Ads by Google Ads by Google

Ave faamuamua tupulaga talavou mo pesepesega Kerisimasi

Ua i ai le finagalo o le afioga i le kovana sili ia Lolo Matalasi Moliga, ma le Lutena Kovana ia Lemanu Peleti Mauga, o le a le toe faaaogaina Ofisa ma Matagaluega a le malo e faafoeina le polokalame o pesepesega o le Kerisimasi lea e faia i le masina o Tesema o tausaga taitasi, ae o le a avea lea avanoa e faataua ai tupulaga talavou o lo o tautua i Ekalesia ma Faalapotopotoga, e faailoa mai so latou sao mo le malo i le faaiuga o le tausaga.

 

Saunoa Lolo Moliga i le fonotaga a le kapeneta i le vaiaso nei e faapea, o lea suiga o le a mafai ai ona maimoa le atunuu i nisi foi faafiafiaga e ese mai i pese ma siva a le malo, “ua fai ma faatiga mata” i le maimoa ma le silasila a le atunuu.

 

“O le isi foi mafuaaga o lenei suiga, e le gata e faaitiitia ai le tupe alu mo le malo, ae taofia ai foi le tula’i soo mai o le faafitauli o le faatatope o tapenaga mo se taimi puupuu, ae o le avanoa lelei lenei o le a maua e tupulaga talavou, aemaise ai aulotu, aufaipese ma faalapotopotoga, e tula’i mai ai e fai so latou sao mo le atunuu, ao tatou aga’i atu e faamanatu aso fiafia ma le faaiuga o le tausaga,” o le saunoaga lea a Lolo.

 

O le polokalame o pesepesega a le malo e masani ona faia i tausaga taitasi, sa masani ona i le vaiaso lona lua o le masina o Tesema mo le umi e tolu po, ona sosoo atu ai loa lea ma le polokalame masani a le Ofisa o le Arts Council, lea e faataua ai aufaipese mai ekalesia, aoga, autalavou atoa ai ma faalapotopotoga.

 

O le polokalame o pesepesega o le kerisimasi mo lenei tausaga, ua galulue faatasi ai le Ofisa o le Arts Council ma le Ofisa o Tupulaga Talavou, Tina ma Tama’ita’i mo le tuufaatasia.

 

Na taua e le Faatonusili o le Ofisa o le Arts Council ia Uta Dr. Laloulu Tagoilelagi i le Samoa News e faapea, o lo o taumafai e tuufaatasi le polokalame mo lenei tausaga, ma le faamoemoe e taula’i le autu o le polokalame i le faatauaina o pesepesega o le kerisimasi.

 

O le taimi nei e pei ona saunoa Uta, ua amata ona tatala le avanoa i autalavou, faalapotopotoga, ekalesia atoa ai ma aoga e fia fai so latou sao mo polokalame o le masina fou, ina ia amata tapena ma faatulaga a latou polokalame, a’o le’i oo i le taimi e malaga atu ai le komiti mo le siaki ma pasia.

 

Na taua e le alii kovana e faapea, o le isi faafitauli sa maitauina i polokalame nei, e tele ai fo’i sauniuniga a le tagata faigaluega e faia mo toniga, ma taofia ai le avanoa e faaalu sa’o tupe mo le aiga i le faaiuga o le tausaga.

 

I le aga’i atu ai o le atunuu ma le malo i le faamanatuina o aso fiafia i le faaiuga o lenei tausaga, ua manatu ai le alii kovana o le a la tapenaina ma le Lemanu se tali faaaloalo mo le kapeneta ma o latou aiga, ina ia mafai ai ona o atu faatasi e mafuta ma fiafia i le faaiuga o galuega o lenei tausaga.

 

Sa ia fautuaina foi Faatonusili, e le tatau ona toe malaga ese atu se tasi i atunuu i fafo i le taimi e faatino ai polokalame faaiuga a le malo, ina ia maua ai le avanoa e mafuta faatasi ai taitai o le atunuu ma o latou aiga, aemaise ai fo’i tagatanuu, ina ia lagona faatasi ai le taua o le faaumaina o galuega o lenei tausaga.