o afioaga i le atunuu ua sainia ni a latou maliliega ma le malo o Ameika Samoa, tauala atu lea i lalo o le Matagaluega o Fefaatauaiga ma Alamanuia, mo le faamamaina lea o le siosiomaga o le atunuu e aofia ai auvai, gataifale faapea ai atumauga ma tafatafa o le alatele.

O le agaga o le polokalame e pei ona faamaonia mai e se sui o le matagaluega, susuga Marvis Vaiaga’e i le Samoa News, o le taumafai lea ina ia tutu faatasi le malo ma le atunuu atoa i le faamamaina o le siosiomaga, ina ia avea ai Amerika Samoa o se atunuu e mama ma matagofie ona laufanua i le vaai.

“E tele nuu ua maea ona sainia a latou maliliega ma le malo i le faamamaina o le siosiomaga, ma ua sauni foi le malo e tuuina atu ni fesoasoani tau tupe e lagolago ai i le pito laau a nuu ma afioaga o le atunuu,” o le saunoaga lea a Vaiaga’e i le aso Faraile na te’a nei, i le mae’a ai ona sainia o maliliega a nuu ma le malo i le aso Lulu na te’a nei.

Na taua e le Sui Failautusi o le Ofisa o Mataupu Tau Samoa ia Tuiagamoa Tavai e faapea, o le tulaga lelei o le polokalame lenei, o le a faigofie ai foi ona faamalosia le pito laau a Pulenuu ma Alii Mautofi, i le faatinoina lea o a latou tiute e pei o le faamamaina o nuu ma auvai i vaiaso taitasi.

“O le matou afioaga lea ua malilie latou te faamamaina le auvai lea o lo o ui atu i tafatafa o le nofoaga tuai sa i ai le Pago Pago Community Center, ma faasolo atu ai lava seia oo i le sami, e ese mai i le tulaga lea, o lo o galulue pea le pulenuu ma le aumaga e faamama tafatafa o le alatele ma isi vaega o le nuu i vaiaso taitasi,” o le saunoaga lea a le matua ia Pulu Ae Ae Jr ina ua fesiligia e tusa ai o le aofia ai o Pago Pago i lenei faiga feagaiga ma le malo.

Mo le afioaga o Fagatogo e pei ona saunoa le alii faipule ia Maugaoalii Leapai Tusipa Anoai, ua latou malilie e faamama le auvai lea e taoto i le va o le maota fono ma le Fagatogo Square, o le latou sao lea i le faamamaina o le siosiomaga o le atunuu.

Saunoa Tuiagamoa e faapea, o le taua o le polokalame lenei na afua mai e le alii kovana sili, o le a faatumauina ai le faamatagofieina o nofoaga eseese o le atunuu, ma atili ai ona fiafia turisi e malaga asiasi mai i Amerika Samoa.

“E pei ona silafia, o polokalame e faatatau i le faamamaina o le siosiomaga ma le atunuu atoa, e le fou i fuafuaga a le kovana ma le faigamalo, o polokalame ua leva ona faataoto mai, amata mai lava i le faamamaina o aai, faasolo mai ai i le tofia o Matagaluega taitasi a le malo e faamama nofoaga eseese i le atunuu, sosoo mai ai ma le Faatamafaiina o Aoga, lea lava ua faaauau mai ai i le siosiomaga, ma e i ai le talitonuga e le toe motusia polokalame nei a le alii kovana, ae o le a faaauau pea mo le matagofie o le atunuu atoa,” o le saunoaga lea a Tuiagamoa.

O le faanaunauga o le malo e pei ona saunoa Tuiagamoa, “ia aofia uma afioaga uma i le atunuu i le polokalame lenei, e oo lava i aumaga, mafutaga a tina i nuu ma ekalesia, faasolo atu ai i autalavou, ekalesia, aoga ma tagata taitoatasi uma lava, o lo o finagalo le kovana ia tofu sao uma le atunuu i le faamamaina o ona laufanua, ona lagona lea e tagata le taua o le aua ne’i toe faalapisi, a ia teu teu faamatagofie le siosiomaga ma le atunuu.”